गनती 1

इसरायलीमन के पहिली गनती

1इसरायलीमन के मिसर देस ले निकल जाय के दूसर बछर के दूसर महिना के पहिली दिन, यहोवा ह सीनय के निरजन जगह म, मिलापवाला तम्बू म मूसा ला कहिस: 2“इसरायलीमन के जम्मो समाज ओमन के गोत्र अऊ परिवार के मुताबिक, हर एक पुरूस के गनती नांव लिख-लिखके कर। 3जतेक इसरायली बीस साल या ओकर ले जादा उमर के हवंय अऊ ओमन सेना म सेवा देय के लईक हवंय, ओ जम्मो के गनती तें अऊ हारून ओमन के दल के मुताबिक करव। 4हर एक गोत्र के एक-एक पुरूस, जऊन मन अपन परिवार के मुखिया अंय, ओमन तुम्हर मदद करंय।

5“ये ओ पुरूसमन के नांव अय, जऊन मन तुम्हर मदद करहीं:

“रूबेन के गोत्र ले सदेऊर के बेटा एलीसूर;

6सिमोन के गोत्र ले सूरीसद्दाय के बेटा सलूमीएल;

7यहूदा के गोत्र ले अमीनादाब के बेटा नहसोन;

8इस्साकार के गोत्र ले सूआर के बेटा नतनेल;

9जबूलून के गोत्र ले हेलोन के बेटा एलीआब;

10यूसुफ के बेटामन ले:

एपरैम के गोत्र ले अमीहूद के बेटा एलीसामा;

मनस्से के गोत्र ले पदासूर के बेटा गमलीएल;

11बिनयामीन के गोत्र ले गिदोनी के बेटा अबीदान;

12दान के गोत्र ले अम्मीसद्दाय के बेटा अहीएजेर;

13आसेर के गोत्र ले ओकरान के बेटा पगीएल;

14गाद के गोत्र ले दूएल के बेटा एलियासाप;

15नपताली के गोत्र ले एनान के बेटा अहीरा।”

16येमन समाज के ओ मनखे रिहिन, जेमन ला अपन पुरखा के गोत्रमन ले अगुवा ठहिराय गीस। येमन इसरायल के गोत्रमन के मुखिया रिहिन।

17जऊन मनखेमन के नांव ऊपर लिखे गे हवय, ओमन ला मूसा अऊ हारून अपन संग लीन, 18अऊ ओमन ओ साल के दूसरा महिना के पहिला दिन पूरा समाज ला इकट्ठा करिन। मनखेमन अपन गोत्र अऊ परिवार के मुताबिक अपन बंसावली लिखवाईन, अऊ जतेक झन बीस साल या बीस साल ले जादा उमर के रिहिन, ओमन के नांव एक-एक करके लिखे गीस, 19जइसे कि यहोवा ह मूसा ला हुकूम दे रिहिस। ये किसम ले ओह सीनय के सुनसान जगह म ओमन के गनती करिस:

20इसरायल के बेटा रूबेन के बंस ले:

जतेक पुरूस बीस साल या बीस साल ले जादा उमर के रिहिन अऊ सेना म सेवा दे सकत रिहिन, ओमन के नांव ओमन के गोत्र अऊ परिवार के मुताबिक एक-एक करके लिखे गीस। 21रूबेन के गोत्र के गनती 46,500 होईस।

22सिमोन के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के गनती करे गीस अऊ ओमन के नांव ओमन के गोत्र अऊ परिवार के मुताबिक एक-एक करके लिखे गीस। 23सिमोन के गोत्र के गनती 59,300 होईस।

24गाद के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 25गाद के गोत्र के गनती 45,650 होईस।

26यहूदा के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 27यहूदा के गोत्र के गनती 74,600 होईस।

28इस्साकार के बंस ले:

ओ जम्मो मनखे, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 29इस्साकार के गोत्र के गनती 54,400 होईस।

30जबूलून के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 31जबूलून के गोत्र के गनती 57,400 होईस।

32यूसुफ के बेटामन ले:

एपरैम के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 33एपरैम के गोत्र के गनती 40,500 होईस।

34मनस्से के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 35मनस्से के गोत्र के गनती 32,200 होईस।

36बिनयामीन के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 37बिनयामीन के गोत्र के गनती 35,400 होईस।

38दान के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 39दान के गोत्र के गनती 62,700 होईस।

40आसेर के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 41आसेर के गोत्र के गनती 41,500 होईस।

42नपताली के बंस ले:

ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस। 43नपताली के गोत्र के गनती 53,400 होईस।

44मूसा अऊ हारून अऊ इसरायल के बारह अगुवा, जेमन अपन-अपन परिवार के मुखिया घलो रिहिन, येमन के गनती करिन। 45जम्मो इसरायली, जऊन मन बीस साल ले जादा उमर के रिहिन अऊ इसरायली सेना म सेवा देय के लईक रिहिन, ओमन के गनती परिवार के मुताबिक होईस। 46कुल गनती 6,03,550 होईस।

47पर लेवीमन के पुरखा के गोत्र ला आने मन के संग नइं गने गीस। 48यहोवा ह मूसा ला कहे रिहिस: 49“लेवी गोत्र ला झन गनबे या ओमन ला आने इसरायलीमन संग गनती म सामिल झन करबे। 50पर लेवीमन ला करार के कानून के पबितर-तम्बू म अधिकारी ठहिराबे—ओकर जम्मो सजावट अऊ ओमा के जम्मो चीज ऊपर अधिकारी ठहिराबे। ओमन पबितर-तम्बू अऊ ओमा के जम्मो चीज ला उठावंय; ओमन ओकर देखभाल करंय अऊ ओकर चारों कोति डेरा डाले रहंय। 51जब भी पबितर-तम्बू ला आने जगह ले जाय के समय होवय, त लेवीमन ओला उसालंय, अऊ जब भी पबितर-तम्बू ला गाड़े के समय होवय, त लेवीमन ही ओला गाड़ंय। यदि कोनो आने मनखे येकर लकठा म आवय, त ओह मार डारे जावय। 52इसरायलीमन दल के मुताबिक अपन तम्बूमन ला गाड़ंय, हर एक जन अपन झंडा के अधीन अपन सिविर म तम्बू गाड़ंय। 53पर लेवीमन करार के कानून के पबितर-तम्बू के चारों कोति अपन तम्बू गाड़ंय ताकि मोर कोप ह इसरायली समाज ऊपर झन भड़कय। लेवीमन करार के कानून के पबितर-तम्बू के देखभाल बर जिम्मेदार अंय।”

54इसरायलीमन जम्मो चीज वइसने ही करिन, जइसने यहोवा ह मूसा ला हुकूम दे रिहिस।