Biblica® सुतंतर समकालीन छत्तीसगढ़ी अनुवाद
भजन-संहिता 71
हे यहोवा, मेंह तोर सरन म हंव;
मोला कभू लज्जित झन होवन दे।
अपन धरमीपन म मोला बचा अऊ छोंड़ा;
मोर कोति अपन कान लगा अऊ मोर उद्धार कर।
मोर सरन के चट्टान बन,
जिहां में हमेसा जा सकंव;
मोर उद्धार के हुकूम दे,
काबरकि तेंह मोर चट्टान अऊ मोर गढ़ अस।
हे मोर परमेसर, दुस्टमन के हांथ ले मोला छोंड़ा ले,
अऊ ओमन के पकड़ ले मोला छुटकारा दे, जऊन मन दुस्ट अऊ निरदयी अंय।
काबरकि हे परमपरधान यहोवा, तेंह मोर आसा अस,
मोर लइकापन ले ही मेंह तोर ऊपर भरोसा रखे हंव।
जनम ले ही मेंह तोर ऊपर भरोसा रखे हंव;
तेंह मोला मोर दाई के गरभ ले बाहिर लानय।
मेंह हमेसा तोर परसंसा करहूं।
मेंह बहुंते जन बर एक उदाहरन बन गे हंव;
तेंह मोर मजबूत सरन-स्थान अस।
मोर मुहूं ह तोर परसंसा करत नइं थकय,
दिन भर तोर वैभव के गुनगान करत रहिथे।
जब मेंह डोकरा हो जाहूं, त मोला झन छोंड़बे;
जब मेंह निरबल हो जाहूं, त मोला झन तियागबे।
काबरकि मोर बईरीमन मोर बिरूध गोठियाथें;
जऊन मन मोला मार डारे चाहथें, ओमन एक संग सडयंत्र रचत हें।
ओमन कहिथें, “परमेसर ह ओला तियाग दे हवय;
ओकर पीछा करव अऊ ओला पकड़ लव,
काबरकि ओला कोनो नइं बचाही।”
हे मोर परमेसर, मोर ले दूरिहा झन रह;
हे परमेसर, मोर मदद करे बर जल्दी आ।
मोर ऊपर दोस लगइयामन सरम के मारे नास हो जावंय;
जऊन मन मोर हानि करे चाहथें,
ओमन अपमान अऊ कलंक ले भर जावंय।
जहां तक मोर बात ए, मेंह हमेसा आसा रखहूं;
मेंह तोर परसंसा जादा अऊ जादा करहूं।
मेंह अपन मुहूं ले तोर धरमी काम,
अऊ तोर उद्धार के काम के बखान दिन भर करत रहिहूं—
हालाकि मेंह नइं जानंव कि ये जम्मो म कइसे संबंध जोड़े जावय।
हे परमपरधान यहोवा, मेंह आके तोर बड़े काममन के घोसना करहूं;
मेंह तोर धरमी काम, सिरिप तोरेच धरमी काम के घोसना करहूं।
हे परमेसर, तेंह मोला मोर लइकापन ले सिखोवत आय हस,
अऊ आज तक मेंह तोर अद्भूत काम के घोसना करत हंव।
जब मेंह डोकरा हो जावंव अऊ मोर बालमन पक जावंय,
तब भी, हे मोर परमेसर, मोला झन छोंड़बे,
जब तक कि तोर सामर्थ के घोसना अवइया पीढ़ी
अऊ तोर बड़े काम के घोसना ओ जम्मो झन ला नइं कर दंव, जऊन मन अवइया हें।
हे परमेसर, तोर धरमीपन ह अकास तक हबरत हे,
तें, जऊन ह कि बड़े-बड़े काम करे हस।
हे परमेसर, तोर सहीं कोन हे?
हालाकि तेंह मोला बहुंत संकट
अऊ करू चीजमन ला देखाय हस,
पर तेंह मोर जिनगी ला फेर पहिले सहीं कर देबे;
धरती के गहरई ले
तेंह मोला फेर ऊपर ले आबे।
तेंह मोर आदरमान ला बढ़ाबे
अऊ एक बार फेर मोला अराम देबे।
हे मोर परमेसर, मेंह तोर बिसवासयोग्यता बर
बीना बजाके तोर परसंसा के गीत गाहूं;
हे इसरायल के पबितर परमेसर,
मेंह बीना बजाके तोर परसंसा के गीत गाहूं।
मोर मुहूं ह आनंद के मारे चिचियाही
जब मेंह तोर परसंसा के गीत गाहूं—
में, जऊन ला कि तेंह छोंड़ाय हस।
मेंह दिन भर
तोर धरमी काम के बखान करहूं,
काबरकि जऊन मन मोर हानि करे चाहत रिहिन
ओमन लज्जा अऊ घबराहट म पड़े हवंय।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.