Biblica® सुतंतर समकालीन छत्तीसगढ़ी अनुवाद
भजन-संहिता 9
संगीत के निरदेसक बर। “बेटा के मिरतू” के धुन म दाऊद के एक भजन।
हे यहोवा, मेंह अपन पूरा मन से तोर धनबाद करहूं;
मेंह तोर जम्मो अचरज के काम के बखान करहूं।
मेंह तोर कारन खुस होहूं अऊ आनंद मनाहूं;
हे सर्वोच्च परमेसर, मेंह तोर नांव के महिमा के गीत गाहूं।
मोर बईरीमन पीठ देखाके भागथें;
ओमन ठोकर खाके तोर आघू म नास हो जाथें।
काबरकि तेंह मोर सही नियाय अऊ फैसला करे हस,
तेंह एक धरमी नियायधीस के रूप म सिंघासन म बिराजमान होके नियाय करे हस।
तेंह जाति-जाति के मनखेमन ला फटकारे हस अऊ दुस्टमन के नास करे हस;
तेंह ओमन के नांव ला हमेसा-हमेसा बर मिटा दे हस।
कभू खतम नइं होवइया बिनास मोर बईरीमन ऊपर आ गे हवय,
तेंह ओमन के सहरमन ला गिरा दे हस;
अऊ त अऊ ओमन के सुरता घलो नइं ए।
यहोवा ह सदाकाल बर राज करथे;
ओह अपन सिंघासन ला नियाय बर स्थापित करे हवय।
ओह धरमीपन से संसार के नियाय करथे
अऊ बिगर पखियपात के मनखेमन के मामला निपटाथे।
यहोवा ह दबे-कुचरे मनखेमन बर सरन के जगह
अऊ संकट के बेरा म एक मजबूत गढ़ ए।
जेमन तोर नांव ला जानथें, ओमन तोर ऊपर भरोसा करथें,
काबरकि हे यहोवा, तेंह ओमन ला कभू नइं छोंड़स, जऊन मन तोला खोजथें।
सियोन म बिराजे, यहोवा के महिमा के गीत गावव;
जाति-जाति के मनखेमन के बीच ओकर काम के बखान करव।
काबरकि जऊन ह खून के बदला लेथे, ओह सुरता रखथे;
ओह दुखी मनखे के पुकार ला अनसुना नइं करय।
हे यहोवा, देख, मोर बईरीमन मोला कइसन सतात हवंय!
मोर ऊपर दया कर अऊ मोला मिरतू के दुवार ले हटा,
ताकि मेंह बेटी सियोन के दुवारमन म
तोर परसंसा के बखान करंव,
अऊ उहां तोर करे गय उद्धार ले आनंदित होवंव।
जाति-जाति के मनखेमन ओ खंचवा म गिरे हवंय, जेला ओमन कोड़े रिहिन;
ओमन के गोड़मन ओ फांदा म फंस गे हवंय, जेला ओमन लगाय रिहिन।
यहोवा ह अपन नियाय के काम बर जाने जाथे;
दुस्ट मनखेमन अपन करे गे काम के दुवारा ही फंस जाथें।
दुस्ट मनखेमन खाल्हे अधोलोक म चले जाथें,
अऊ ओ जम्मो जाति के मनखेमन घलो, जेमन परमेसर ला भुला जाथें।
पर परमेसर ह दीन-दुखी ला कभू नइं भूलय;
दुखीमन के आसा कभू नइं टूटय।
हे यहोवा, उठ, मरनहार मनखे ला जय झन पावन दे;
जाति-जाति के मनखेमन के नियाय तोर आघू म होवय।
हे यहोवा, तें ओमन ला डरवा;
जाति-जाति के मनखेमन जानंय कि ओमन सिरिप मरनहार मनखे अंय।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.