Biblica® सुतंतर समकालीन छत्तीसगढ़ी अनुवाद
भजन-संहिता 61
संगीत निरदेसक बर। तारवाले बाजामन के संग दाऊद के भजन।
हे परमेसर, मोर पुकार ला सुन;
मोर पराथना ला सुन।
धरती के छोर ले मेंह तोला पुकारत हंव,
तोला पुकारत-पुकारत मोर मन ह दुरबल होवथे;
मोला ओ चट्टान ऊपर ले जा, जऊन ह मोर ले ऊंच हे।
काबरकि तेंह मोर सरन-स्थान ठहिरे हस,
अऊ बईरीमन के बिरूध एक मजबूत दीवार अस।
मेंह लालसा करथंव कि तोर डेरा म हमेसा बर रहंव
अऊ तोर डेनामन के छइहां म सरन लेवंव।
हे परमेसर, तेंह मोर मन्नतमन ला सुने हस;
तेंह मोला ओमन के कुल-परंपरा ला दे हस; जऊन मन तोर नांव के भय मानथें।
राजा के उमर ला बढ़ा,
पीढ़ी-पीढ़ी तक ओकर उमर ला बढ़ा दे।
परमेसर के उपस्थिति म ओह हमेसा सिंघासन म बईठय;
ओकर रकछा म अपन मया अऊ बिसवासयोग्यता ला बनाय रख।
तब मेंह हमेसा तोर नांव के परसंसा करहूं
अऊ दिन-प्रतिदिन अपन मन्नतमन ला पूरा करहूं।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.