Baibal Olcim
Tingtoeng 105
Pilnam taengah Pathen kah Sitlohnah
BOEIPA te uem uh lah. A ming te khue uh lah. A khoboe te pilnam rhoek taengah tukkil uh lah.
Amah te hlai uh lah. Amah te tingtoeng uh lamtah amah kah khobaerhambae boeih te lolmang taeng uh lah.
A ming cim neh thangthen uh lamtah, BOEIPA aka tlap rhoek kah a lungbuei tah a kohoe saeh.
BOEIPA neh amah kah a sarhi te tlap lah. A maelhmai khaw tlap taitu lah.
A kopoekrhainah a saii neh a ka dongkah laitloeknah bangla anih khobaerhambae khaw,
A sal Abraham tiingan neh a coelh Jakob koca rhoek loh thoelh uh lah.
BOEIPA amah ni mamih kah Pathen coeng. A laitloeknah khaw diklai pum ah om.
A paipi tekumhal duela a thoelh dongah cadilcahma thawngkhat ham olka a uen. 1
Abraham neh Isaak taengah a saii a olhlo te, 2
Jakob taengah oltlueh la, Israel taengah kumhal paipi la a sut pah.
Te dongah, “Kanaan kho rhi te na rho la nang taengah kam paek ni,” na ti nah.
A hlang kah hlangmi te a sii la om pueng tih, a khuiah bakuep uh.
Te vaengah namtom taeng lamkah namtom taengla, ram pakhat lamkah pilnam pakhat taengla poengdoe uh. 3
Amih aka hnaemtaek ham hlang khueh pah pawt tih amih kongah manghai rhoek khaw a tluung pah.
Ka koelh soah ben boel lamtah ka tonghma rhoek te thaehuet thil boeh,” a ti nah. 4
Khokha a khue vaengah kho khuiah conghol neh caak boeih te a phae pah. 5
Amih hmai kah a tueih hlang, Joseph te sal bangla a yoih. 6
A kho te hlong neh a phaep pah uh a hinglu ah thicung loh a toeh.
A olthui a thoeng tue a pha due BOEIPA kah olthui loh ol loh anih te a cil a poe. 7
Manghai loh a tah dongah pilnam aka taem loh anih a doek tih a hlah. 8
Amah im kah boei neh a hnopai boeih aka taemrhai hamla,
A hinglu bangla a mangpa rhoek te khoh tih a hamca rhoek te cueih sak ham te a khueh. 9
Te vaengah Israel loh Egypt la kun tih Jakob loh Ham kho ah bakuep. 10
Tedae a pilnam te muep a pungtai sak tih a rhal rhoek lakah a yet sak.
BOEIPA loh a sal rhoek te rhaithi sak tih, a pilnam aka hmuhuet ham Egypt rhoek kah lungbuei te a maelh pah. 11
A sal Moses neh anih ham a coelh Aron te a tueih.
Amih rhoi loh Egypt rhoek taengah Boeipa kah miknoek olka a tueng sak rhoi tih, Ham kho ah khaw kopoekrhai hno te a tueng sak rhoi. 12
Khohmuep a tueih tih a hmuep sak dongah Boeipa kah olthui olka te koek uh thai pawh. 13
A tui te thii la a poeh sak tih a nga khaw a duek sak. 14
A kho kah bukak rhoek te a manghai rhoek kah imkhui la a khae sak. 15
Amah loh a uen tih a khorhi tom ah pil neh pilhlip uihli tlung. 16
Khonal te rhael la a poeh sak tih a kho ah hmaisai hmai la coeng.
A misur neh a thaibu te khaw a haih pah tih a khorhi kah thing te a khaem pah. 17
A uen bal tih kaisih neh lungang te tae na pawt la halo.
Te vaengah a kho kah baelhing boeih a caak tih a khohmuen kah a thaihtae khaw a caak pah. 18
A kho khuikah caming boeih neh a thahuem boeih khuikah a thaihcuek te a ngawn pah. 19
Te vaengah amih te cak neh, sui neh ham pawk puei dongah amah koca rhoek khuikah tah paloe pawh.
Amih Egypt rhoek te birhihnah loh a vuei tih amih rhoek a nong vaengah a kohoe uh. 20
Himbaiyan bangla cingmai a yaal pah tih khoyin ah hmai a vang pah. 21
A bih vaengah tanghuem a khuen pah tih vaan kah buh te amih a kum sak. 22
Lungpang a ong vaengah tui ha phuet tih rhamrhae ah tuiva la a long sak te,
a sal Abraham taengkah a olkhueh cim te a poek dongah ni.
A pilnam khaw omngaihnah tamlung a coelh neh a khuen. 23
Te vaengah namtu rhoek kah a thakthaenah namtom khohmuen te a paek tih a pang uh te,
a oltlueh ngaithuen sak ham neh a olkhueng te kueinah sak ham ni. BOEIPA te thangthen lah.
Source notes (23)
- Cross-reference Sue 12. 7; 17. 8; Sue 26. 3.
- Cross-reference Sue 28. 13.
- Cross-reference Sue 20. 3-7.
- Cross-reference Sue 41. 53-57.
- Cross-reference Sue 37. 28; 45. 5.
- Cross-reference Sue 39. 20—40. 23.
- Cross-reference Sue 41. 14.
- Cross-reference Sue 41. 39-41.
- Cross-reference Sue 46. 6; Sue 47. 11.
- Cross-reference Sng 1. 7-14.
- Cross-reference Sng 3. 1—4. 17.
- Cross-reference Sng 10. 21-23.
- Cross-reference Sng 7. 17-21.
- Cross-reference Sng 8. 1-6.
- Cross-reference Sng 8. 20-24; Sng 8. 16,17.
- Cross-reference Sng 9. 22-25.
- Cross-reference Sng 10. 12-15.
- Cross-reference Sng 12. 29.
- Cross-reference Sng 12. 33-36.
- Cross-reference Sng 13. 21,22.
- Cross-reference Sng 16. 2-15.
- Cross-reference Sng 17. 1-7; Lmp 20. 2-13.
- Cross-reference Jos 11. 16-23.
Baibal Olcim. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.