Biblica® सुतंतर समकालीन छत्तीसगढ़ी अनुवाद
भजन-संहिता 36
संगीत के निरदेसक बर यहोवा के सेवक दाऊद के एक भजन।
दुस्ट मनखेमन के दुस्टता के बारे
मोर हिरदय म एक ठन संदेस हवय:
ओमन के आंखी के आघू म
परमेसर के कोनो डर नइं ए।
ओमन खुद ही अपनआप के अतेक बड़ई करथें
कि ओमन अपन पाप ला जानंय नइं या ओकर ले घिन नइं करंय।
ओमन के मुहूं ले बुरई अऊ धोखा के बात निकलथे;
ओमन बुद्धिमानी के काम या भलई के काम नइं करंय।
अऊ त अऊ ओमन अपन दसना म घलो सडयंत्र रचथें;
ओमन अपनआप ला पाप के काम करे बर सऊंप देथें
अऊ खराप काम करे बर मना नइं करंय।
हे यहोवा, तोर मया ह स्वरग तक,
अऊ तोर बिसवासयोग्यता ह अकास तक पहुंचथे।
तोर धरमीपन ह सबले ऊंच पहाड़ सहीं अय,
अऊ तोर नियाय ह समुंदर के गहरई सहीं अय।
हे यहोवा, तेंह मनखे अऊ पसु दूनों के देखरेख करथस।
हे परमेसर, तोर अब्बड़ मया ह अनमोल ए!
मनखेमन तोर डेना के छइहां म सरन लेथें।
ओमन तोर घर के भरे भंडार म ले जेवनार करथें;
तेंह अपन खुसी के नदी म ले ओमन ला पीये बर देथस।
काबरकि तोरेच करा जिनगी के पानी के सोत हवय;
तोरेच अंजोर म हमन अंजोर देखथन।
जऊन मन तोला जानथें, ओमन ऊपर अपन मया,
अऊ मन के सीधवा मनखे ऊपर अपन धरमीपन ला बनाय रख।
घमंडी ह मोर ऊपर लात झन उठाय,
अऊ न ही दुस्ट मनखे मोला अपन हांथ ले भगाय।
देखव, दुस्ट काम करइयामन कइसने गिरे-परे हवंय—
अइसने फटिक दिये गे हवंय कि ओमन अब उठ नइं सकत हवंय!
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.