Biblica® सुतंतर समकालीन छत्तीसगढ़ी अनुवाद
भजन-संहिता 114
जब इसरायलीमन मिसर देस ले बाहिर निकलिन,
जब याकूब के बंसजमन आने भासा के मनखेमन के बीच ले बाहिर आईन,
तब यहूदा ह परमेसर के पबितर-स्थान,
अऊ इसरायल ह ओकर राज बन गीस।
समुंदर ह देखके भाग गीस,
यरदन नदी उल्टा दिग म बहे लगिस;
पहाड़मन मेढ़ामन सहीं,
अऊ पहाड़ीमन मेढ़ा-पीलामन सहीं उछले-कूदे लगिन।
हे समुंदर, का होईस कि तेंह भाग गय?
अऊ हे यरदन, तेंह काबर उल्टा बहे लगय?
हे पहाड़मन, तुमन काबर मेढ़ामन सहीं,
अऊ हे पहाड़ीमन, तुमन काबर मेढ़ा-पीलामन सहीं उछले-कूदे लगेव?
हे धरती, परभू के आघू म,
याकूब के परमेसर के आघू म कांप,
जऊन ह चट्टान ला पानी के कुंड,
अऊ कठोर पथरा ला पानी के सोता म बदल दीस।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.