Biblica® सुतंतर समकालीन छत्तीसगढ़ी अनुवाद
नहेमियाह 11
यरूसलेम के नवां निवासीमन
मनखेमन के अगुवामन यरूसलेम म बस गीन। बाकि बचे मनखेमन चिट्ठी निकालके दस म ले एक मनखे ला पबितर सहर यरूसलेम म रहे बर लानिन, जबकि बांचे नौ मनखे ओमन के खुद के नगर म रह गीन। मनखेमन ओ जम्मो के परसंसा करिन, जऊन मन अपन ईछा ले यरूसलेम म रहे बर तियार होईन।
येमन राज के ओ अगुवामन अंय, जऊन मन यरूसलेम म बस गीन (कुछू इसरायली, पुरोहित, लेवी, मंदिर के सेवक अऊ सुलेमान के सेवकमन के कुछू संतान, जेमन यहूदा के नगरमन म रहत रिहिन, हर एक झन अलग-अलग नगर म अपन खुद के संपत्ति म रहत रिहिन, जबकि यहूदा अऊ बिनयामीन के गोत्र के आने मनखेमन यरूसलेम म रहत रिहिन):
यहूदा के संतान म ले:
अतायाह, जेह उजियाह के बेटा रिहिस, जेह जकरयाह के बेटा, जेह अमरयाह के बेटा, जेह सपतयाह के बेटा, जेह महललेल के बेटा, जेह पेरेस के एक संतान रिहिस;
अऊ मासेयाह, जेह बारूक के बेटा रिहिस, जेह कोल-होजे के बेटा, जेह हजायाह के बेटा, जेह अदायाह के बेटा, जेह योयारीब के बेटा, जेह जकरयाह के बेटा, जेह सेलह के एक संतान रिहिस।
पेरेस के संतान, जेमन यरूसलेम म रहत रिहिन, ओमन जम्मो मिलाके 468 मरयादावाले आदमी रिहिन।
बिनयामीन के संतान म ले:
सल्लू, जेह मसुल्लाम के बेटा रिहिस, जेह योएद के बेटा, जेह पदायाह के बेटा, जेह कोलायाह के बेटा, जेह मासेयाह के बेटा, जेह ईतीएल के बेटा अऊ जेह येसायाह के बेटा, अऊ ओकर पाछू चलइया गब्बै अऊ सल्लै—कुल 928 आदमी।
येमन के मुखिया अधिकारी जिकरी के बेटा योएल रिहिस, अऊ हस्सनूआ के बेटा यहूदा ह सहर के नवां चौथाई भाग के अधिकारी रिहिस।
पुरोहितमन ले:
योयारीब के बेटा यदायाह अऊ याकीन;
सरायाह, जऊन ह हिलकियाह के बेटा रिहिस, जेह मसुल्लाम के बेटा, जेह सादोक के बेटा, जेह मरायोत के बेटा, जेह अहीतूब के बेटा अऊ अहीतूब ह परमेसर के घर के मुखिया अधिकारी रिहिस, अऊ ओमन के सहयोगी, जेमन मंदिर के काम करंय—कुल 822 आदमी;
अदायाह, जेह यरोहाम के बेटा रिहिस, जेह पलेलियाह के बेटा, जेह आमजी के बेटा, जेह जकरयाह के बेटा, जेह पसहूर के बेटा, जेह मलकियाह के बेटा रिहिस, अऊ ओकर सहयोगी, जेमन परिवारमन के मुखियामन रिहिन—कुल 242 आदमी;
अमसै, जेह अजरेल के बेटा रिहिस, जेह अहजै के बेटा, जेह मसिल्लेमोत के बेटा, जेह इम्मेर के बेटा रिहिस, अऊ ओकर सहयोगी, जेमन मरयादावाले आदमी रिहिन—कुल 128 मनखे।
ओमन के मुखिया अधिकारी जबदीएल रिहिस, जऊन ह हगेदोलीम के बेटा रिहिस।
लेवीमन ले:
समायाह, जेह हस्सूब के बेटा रिहिस, जेह अजरीकाम के बेटा, जेह हसबियाह के बेटा, जेह बुन्नी के बेटा रिहिस;
लेवीमन के मुखियामन ले दू झन सब्बतै अऊ योजाबाद रिहिन, जेमन परमेसर के घर के बाहिर के काम बर जबाबदार रिहिन;
मतनयाह, जेह मीका के बेटा, जबदी के पोता अऊ आसाप के परपोता रिहिस। आसाप ह निरदेसक रिहिस अऊ धनबाद अऊ पराथना म अगुवई करय;
बकबुकियाह, जेह अपन सहयोगीमन के बीच पद म दूसरा रिहिस;
अऊ अब्दा, जेह सम्मू के बेटा, गालाल के पोता अऊ यदूतून के परपोता रिहिस।
लेवीमन पबितर सहर1 म कुल 284 झन रिहिन।
दुवारपालमन:
अक्कूब, अऊ तलमोन अऊ ओमन के सहयोगी, जेमन दुवार म पहरेदारी करंय—कुल 172 आदमी।
बाकि इसरायलीमन, पुरोहित अऊ लेवीमन के संग यहूदा के जम्मो नगर म रिहिन अऊ येमन अपन-अपन पुरखा के संपत्ति म रहत रिहिन।
मंदिर के सेवकमन ओपेल के पहाड़ी म रहत रिहिन, अऊ सीहा अऊ गिसपा ओमन के अधिकारी रिहिन।
यरूसलेम म लेवीमन के मुखिया अधिकारी उज्जी रिहिस, जेह बानी के बेटा रिहिस, जेह हसबियाह के बेटा, जेह मतनयाह के बेटा अऊ जेह मीका के बेटा रिहिस। उज्जी ह आसाप के संतानमन ले एक झन रिहिस, जऊन मन संगीतकार रिहिन अऊ परमेसर के घर के सेवा के जिम्मेदारी ओमन के ऊपर रिहिस। संगीतकारमन बर राजा के आदेस रिहिस, जेकर मुताबिक ओमन के हर दिन के काम रहय।
मेसेजाबेल के बेटा पतहियाह ह यहूदा के बेटा जेरह के संतान म ले एक झन रिहिस। पतहियाह ह मनखेमन ले संबंधित जम्मो काम म राजा के परतिनिधि रिहिस।
गांवमन के बारे म ये कहे जा सकथे, जेमा खेत घलो रिहिन, यहूदा गोत्र के कुछू मनखेमन किरयत-अरबा अऊ ओकर आसपास के गांव म, दीबोन अऊ येकर गांवमन म, जेकबसील अऊ येकर गांवमन म, येहोसू म, मोलादा म, बेत-पेलेत म, हसर-सूआल म, बेरसेबा अऊ येकर गांवमन म, सिकलग म, मकोना अऊ येकर गांवमन म, एन-रिम्मोन म, सोरा म, यरमूत म, जानोह, अदुल्लाम अऊ ओमन के गांवमन म, लाकीस अऊ येकर खेतमन म, अऊ अजेका अऊ येकर गांवमन म रहत रिहिन। ये किसम ले ओमन बेरसेबा ले लेके हिन्नोम के घाटी तक अपन निवास बनाके रहत रिहिन।
गेबा के बिनयामीन के संतानमन मिकमास, अईजा, बेतेल अऊ येकर गांवमन म, अनातोत, नोब अऊ अननियाह म, हासोर, रामा अऊ गित्तैम म, हादीद, सबोईम अऊ नबल्लत म, लोद अऊ ओनो म, अऊ गे-हरासीम म रहत रिहिन।
यहूदा के लेवीमन के कुछू दलमन बिनयामीन म बस गे रिहिन।
Source notes (1)
- Footnote या यरूसलेम सहर
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.