नीतिबचन 10

सुलेमान राजा के नीतिबचन

1सुलेमान के नीतिबचन:

बुद्धिमान बेटा ले ओकर ददा ह खुस होथे,

पर मुरूख बेटा ह अपन दाई ऊपर दुख लानथे।

2बेईमानी ले कमाय धन ले लाभ नइं होवय,

पर मनखे के धरमीपन ह ओला मिरतू ले बचाथे।

3यहोवा ह धरमी मनखे ला भूखा रहन नइं देवय,

पर ओह दुस्ट मनखे के ईछा ला पूरा होवन नइं देवय।

4काम म ढिलई करइया मनखे गरीब हो जाथे,

पर मेहनती मनखे धनी होथे।

5गरमी के महिना म जऊन ह फसल ला संकेलथे, ओह बुद्धिमान बेटा ए,

पर जऊन ह फसल लुवई के बेरा सुतत रहिथे, ओह कलंकित बेटा ए।

6धरमी मनखे ला बहुंत आसीस मिलथे,

पर दुस्ट मनखे के मुहूं ले बहुंत हिंसा के बात निकलथे।

7धरमी के नांव ह आसीस देय म उपयोग होथे,1

पर दुस्ट के नांव ह मिट जाथे।

8बुद्धिमान ह हिरदय म हुकूम ला गरहन करथे,

पर बकवास करइया मुरूख ह नास हो जाथे।

9जऊन ह ईमानदारी से चलथे, ओह निडर रहिथे,

पर जऊन ह बेईमानी के रसता म चलथे, ओकर पोल खुल जाथे।

10जऊन ह गलत इरादा से आंखी मारथे, ओकर ले दुख मिलथे,

अऊ बकवास करइया मुरूख ह नास हो जाथे।

11धरमी मनखे के मुहूं ले जिनगी के बात निकलथे,

पर दुस्ट मनखे के मुहूं ले हिंसा के बात निकलथे।

12काकरो ले घिन करई ह झगरा ला सुरू करथे,

पर मया ह जम्मो गलती ला ढांप देथे।

13समझदार मनखे के बातचीत म बुद्धि पाय जाथे,

पर निरबुद्धि ला लउठी के मार पड़थे।

14बुद्धिमान ह गियान ला इकट्ठा करथे,

पर मुरूख ह अपन बात के जरिये बिनास लानथे।

15धनवानमन के धन ह ओमन के गढ़वाला सहर होथे,

पर गरीब के गरीबी ह ओकर बिनास के कारन ए।

16धरमी मनखे के मजदूरी जिनगी अय,

पर दुस्ट मनखे के कमई पाप अऊ मिरतू अय।

17जऊन ह अनुसासन ला मानथे, ओह जिनगी के रसता ला देखाथे,

पर जऊन ह अनुसासन ला नइं मानय, ओह दूसरमन ला गलत रसता म ले जाथे।

18जऊन ह लबारी मारके बईरता ला छुपाथे

अऊ दूसर के निन्दा करथे, ओह मुरूख ए।

19जिहां जादा बात होथे, उहां पाप घलो होथे,

पर जऊन ह अपन मुहूं म लगाम लगाथे, ओह बुद्धिमान ए।

20धरमी मनखे के बचन ह उत्तम चांदी सहीं अय,

पर दुस्ट मनखे के बात बहुंत हल्का होथे।

21धरमी मनखे के बात ले बहुंते जन के भलई होथे,

पर मुरूखमन बुद्धि के कमी के कारन मर जाथें।

22यहोवा के आसीस ले धन मिलथे,

ओकर संग ओह दुख नइं देवय।

23मुरूख ला खराप काम करई म खुसी मिलथे,

पर समझदार मनखे बुद्धि के बात म खुस होथे।

24जऊन बात ले दुस्ट मनखे ह डरथे, ओहीच बात ओकर संग होही,

पर धरमी जन के ईछा ला पूरा करे जाही।

25जब बिपत्ति चले जाथे, त ओकर संग दुस्टमन के घलो अन्त हो जाथे,

पर धरमीमन सदा इस्थिर बने रहिथें।

26जइसे दांत बर खट्टई अऊ आंखी बर धुआं होथे,

वइसे आलसी मनखेमन ओमन बर होथें, जऊन मन ओमन ला पठोथें।

27यहोवा के भय माने ले मनखे के उमर ह बढ़थे,

पर दुस्ट मनखे जादा साल तक नइं जीयय।

28धरमी जन ला आसा रखई म आनंद मिलथे,

पर दुस्ट मनखे के आसा टूट जाथे।

29यहोवा के रसता ह निरदोसीमन बर सरन-स्थान ए,

पर जऊन मन दुस्टता करथें, ओमन बर बिनास के जगह ए।

30धरमी जन सदा अटल बने रहिही,

पर दुस्ट मनखे धरती म बने नइं रह सकय।

31धरमी के मुहूं ले बुद्धि के बात निकलथे,

पर बेकार बात करइया के मुहूं ला बंद करे जाही।

32धरमी के मुहूं ले समझदारी के बात निकलथे,

पर दुस्ट मनखे के मुहूं ले सिरिप बेकार के बात निकलथे।