Biblica® सुतंतर समकालीन छत्तीसगढ़ी अनुवाद
भजन-संहिता 24
दाऊद के एक भजन।
धरती अऊ येमा के हर एक चीज यहोवा के अय,
संसार, अऊ ओ जम्मो जेमन येमा रहिथें;
काबरकि ओह एकर नीव समुंदरमन के ऊपर रखिस
अऊ पानी के ऊपर येला इस्थिर करिस।
यहोवा के पहाड़ ऊपर कोन चढ़ सकत हे?
ओकर पबितर स्थान म कोन ठाढ़ हो सकत हे?
ओह, जेकर काम सही अऊ हिरदय सुध हवय,
जऊन ह मूरती ऊपर भरोसा नइं करय
या लबरा ईस्वर के सपथ नइं खावय।
ओह यहोवा ले आसीस पाही
अऊ ओला अपन उद्धार करइया परमेसर ले सुरकछा मिलही।
अइसने ही होथे ओमन के पीढ़ी, जऊन मन परमेसर के खोज करथें,
हे याकूब के परमेसर, जऊन मन तोर दरसन के खोज म रहिथें।
हे दुवारमन, अपन मुड़ ला ऊंचा करव;
हे पुराना जमाना के कपाटमन, ऊपर उठव,
ताकि महिमा के राजा ह भीतर आवय।
ये महिमा के राजा कोन ए?
यहोवा, जऊन ह बलवान अऊ सक्तिसाली ए,
यहोवा, जऊन ह लड़ई म सक्तिसाली ए।
हे दुवारमन, अपन मुड़ ला ऊंचा करव;
हे पुराना जमाना के कपाटमन, ऊपर उठव,
ताकि महिमा के राजा ह भीतर आवय।
ये महिमा के राजा कोन ए?
सर्वसक्तिमान यहोवा—
ओह महिमा के राजा अय।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.