भजन-संहिता 41

संगीत के निरदेसक बर दाऊद के एक भजन।

1धइन अंय ओमन, जऊन मन कमजोर मनखे के सुधि लेथें;

यहोवा ह संकट के बेरा म ओमन ला बचाथे।

2यहोवा ह ओमन ला बचाथे अऊ ओमन ला संभाले रखथे—

देस म ओमन के गनती आसीसित मनखेमन के बीच होथे—

ओह ओमन ला ओमन के बईरीमन के ईछा म नइं छोंड़य।

3जब ओमन बेमार होके बिस्तर म पड़े रहिथें, त यहोवा ह ओमन ला संभालथे

अऊ ओमन ला ठीक करके बेमारी के बिस्तर ले ठाढ़ करथे।

4मेंह कहेंव, “हे यहोवा, मोर ऊपर दया कर;

मोला चंगा कर, काबरकि मेंह तोर बिरूध पाप करे हंव।”

5मोर बईरीमन मोर बुरई करके कहिथें,

“ओह कब मरही अऊ ओकर नांव ह मिटाही?”

6जब ओमन ले कोनो मोला देखे बर आथे,

त ओह लबारी बात कहिथे, अऊ अपन मन म बदनामी के बात ला रखथे;

तब ओह बाहिर जाथे अऊ ओ बात ला फईलाथे।

7मोर जम्मो बईरीमन एक संग मोर बिरूध म कानाफूसी करथें;

ओमन ये कहिके मोर बिरूध खराप कल्पना करथें,

8“ओला एक खराप बेमारी हो गे हवय;

ओह ओ जगह ले कभू उठ नइं सकय, जिहां ओह पड़े हवय।”

9अऊ त अऊ मोर खास संगी,

जेकर ऊपर मेंह भरोसा करत रहंय,

जऊन ह मोर संग खाना खावत रिहिस,

ओह मोर बिरूध हो गे हवय।

10पर हे यहोवा, तेंह मोर ऊपर दया कर;

मोला उठा कि मेंह ओमन ले बदला ले सकंव।

11मेंह जानत हंव कि तेंह मोर ले खुस हवस,

काबरकि मोर बईरीमन मोर ऊपर जय नइं पावथें।

12मोर ईमानदारी के कारन तेंह मोला संभाले रखथस

अऊ हमेसा बर मोला अपन आघू म रखथस।

13यहोवा, इसरायल के परमेसर के परसंसा

आदि ले अनंतकाल तक होवत रहय।

आमीन अऊ आमीन।