भजन-संहिता 102

एक दुखित मनखे के पराथना, जऊन ह कमजोर हो गे हवय अऊ यहोवा के आघू म खुलके अपन मन के दुख ला रखत हे।

1हे यहोवा, मोर पराथना ला सुन;

मदद बर मोर गोहार ह तोर तक हबरय।

2जब मेंह दुखित हंव,

त अपन मुहूं ला मोर ले झन छिपा।

अपन कान ला मोर कोति कर;

जब मेंह पुकारंव, जल्दी से मोला जबाब दे।

3काबरकि मोर जिनगी के समय ह धुआं के सहीं खतम होवत हे;

मोर हाड़ामन दहकत अंगरा सहीं बरत हें।

4मोर हिरदय म रोग लगे हे अऊ कांदी सहीं मुरझा गे हवय;

मेंह अपन जेवन जे बर भुला जाथंव।

5अपन पीरा म मेंह जोर-जोर से कलहरत हंव

अऊ सूखके चमड़ी अऊ हाड़ा हो गे हवंव।

6मेंह सुन्ना जगह के एक उल्लू अंव,

खंडहर म रहइया एक उल्लू सहीं अंव।

7मेंह पड़े-पड़े जागत रहिथंव; मेंह छानी म

अकेला बईठे एक चिरई सहीं हो गे हवंव।

8दिन भर मोर बईरीमन मोला ताना मारत रहिथें;

जऊन मन मोला ताना मारथें, ओमन मोर नांव के उपयोग सराप दे बर करथें।

9काबरकि राख ला मेंह खाना के रूप म खाथंव

अऊ आंसू ला मिलाके पानी पीथंव

10येह तोर बड़े कोप के कारन होय हवय,

काबरकि तेंह मोला उठाके अलग फटिक दे हस।

11मोर उमर ह संझा के ढरत छइहां के सहीं अय;

मेंह कांदी के सहीं अइला जाथंव।

12पर हे यहोवा, तेंह सदाकाल बर बिराजमान हस;

तोर खियाती जम्मो पीढ़ी तक बने रहिथे।

13तेंह उठबे अऊ सियोन ऊपर दया करबे,

काबरकि येह ओकर ऊपर किरपा करे के समय ए;

ठहिराय गे समय ह आ गे हवय।

14काबरकि ओकर पथरामन तोर सेवकमन बर मयारू अंय;

ओकर धुर्रा ला ही देखके ओमन के मन म दया के भाव आ जाथे।

15जाति-जाति के मनखेमन यहोवा के नांव के भय मानहीं,

धरती के जम्मो राजामन तोर महिमा के आघू म मुड़ नवाहीं।

16काबरकि यहोवा ह सियोन ला फेर बनाही

अऊ अपन महिमा म परगट होही।

17ओह गरीब-लाचार के पराथना के जबाब दीही;

ओह ओमन के बिनती ला तुछ नइं समझय।

18येला अवइया पीढ़ी के मनखेमन बर लिखे जावय,

ताकि ओ मनखे, जेमन अभी सिरजे नइं गे हवंय, ओमन यहोवा के इस्तुति करंय:

19“यहोवा ह अपन ऊंच पबितर-स्थान ले खाल्हे देखिस,

स्वरग ले ओह धरती ला देखिस,

20ताकि कैदीमन के कलहरई ला सुनय

अऊ मिरतू-दंड पाय मनखेमन ला छुड़ावय।”

21ताकि जब देस-देस अऊ राज-राज के मनखेमन

यहोवा के अराधना करे बर जूरंय,

22त सियोन म यहोवा के नांव के घोसना

अऊ यरूसलेम म ओकर परसंसा होवय।

23मोर जिनगी के यातरा म, ओह मोर बल ला टोर दीस;

ओह मोर उमर ला घटा दीस।

24एकरसेति मेंह कहेंव:

“हे मोर परमेसर, मोर जिनगी के बीच म ले मोला झन उठा ले;

तोर जिनगी ह तो जम्मो पीढ़ी तक बने रहिथे।

25सुरूआत म तेंह धरती के नीव रखे,

अऊ अकास ह तोर हांथ के दुवारा बनाय गे हवय।

26ओमन तो नास हो जाहीं, पर तेंह बने रहिबे;

ओमन जम्मो पहिरे के कपड़ा के सहीं जुन्ना हो जाहीं।

कपड़ा के सहीं तेंह ओमन ला बदल देबे

अऊ ओमन तियाग दिये जाहीं।

27पर तेंह वइसनेच के वइसने रहिथस,

अऊ तोर उमर ह कभू खतम नइं होवय।

28तोर सेवक के लइकामन तोर आघू म रहिहीं;

ओमन के संतान तोर आघू म स्थापित करे जाहीं।”