भजन-संहिता 144

दाऊद के भजन।

1यहोवा, जऊन ह मोर चट्टान ए, ओकर परसंसा होवय,

जऊन ह मोर हांथ अऊ मोर अंगरीमन ला

लड़ई करे बर तियार करथे।

2ओह मोर मयारू परमेसर अऊ मोर किला,

मोर मजबूत गढ़ अऊ मोर छुड़ानेवाला,

मोर ढाल ए, जेमा मेंह सरन लेथंव,

जऊन ह मनखेमन1 ला मोर अधीन कर देथे।

3हे यहोवा, मनखेमन का अंय कि तेंह ओमन के खियाल रखथस?

ओमन सिरिप मरनहार मनखे अंय, जेमन के बारे म तेंह सोचथस।

4ओमन तो सांस के सहीं अंय;

ओमन के उमर ह ढरत छइहां सहीं अय।

5हे यहोवा, अपन स्वरग ला खाल्हे करके उतर आ;

पहाड़मन ला छू, ताकि ओमन ले धुआं निकलय।

6बिजली कड़काके बईरी ला तितिर-बितिर कर दे;

अपन तीर चला अऊ ओमन ला हराके भगा दे।

7ऊंच स्थान ले अपन हांथ बढ़ा;

भयंकर पानी ले

अऊ ओ परदेसीमन के हांथ ले

मोला छोंड़ा अऊ मोला बचा,

8जेमन के मुहूं ले बहुंत लबारी बात निकलथे,

जेमन के जेवनी हांथ ह धोखा के काम करथे।

9हे मोर परमेसर, मेंह तोर बर एक नवां गीत गाहूं;

दस तारवाले बीना ला मेंह तोर बर बजाहूं,

10तें, जऊन ह कि राजामन ला जय देथस,

जऊन ह कि अपन सेवक दाऊद ला छोंड़ाथस।

धारवाले तलवार ले मोला बचा;

11परदेसीमन के हांथ ले मोला बचा

जेमन के मुहूं ले बहुंत लबारी बात निकलथे,

जेमन के जेवनी हांथ ह धोखा के काम करथे।

12तब हमर बेटामन अपन जवानी म

बढ़िया बढ़े हुए पऊधामन सहीं होहीं,

अऊ हमर बेटीमन ओ खंभामन सहीं होहीं

जेला महल के सजावट म नक्कासी करे जाथे।

13हमर कोठारमन हर किसम के

अनाज ले भरे रहिहीं।

हमर भेड़मन हमर मैदान म हजार के संखिया,

दस हजार के संखिया म बढ़हीं;

14हमर बईलामन भारी सामान खींचके ले जाहीं।2

दीवार म कोनो किसम के सेंध नइं लगही,

कोनो बंधुवई म नइं जाही,

हमर गलीमन म दुख के कोनो अवाज नइं होही।

15धइन अंय ओ मनखेमन, जेमन बर ये बात सही ए;

धइन अंय ओ मनखेमन, जेमन के परमेसर यहोवा ए।