Baibal Olcim
Tingtoeng 147
Jerusalem a Thoh
BOEIPA te thangthen uh. Mamih kah Pathen tingtoeng he then tih koehnah neh naepnoi rhoeprhui pai.
Jerusalem aka thoh BOEIPA loh a heh tih Israel te a calui.
Lungbuei a rhek rhoek te a hoeih sak tih a hma te a poi pah.
Aisi rhoek ke amah tarhing la a tae tih a ming te rhip a sui.
Mamih kah Boeipa tah len tih a thadueng khaw yet. A lungcuei te tae lek pawh.
Kodo rhoek aka tungaep BOEIPA loh halang rhoek te diklai la a kunyun sak.
BOEIPA te uemonah neh doo lamtah mamih kah Pathen te rhotoeng neh tingtoeng uh.
Vaan ke khomai neh a thing tih diklai ham khotlan a hmoel pah dongah tlang ah sulrham a poe sak.
A pang uh vaengah rhamsa ham neh vangak ca ham a buh a khueh pah.
Marhang kah thayung thamal neh hmae pawt tih, hlang kho dongah khaw aka ngaingaih pawh.
Amah aka rhih so neh a sitlohnah dongah aka ngaiuep ni BOEIPA loh a ngaingaih.
Aw Jerusalem BOEIPA taengah domyok ti lamtah, aw Zion na Pathen te thangthen laeh.
Na vongka kah thohkalh te a caang sak tih na kotak kah na ca rhoek te yoethen a paek .
Na khorhi ah rhoepnah a khueh tih cang tha te nang n'kum sak.
A olthui te diklai la a tueih tih a ol loh leklek yong.
Vuelsong te tumul bangla a haeh tih vueltling te hmaiphu bangla a yaal.
A rhaelnu te a tham la a lun vaengah a khosik hmai ah unim aka pai thai?
A ol a tueih vaengah te rhoek yut tih a hil neh a hmuh vaengah tui la cip.
A ol te a ol bangla Jakob taengah, a oltlueh neh a laitloeknah Israel taengah a phoe sak.
Te te namtom boeih taengah a saii pawt dongah ni laitloeknah te a ming uh pawh. BOEIPA te thangthen uh.
Baibal Olcim. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.