Biblica® सुतंतर समकालीन छत्तीसगढ़ी अनुवाद
भजन-संहिता 6
संगीत के निरदेसक बर। तारवाले बाजामन के संग। सेमिनित के मुताबिक। दाऊद के एक भजन।
हे यहोवा, अपन गुस्सा म मोला झन फटकार
या अपन कोप म मोर ताड़ना झन कर।
हे यहोवा मोर ऊपर दया कर, काबरकि मेंह दुरबल हो गे हंव;
हे यहोवा, मोर बेमारी ला बने कर दे, काबरकि मोर हाड़ामन म पीरा हवय।
मोर परान ह अब्बड़ पीरा म हवय।
हे यहोवा, कब तक, कब तक ठहिरे रहिबे?
हे यहोवा, किंदरके मोला छुड़ा;
अपन बहुंते मया के कारन मोला बचा।
मरे मनखेमन के बीच कोनो तोर नांव के परचार नइं करंय।
कबर ले कोन ह तोर इस्तुति करथे?
मेंह कराहत-कराहत थक गे हंव।
पूरा रथिया रोवत-रोवत मोर दसना ह भीग जाथे
अऊ मोर आंसू ले मोर पलंग ह भीग जाथे।
मोर आंखीमन दुख के मारे कमजोर होवत हें;
मोर जम्मो बईरीमन के कारन ओमन धुंधला गे हवंय।
हे जम्मो दुस्ट काम करइयामन, मोर ले दूरिहा हटव,
काबरकि यहोवा ह मोर रोये के अवाज ला सुने हवय।
यहोवा ह दया बर मोर रोवई ला सुने हवय;
यहोवा ह मोर पराथना ला गरहन करथे।
मोर जम्मो बईरीमन लाज अऊ पीरा के मारे घबराहीं;
ओमन पाछू मुड़हीं अऊ अचानक लज्जित होहीं।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.