Biblica® सुतंतर समकालीन छत्तीसगढ़ी अनुवाद
भजन-संहिता 116
मेंह यहोवा ले मया करथंव, काबरकि ओह मोर बात ला सुनिस;
ओह दया के मोर पुकार ला सुनिस।
काबरकि ओह मोर कोति अपन कान लगाईस,
एकरसेति मेंह अपन जिनगी भर ओला पुकारहूं।
मिरतू के डोर म मेंह फंस गेंव,
कबर के पीरा ह मोर ऊपर आ गीस;
मेंह दुख अऊ पीरा म पड़े रहेंव।
तब मेंह यहोवा के नांव ले पराथना करेंव:
“हे यहोवा, मोला बचा!”
यहोवा ह अनुग्रहकारी अऊ धरमी अय;
हमर परमेसर ह दया ले भरे हवय।
यहोवा ह सीधा-साधा मनखे के रकछा करथे;
जब मोर बेजत्ती करे गीस, त ओह मोला बचाईस।
हे मोर परान, अपन बिसराम-स्थान म लहुंट आ,
काबरकि यहोवा ह तोर भलई करे हवय।
हे यहोवा, तेंह मोला मिरतू ले,
मोर आंखीमन ला आंसू बहाय ले,
मोर गोड़मन ला ठोकर खाय ले बचाय हस,
ताकि मेंह यहोवा के आघू म
जीयत परानीमन के लोक म चलंव।
मेंह यहोवा ऊपर भरोसा रखेंव, जब मेंह ये कहेंव,
“मेंह बहुंत दुखित हंव”;
मेंह अपन बेचैनी म कहेंव,
“जम्मो मनखेमन लबरा अंय।”
यहोवा ह जतेक भलई मोर बर करे हवय,
ओ जम्मो के बदले मेंह ओला का दंव?
मेंह उद्धार के कटोरा ला ऊपर उठाहूं
अऊ यहोवा के नांव ला पुकारहूं।
यहोवा के जम्मो मनखेमन के आघू म
मेंह ओकर बर करे गय अपन मन्नत ला पूरा करहूं।
यहोवा के बिसवासयोग्य सेवकमन के मिरतू ह
ओकर नजर म अनमोल अय।
हे यहोवा, सही म मेंह तोर सेवक अंव;
मेंह तोर सेवा वइसे करथंव, जइसे मोर दाई ह करिस;
तेंह मोला मोर बंधना ले छोंड़ाय हस।
मेंह तोला धनबाद-बलिदान चघाहूं
अऊ यहोवा के नांव ले पराथना करहूं।
यहोवा के जम्मो मनखेमन के आघू म
मेंह ओकर बर करे गय अपन मन्नत ला पूरा करहूं।
हे यरूसलेम, तोर बीच म,
यहोवा के घर के अंगनामन म अपन मन्नत ला पूरा करहूं।
यहोवा के परसंसा करव।1
Source notes (1)
- Footnote इबरानी म हलिलूयाह
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.