Dai Cangcim Kthai
1 Korintuh 2
Kutlamktung üng taih Jesuha mawng
Ka püie aw, nami veia law lü, ngthupkia Pamhnama ngthungtak1 ka ning ja mtheh üng, ngthu mpyawng mahnak ja ksingnak am sumei veng. Jesuh Khritaw kutlamktung üng taiha ngthua thea nami veia ka, ka ksing vai am ve. 2 Nangmia vei ka law üng ktha ngcek lü cäi lü ngkhyet veng. Ka pyen ja ka mtheimthangnak cun nghngicima khyaihnaka ngthu üng pyena am kya lü, Pamhnama Ngmüimkhya ja johit üng ni akya ve. Nami jumnak cun Pamhnama johita kya lü nghngicima ksingnaka am kya.
Pamhnama kthemnak
Jumeinak üng dämduh pängki veia pumngyam mah akba kami ngthukhyüki. Ahina pumngyam cun khawmdek upkiea asäng üng khyük be theikia khawmdek pumngyam am ni. Khawmdek am a ngtün law ham üngka naw mi hlüngtainak vaia axü päng, acun cun khyang üngka naw ngthupkia Pamhnam pumngyam ni kami sang ta. Acun cun hina khawmdek upkie naw am ksing u, ami ksing vai sü ta hlüngtainaka Bawipa kutlamktung üng am ami taih vai sü. 3
“Mik üng am hmuh, hnga üng am ngjak,
nghngicima mlung üng am lutki,
Pamhnam naw ani mhläkphyanakiea phäha a pitpyang ni” tia Cangcim naw pyenki. 4
Mimi cun, acuna ngthu Pamhnama Ngmüimkhya naw jah ksingsaki ni. Ngmüimkhya naw avan naküt cun suihjap lü, Pamhnama ngthupkia nümnak pi ksing theiki. Mi Ngmüimkhya naw ni, mi mäta mawng a ksing. Acuna mäiha Pamhnama Ngmüimkhya naw ni Pamhnama mawng a ksing ta. Acunakyase, khawmdeka ngmüimkhya am mi yaki. Pamhnama a jah pete mi jah ksingnak thei vaia Pamhnama veia ka, Pamhnama Ngmüimkhya mi yahki. 5
Cuna kyalü Ngmüimkhya takie, Ngmüimkhya üng sängki kami jah mtheha kba kami khyübe hin khyanga themnak naw a jah mthei am pyen lü Ngmüimkhya a jah mthei khyübe ni kami pyen. Pamhnama Ngmüimkhya üngkhyüh lawki letsawnge cun Ngmüimkhya am taki naw am doei thei. Ngmüimkhya am taki naw acubange cun akcanga am jah ksing lü i ja pi am jah ngai, isetikyaküng amimi cun Ngmüimkhya lam üng jah msuimsäpa kya se ni. Ngmüimkhya khyang cun naw avana ngthumkhyah theiki, acunsepi, ani cun u naw ngthu am mkhya thei. 6
U naw, Bawipaa mlung ksingki ni?
U naw a dawnak vai mtheh thei khai ni?
Mimi cun Khritawa mlung mi taki.
Source notes (6)
- Footnote Ngthupkia Pamhnama ngthungtak; avang yuknake üng veki Pamhnama saksia mawng.
- Cross-reference Ngs 18:9
- Cross-reference Hesa 64:4
- Footnote lüpi avang yuknake üng veki phäh.
- Footnote Ngmüimkhya takie; am ani üng Ngmüimkhya naw a jah peta khyübe üng.
- Cross-reference Hesa 40:13 (LXX)
Dai Cangcim Kthai. Copyright © 2018 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.