Saam 63

Judah praezaek ah oh naah, David ih Saam laa.

Tui anghae muithla

1Aw Sithaw, nang loe ka Sithaw ah na oh; nang to kang pakrong han; tui om ai praezaek ah, ka pakhra mah nang hae tui ah anghaeh moe, ka taksa mah nang to poek.

2Na thacakhaih hoi na lensawkhaih to hnuk hanah, hmuenciim ah nang kang pakrong moe, kang hnuk boeh.

3Nang tahmenhaih loe hinghaih pongah hoih kue baktih toengah, pahni hoiah nang kang pakoeh han.

4Ka hing thung tahamhoihaih kang paek han, na hmin hoiah ban ka payangh han.

5Tangkhring hoi kathawk moi baktiah, ka hinghaih mah zok amhah tih, ka pahni mah anghoehaih laa to sah ueloe, ka pakha mah nang to pakoeh tih.

6Ka iihkhun hoi nang to kang panoek poe moe, aqum puek nang to kang poek han.

7Nang loe kai bomkung ah na oh pongah, na pakhraeh tahlip ah kang hoe han.

8Ka hinghaih loe nang khaeah ni amha, na bantang ban hoiah nang patawnh.

9Ka pakhra paro han pakrong kaminawk loe, longkhaw thungah caeh o tih.

10Nihcae loe sumsen hoi amtimh o ueloe, tasuinawk ih rawkcak ah angcoeng o tih.

11Toe siangpahrang loe Sithaw ah anghoe tih; anih hoi lokkamhaih sah kaminawk loe lensawk o tih; toe amsawnlok thui kaminawk ih pakha loe tamuep pae khoep tih.