भजन-संहिता 69

संगीत के निरदेसक बर। कुमुदिनी के धुन म दाऊद के गीत।

1हे परमेसर, मोला बचा,

काबरकि पानी ह मोर घेंच तक आ गे हवय।

2मेंह चीखला म धंसत जावत हंव,

जिहां मोर गोड़ टेकाय के जगह नइं ए।

मेंह गहिरा पानी म आ गे हवंव;

पानी के बाढ़ म मेंह बुड़त हंव।

3मेंह मदद बर गोहारत थक गे हंव;

मोर गला ह सूख गे हवय।

मोर परमेसर के बाट जोहत,

मोर आंखीमन कमजोर हो गे हवंय।

4जऊन मन बिगर कारन के मोर ले घिन करथें,

ओमन के गनती मोर मुड़ के बाल ले घलो जादा हवय;

बहुंते जन बिगर कारन के मोर बईरी अंय,

जऊन मन कि मोला नास करे के फिराक म हवंय।

जऊन चीज के चोरी मेंह नइं करे हंव,

ओकर भरपई मोर ले करे जावत हे।

5हे परमेसर, तेंह मोर मुरूखता ला जानत हस;

मोर अपराध ह तोर ले छिपे नइं हे।

6हे परभू, सर्वसक्तिमान यहोवा,

जऊन मन तोर ऊपर आसा रखे हवंय

ओमन ला मोर कारन कलंकित झन होना पड़य;

हे इसरायल के परमेसर,

जऊन मन तोर खोज म रहिथें,

ओमन ला मोर कारन लज्जित झन होना पड़य।

7काबरकि तोर हित म मेंह अपमान सहत हंव,

अऊ मोर मुहूं ह सरम के मारे ढंक गे हवय।

8मेंह अपन खुद के परिवार बर परदेसी हो गे हवंव,

अपन खुद के भाई-बहिनी बर अजनबी हो गे हवंव;

9काबरकि तोर घर के धुन ह मोला खावत हे,

अऊ जऊन मन तोर बेजत्ती करथें, ओमन के बेजत्ती ह मोर ऊपर आवत हे।

10जब मेंह रोथंव अऊ उपास करथंव,

त जरूरी ए कि मेंह अपमान सहंव;

11जब मेंह बोरा के कपड़ा1 पहिरथंव,

त मनखेमन मोला हंसी के पात्र बना लेथें।

12जऊन मन सहर के कपाट म बईठथें, ओमन मोर हंसी उड़ाथें,

अऊ मेंह मतवारमन के गीत बन गे हवंव।

13हे यहोवा, तोर अनुग्रह के बेरा म,

मेंह तोर ले पराथना करत हंव;

हे परमेसर, अपन बड़े मया के कारन,

अपन निस्चित उद्धार के संग मोला जबाब दे।

14मोला दलदली चीखला ले बचा ले,

मोला ओमा झन बुड़न दे;

जऊन मन मोर ले घिन करथें, ओमन ले मोला छोंड़ा,

मोला गहिरा पानी ले बचा।

15बाढ़ के पानी म मोला झन बुड़न दे

या पानी के गहरई म मेंह झन चले जावंव

या खंचवा म मेंह झन समा जावंव।

16हे यहोवा, अपन मया के भलई के कारन मोला जबाब दे;

अपन बड़े दया के कारन मोर कोति देख।

17अपन सेवक ले मुहूं झन मोड़;

मोला जल्दी करके जबाब दे, काबरकि मेंह संकट म हवंव।

18मोर लकठा म आके मोला बचा ले;

मोर बईरीमन के कारन मोला छोंड़ा ले।

19तेंह जानत हस कि मोर कइसे अपमान करे जाथे,

मोला तुछ समझे जाथे अऊ मोला लज्जित करे जाथे;

मोर जम्मो बईरीमन तोर आघू म हवंय।

20अपमान ह मोर हिरदय ला टोर दे हवय

अऊ मेंह बेसहारा छोंड़ देय गे हवंव;

मोला सहानुभूति के जरूरत हे, पर सहानुभूति देवइया कोनो नइं एं,

मोला सांति देवइया के जरूरत हे, पर मोला कोनो नइं मिलिस।

21ओमन मोर जेवन म पित्त मिला दीन

अऊ मोर पीयास बुझाय बर मोला सिरका पीये बर दीन।

22ओमन के जेवनार ह ओमन के बिनास के कारन बनय;

ओमन के संगति करई ह ओमन के फंसे के जाल बन जावय।

23ओमन के आंखी म अंधियार छा जावय, ताकि ओमन झन देख सकंय,

अऊ ओमन के कनिहां ह हमेसा बर मुड़ जावय।

24अपन कोप ला ओमन ऊपर ढार दे;

तोर भयंकर कोरोध ओमन ऊपर पड़य।

25ओमन के जगह ह खाली हो जावय;

ओमन के डेरा म रहइया कोनो झन होवंय।

26काबरकि ओमन ओ मनखेमन ला सताथें, जेमन ला तेंह घायल करथस

अऊ जेमन ला तेंह चोट पहुंचाथस, ओमन के पीरा के बारे म गोठियाथें।

27ओमन के ऊपर भारी दोस लगा;

ओमन ला तोर उद्धार म भागी झन होवन दे।

28ओमन के नांव जिनगी के किताब ले मिटा दिये जावंय

अऊ ओमन के नांव धरमीमन के संग झन लिखे जावय।

29पर जहां तक मोर बात ए, मेंह दुखित अऊ पीड़ित हंव—

हे परमेसर, तोर उद्धार ह मोला बचावय।

30मेंह गीत गाके परमेसर के नांव के परसंसा करहूं

अऊ धनबाद के संग ओकर महिमा करहूं।

31ये बात ले यहोवा ह बईला के बलिदान ले जादा,

या सींग अऊ खुरवाले बईला के बलिदान ले जादा खुस होही।

32गरीबमन देखहीं अऊ खुस होहीं—

तुमन, जेमन कि परमेसर के खोज म रहिथव, तुम्हर मन ह तरो-ताजा रहय!

33यहोवा ह जरूरतमंद के बात ला सुनथे

अऊ अपन बंधुवा मनखेमन ला तुछ नइं समझे।

34अकास अऊ धरती ओकर परसंसा करंय,

समुंदर अऊ ओमा के जम्मो चलत-फिरत जीव घलो परसंसा करंय,

35काबरकि परमेसर ह सियोन ला बचाही

अऊ यहूदा के सहरमन ला फेर बनाही।

मनखेमन उहां बस जाहीं अऊ ओला अधिकार म ले लीहीं;

36ओकर सेवकमन के लइकामन ओला उत्तराधिकार म पाहीं,

अऊ जऊन मन ओकर नांव ले मया रखथें, ओमन उहां निवास करहीं।