Biblica® सुतंतर समकालीन छत्तीसगढ़ी अनुवाद
भजन-संहिता 4
संगीत के निरदेसक बर। तारवाले बाजामन के संग। दाऊद के एक भजन।
हे मोर धरमी परमेसर,
जब मेंह तोला बलावंव, त तेंह मोला जबाब दे।
मोला मोर बिपत्ति म सहारा दे;
मोर ऊपर दया कर अऊ मोर पराथना ला सुन।
हे मनखेमन! तुमन कब तक मोर महिमा के बेजत्ती करत रहिहू?
तुमन कब तक भरम ले मया करत रहिहू अऊ लबरा देवतामन के खोज म रहिहू?
तुमन जान लव कि यहोवा ह अपन बिसवासयोग्य सेवक ला अपन बर अलग रखे हवय;
जब मेंह यहोवा ला पुकारथंव, त ओह मोर बात ला सुनथे।
कांपत रहव अऊ1 पाप झन करव;
जब तुमन अपन दसना म रहिथव,
त अपन मन ला जांचव अऊ चुप रहव।
धरमीपन के बलिदान चघावव
अऊ यहोवा ऊपर भरोसा रखव।
बहुंते जन पुछत हवंय, “कोन ह हमर उन्नति करही?”
हे यहोवा, तोर मुख के अंजोर हमर ऊपर चमका।
जब ओमन के अनाज अऊ नवां अंगूर के मंद बहुंत होथे,
त तेंह मोर मन ला आनंद ले भर दे।
सांति से मेंह लेटहूं अऊ सुतहूं,
काबरकि हे यहोवा, तेंहीच ह
मोला सुरकछा म रखथस।
Source notes (1)
- Footnote या गुस्सा होके
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.