Biblica® सुतंतर समकालीन छत्तीसगढ़ी अनुवाद
भजन-संहिता 109
संगीत के निरदेसक बर दाऊद के एक भजन।
हे मोर परमेसर, तें जेकर मेंह परसंसा करथंव,
चुपेचाप झन रह,
काबरकि दुस्ट अऊ धोखा देवइया मनखेमन
मोर बिरूध म गोठियावत हवंय;
ओमन मोर बिरूध लबारी बात कहत हवंय।
घिनौना बचन ले ओमन मोला घेरत हवंय;
ओमन बिगर कारन के मोर ऊपर हमला करथें।
ओमन के संग मेंह संगी के बरताव करंय, पर बदला म ओमन मोर ऊपर दोस लगावत हें,
पर मेंह पराथना करत रहइया मनखे अंव।
ओमन मोर भलई के बदले मोर संग बुरई करथें,
अऊ संगी बरताव के बदले मोर ले घिन करथें।
मोर बईरी के बिरोध करे बर कोनो दुस्ट मनखे ला ठहिरा दे;
ओकर जेवनी हांथ कोति एक दोस लगइया ठाढ़ होवय।
जब ओकर नियाय करे जावय, त ओह अपराधी ठहिरय,
अऊ पराथनामन ओला दोसी ठहिरावंय।
ओकर उमर ह थोरकन दिन के होवय;
ओकर अगुवई के पद ला कोनो अऊ ले लेवय।
ओकर लइकामन अनाथ हो जावंय
अऊ ओकर घरवाली ह बिधवा हो जावय।
ओकर लइकामन एती-ओती घुमत भिखारी हो जावंय;
ओमन ला ओमन के उजाड़ घर ले भगा दिये जावय।
साहूकार ह ओकर जम्मो चीज ला जपत कर ले;
अजनबीमन ओकर मेहनत के फर ला लूट लेवंय।
ओकर ऊपर कोनो दया झन देखावय
या ओकर अनाथ लइकामन ऊपर तरस झन खावय।
ओकर संतानमन खतम हो जावंय,
अगला पीढ़ी ले ओमन के नामोनिसान मिट जावय।
यहोवा के आघू म ओकर पुरखामन के दुस्टता ला लाने जावय;
ओकर दाई के पाप ला कभू झन मिटाय जावय।
ओमन के पापमन यहोवा के आघू म हमेसा बने रहंय,
ताकि ओह ओमन के नांव धरती ले मिटा देवय।
काबरकि ओ दुस्ट ह कभू दया करे के बात नइं सोचिस,
पर गरीब अऊ जरूरतमंद अऊ दुखी मनखेमन ला
पीछा करके मार डारिस।
सराप देवई ओला बहुंत बने लगिस—
ओ सराप ह लहुंटके ओहीच ला लगय।
ओला आसीस म कोनो खुसी नइं मिलिस—
येह ओकर ले बहुंत दूरिहा रहय।
सराप देवई ओकर बर कपड़ा पहिरे सहीं हो गीस;
येह ओकर देहें म पानी हमाय सहीं,
अऊ ओकर हाड़ामन म तेल सहीं हो गीस।
येह ओकर देहें म ओढ़ना ओढ़े सहीं,
अऊ ओकर कनिहां म हमेसा एक कमरपट्टा बांधे सहीं होवय।
मोर ऊपर दोस लगइयामन ला, मोर बुरई करइयामन ला
यहोवा ले येहीच बदला मिलय।
पर हे परमपरधान यहोवा,
अपन नांव के हित म मोर मदद कर;
अपन मया के भलई के कारन मोला छुटकारा दे।
काबरकि मेंह गरीब अऊ जरूरतमंद अंव,
अऊ मोर भीतर म मोर हिरदय ला चोट लगे हवय।
मेंह सांझ के छइहां सहीं खतम होवत हंव;
मोला फांफा सहीं झटकार दिये गे हवय।
उपास करत मोर माड़ीमन दुरबल होवत हें;
मोर देहें ह पातर अऊ कमजोर हो गे हवय।
मेंह अपन दोस लगइयामन बर हंसी के पात्र हो गे हवंव;
जब ओमन मोला देखथें, त ओमन अपन मुड़ हलाथें।
हे यहोवा मोर परमेसर, मोर मदद कर;
अपन अटूट मया के मुताबिक मोर उद्धार कर।
ओमन जानंय कि एकर पाछू तोर हांथ हवय,
अऊ ये कि हे यहोवा, येला तेंह करे हस।
जब ओमन सराप देवंय, त तें आसीस दे;
जऊन मन मोर ऊपर हमला करथें, ओमन सरमिंदा होवंय,
पर तोर सेवक ह आनंद मनावय।
मोर ऊपर दोस लगइयामन ला कलंक के कपड़ा पहिराय जावय
अऊ ओढ़ना लपेटे सहीं ओमन लज्जा म लपेटे जावंय।
अपन मुहूं ले मेंह यहोवा के बहुंत धनबाद करहूं;
अराधना करइयामन के बड़े भीड़ म मेंह ओकर परसंसा करहूं।
काबरकि ओह जरूरतमंद के जेवनी हांथ कोति ठाढ़ होथे,
ताकि ओह ओमन के जिनगी ला ओमन ले बचावय, जेमन ओमन ला अपराधी ठहिराहीं।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.