भजन-संहिता 77

संगीत के निरदेसक बर। यदूतून के राग म आसाप के एक भजन।

1मेंह मदद बर परमेसर ला पुकारेंव;

मोर बात ला सुने बर मेंह परमेसर ले गोहार पारेंव।

2जब मेंह तकलीफ म रहेंव, त मेंह परभू ला खोजेंव;

रथिया बिगर थके हांथ ला बढ़ांय,

अऊ मोला सांति नइं मिलिस।

3हे परमेसर, मेंह तोला सुरता करेंव अऊ कलहरेंव;

मेंह चिंतन-मनन करेंव, अऊ मोर आतमा ह दुरबल हो गीस।

4तेंह मोर आंखी ला बंद होवन नइं दे;

मोला गोठियाय म बहुंत तकलीफ होवत रिहिस।

5मेंह तइहा जमाना के बारे म सोचेंव,

बहुंत साल पहिले के बारे म;

6मेंह रथिया अपन गीतमन ला सुरता करेंव।

मोर मन ह चिंतन-मनन करिस अऊ मोर आतमा ह पुछिस:

7“का परभू ह हमेसा बर तियाग दीही?

का ओह फेर कभू दया नइं देखाही?

8का ओकर अटूट मया ह हमेसा बर खतम हो गीस?

का ओकर परतिगियां ह हमेसा बर खतम हो गीस?

9का परमेसर ह दयालु होय के बात ला भुला गे हवय?

का ओह गुस्सा होके अपन करूना ला रोक ले हवय?”

10तब मेंह सोचेंव, “मेंह ये अपील करहूं:

ओ सालमन म जब सर्वोच्च परमेसर ह अपन जेवनी हांथ ला बढ़ाईस।

11मेंह यहोवा के काम ला सुरता करहूं;

हव, मेंह बहुंत पहिले के तोर चमतकार के काममन ला सुरता करहूं।

12मेंह तोर जम्मो काम ऊपर बिचार करहूं

अऊ तोर जम्मो बड़े काम ऊपर चिंतन-मनन करहूं।”

13हे परमेसर, तोर रसता ह पबितर ए।

कोन देवता ह हमर परमेसर के सहीं महान ए?

14तेंह ओ परमेसर अस, जऊन ह चमतकार करथे;

तेंह मनखेमन के बीच म अपन सामर्थ देखाथस।

15अपन सक्तिसाली हांथ ले तेंह अपन मनखे,

याकूब अऊ यूसुफ के संतानमन ला छोंड़ाय।

16हे परमेसर, समुंदर ह तोला देखिस,

समुंदर ह तोला देखके छटपटाय लगिस;

समुंदर के गहरई तक उथल-पुथल हो गीस।

17बादर ले बारिस होय लगिस,

अकास म गरजन होय लगिस;

तोर तीरमन आघू-पाछू चले लगिन।

18तोर गरजन ह बवंडर म सुनई दीस,

तोर बिजली ह संसार ला अंजोर कर दीस;

धरती ह थरथराय अऊ कांपे लगिस।

19तोर रसता ह समुंदर म ले होके गीस,

तोर डहार ह गहिरा पानी म ले होके गीस,

हालाकि तोर गोड़ के चिनहांमन नइं दिखिन।

20तेंह मूसा अऊ हारून के दुवारा

अपन मनखेमन के अगुवई एक झुंड के रूप करे।