गनती 33

इसरायल के यातरा म पड़ाव

1जब इसरायलीमन मूसा अऊ हारून के अगुवई म दल बना-बनाके मिसर देस ले बाहिर निकलिन, त येमन ओमन के यातरा के पड़ाव रिहिन। 2यहोवा के हुकूम ले मूसा ह ओमन के यातरा के पड़ावमन के लेखा रखिस। पड़ावमन के मुताबिक येह ओमन के यातरा रिहिस:

3पहिला महिना1 के पंदरहवां दिन, याने कि फसह तिहार के बाद दूसर दिन इसरायलीमन रामसेस सहर ले आघू बढ़िन। ओमन जम्मो मिसरीमन के देखत म बड़े निडरता से निकलिन; 4ओ समय मिसरीमन अपन पहिलांतमन ला माटी देवत रिहिन, जेमन ला यहोवा ह मार डारे रिहिस; काबरकि यहोवा ह ओमन के देवतामन ला दंड देय रिहिस।

5इसरायलीमन रामसेस ले चलके सुक्कोत नांव के जगह म डेरा डालिन।

6फेर सुक्कोत ले आघू बढ़के एताम म डेरा डालिन, जऊन ह सुन्ना जगह के तीर म हवय।

7ओमन एताम ले पाछू लहुंटके पी-हाहीरोत गीन, जऊन ह बाल-सपोन के पूरब म हवय, अऊ उहां मिगदोल के लकठा म डेरा डालिन।

8तब ओमन पी-हाहीरोत ले चलके समुंदर ले होवत सुन्ना जगह म आईन, अऊ एताम के सुन्ना जगह म तीन दिन के रसता तय करिन, अऊ मारा नांव के जगह म डेरा डालिन।

9ओमन मारा ले चलके एलीम म आईन, जिहां बारह ठन पानी के सोता अऊ सत्तर ठन खजूर के रूख रिहिन, अऊ ओमन उहां डेरा डालिन।

10ओमन एलीम ले चलके लाल-समुंदर2 के तीर म डेरा डालिन।

11ओमन लाल-समुंदर ले चलके सीन के सुन्ना जगह म डेरा डालिन।

12फेर ओमन सीन के सुन्ना जगह ले दोपका म डेरा डालिन।

13ओमन दोपका ले चलके आलूस म डेरा डालिन।

14फेर ओमन आलूस ले चलके रपीदीम म डेरा डालिन, जिहां मनखेमन के पीये बर पानी नइं रिहिस।

15तब ओमन रपीदीम ले चलके सीनय के सुन्ना जगह म डेरा डालिन।

16फेर ओमन सीनय के सुन्ना जगह ले चलके किबरोत-हतावा म डेरा डालिन।

17तब ओमन किबरोत-हतावा ले चलके हसेरोत म डेरा डालिन।

18फेर ओमन हसेरोत ले चलके रितमा म डेरा डालिन।

19ओमन रितमा ले चलके रिम्मोन-पेरेस म डेरा डालिन।

20ओमन रिम्मोन-पेरेस ले चलके लिबना म डेरा डालिन।

21ओमन लिबना ले चलके रिस्सा म डेरा डालिन।

22ओमन रिस्सा ले चलके कहेलाता म डेरा डालिन।

23तब ओमन कहेलाता ले चलके सेपेर पहाड़ करा डेरा डालिन।

24फेर ओमन सेपेर पहाड़ ले चलके हरादा म डेरा डालिन।

25तब ओमन हरादा ले चलके मखेलोत म डेरा डालिन।

26फेर ओमन मखेलोत ले चलके तहत म डेरा डालिन।

27तब ओमन तहत ले चलके तेरह म डेरा डालिन।

28फेर ओमन तेरह ले चलके मितका म डेरा डालिन।

29तब ओमन मितका ले चलके हसमोना म डेरा डालिन।

30फेर ओमन हसमोना ले चलके मोसेरोत म डेरा डालिन।

31तब ओमन मोसेरोत ले चलके बेने-जाकन म डेरा डालिन।

32फेर ओमन बेने-जाकन ले चलके होर-हग्गीदगाद म डेरा डालिन।

33तब ओमन होर-हग्गीदगाद ले चलके योतबाता म डेरा डालिन।

34फेर ओमन योतबाता ले चलके अबरोना म डेरा डालिन।

35ओमन अबरोना ले चलके एसियोन-गेबेर म डेरा डालिन।

36फेर ओमन एसियोन-गेबेर ले चलके सीन के सुन्ना जगह कादेस म डेरा डालिन।

37तब ओमन कादेस ले चलके एदोम के सीमना म होर पहाड़ करा डेरा डालिन। 38यहोवा के हुकूम ले हारून पुरोहित ह होर पहाड़ ऊपर गीस, जिहां ओह मर गीस; ओकर मिरतू इसरायलीमन के मिसर देस ले निकले के चालीसवां साल के पांचवां महिना के पहिला दिन होईस। 39जब हारून के मिरतू होर पहाड़ म होईस, त ओकर उमर एक सौ तेईस साल रिहिस।

40इही समय कनान के नेगेव म रहइया अराद के कनानी राजा ला पता चलिस कि इसरायलीमन आवत हें।

41इसरायलीमन होर पहाड़ ले चलके सलमोना म डेरा डालिन।

42ओमन सलमोना ले चलके पुनोन म डेरा डालिन।

43ओमन पुनोन ले चलके ओबोत म डेरा डालिन।

44फेर ओमन ओबोत ले चलके मोआब के सीमना म इये-अबारीम करा डेरा डालिन।

45फेर इये-अबारीम ले चलके दीबोन-गाद म डेरा डालिन।

46फेर ओमन दीबोन-गाद ले चलके अलमोन-दिबलातैम म डेरा डालिन।

47तब ओमन अलमोन-दिबलातैम ले चलके नबो के लकठा म अबारीम के पहाड़मन म डेरा डालिन।

48फेर ओमन अबारीम के पहाड़मन ले चलके यरीहो के ओ पार यरदन नदी के तीर मोआब के मैदान म डेरा डालिन। 49उहां ओमन यरदन नदी के तीर बेत-यसीमोत ले लेके आबेल-सित्तीम तक मोआब के मैदान म डेरा डालिन।

50यरीहो के ओ पार यरदन नदी के तीर मोआब के मैदान म यहोवा ह मूसा ला कहिस, 51“इसरायलीमन ले बात कर अऊ ओमन ला कह: ‘जब तुमन यरदन नदी ला पार करके कनान देस म जावव, 52त अपन आघू ले ओ देस के जम्मो निवासी ला भगा दव। ओमन के गढ़े, अऊ ढालके बनाय गय जम्मो मूरती ला नास कर दव, अऊ ओमन के जम्मो ऊंचहा जगहमन ला गिरा दव। 53ओ देस ला अपन अधिकार म ले लव अऊ उहां बस जावव, काबरकि मेंह ओ देस तुमन ला अधिकार करे बर दे हवंव। 54अपन गोत्र के मुताबिक चिट्ठी निकालके ओ देस ला बांट लेवव। बड़े दल ला बड़े भाग अऊ छोटे दल ला छोटे भाग देवव। चिट्ठी के मुताबिक जऊन भाग ओमन ला मिलथे, ओह ओमन के होही। अपन पुरखा के गोत्रमन के मुताबिक येला बांटव।

55“ ‘पर यदि तुमन ओ देस के निवासीमन ला निकाल नइं सकव, त ओमन म ले जेमन ला तुमन रहे बर दूहू, ओमन तुम्हर आंखीमन म कचरा अऊ तुम्हर पंजरामन म कांटा सहीं हो जाहीं। ओमन तुम्हर बर ओ देस म समस्या खड़े करहीं, जिहां तुमन रहिहू। 56अऊ मेंह तुम्हर संग वइसने करहूं, जइसने ओमन बर करे के ठाने हंव।’ ”