Biblica® सुतंतर समकालीन छत्तीसगढ़ी अनुवाद
भजन-संहिता 146
यहोवा के परसंसा करव।
हे मोर मन, यहोवा के परसंसा कर।
मेंह जिनगी भर यहोवा के परसंसा करहूं,
जब तक मेंह जीयत रहिहूं, मेंह अपन परमेसर के परसंसा के गीत गाहूं।
हाकिममन ऊपर भरोसा झन रखव,
न ही कोनो मनखे ऊपर, जऊन ह कि रकछा नइं कर सकय।
जब ओमन के परान चले जाथे, त ओमन माटी म मिल जाथें;
ओहीच दिन ओमन के योजना ह खतम हो जाथे।
धइन अंय ओमन, जेमन के मददगार याकूब के परमेसर ए,
जेमन के आसा ह यहोवा ओमन के परमेसर ऊपर रहिथे।
ओह अकास अऊ धरती, समुंदर,
अऊ ओमा के जम्मो चीजमन ला रचे हवय—
ओह हमेसा बिसवासयोग्य बने रहिथे।
ओह दुखित-पीड़ितमन के नियाय करथे
अऊ भूखन मनखेमन ला जेवन देथे।
यहोवा ह कैदीमन ला छुड़ाथे,
यहोवा ह अंधरा ला आंखी देथे,
यहोवा ह ओमन ला ऊपर उठाथे, जऊन मन खाल्हे झुकथें,
यहोवा ह धरमीमन ले मया करथे।
यहोवा ह परदेसीमन के रखवारी करथे
अऊ अनाथ अऊ बिधवामन ला संभालथे,
पर ओह दुस्टमन के योजना ला बिगाड़ देथे।
यहोवा ह सदा-सर्वदा राज करथे,
हे सियोन, तोर परमेसर ह पीढ़ी-पीढ़ी तक राज करथे।
यहोवा के परसंसा करव।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.