Biblica® सुतंतर समकालीन छत्तीसगढ़ी अनुवाद
नहूम 1
नीनवे सहर के बारे म अगमबानी। एलकोस के रहइया नहूम के दरसन के किताब।
नीनवे सहर के बिरूध यहोवा के कोरोध
यहोवा जलन रखइया अऊ बदला लेवइया परमेसर अय;
यहोवा बदला लेथे अऊ कोरोध ले भरे हवय।
यहोवा अपन बईरीमन ले बदला लेथे
अऊ अपन कोरोध अपन बईरीमन के बिरूध देखाथे।
यहोवा ह कोरोध करे म धीमा, पर सामर्थ म बड़े अय;
यहोवा दुस्टमन ला दंड देय बिगर नइं छोंड़ही।
ओकर रद्दा ह बवंडर अऊ आंधी म ले होके जाथे,
अऊ बादरमन ओकर गोड़ के धुर्रा अंय।
ओह समुंदर ला दबकारथे अऊ ओला सूखा देथे;
ओह जम्मो नदीमन ला सूखा देथे।
बासान के खेत अऊ करमेल पहाड़ के बगीचा कुम्हला जाथें
अऊ लबानोन के फूल मुरझा जाथें।
यहोवा के आघू म पहाड़मन कांपथें
अऊ पहाड़ीमन टघल जाथें।
ओकर आघू म धरती,
पूरा संसार अऊ ओमा रहइया जम्मो कांपथें।
ओकर कोरोध के सामना कोन कर सकथे?
ओकर भयंकर कोरोध ला कोन सह सकथे?
ओकर कोप ह आगी सहीं भड़कथे;
ओकर आघू म चट्टानमन चूर-चूर हो जाथें।
यहोवा बने अय,
अऊ संकट के बेरा म मजबूत गढ़ अय।
ओह ओमन के खियाल रखथे, जऊन मन ओकर ऊपर भरोसा रखथें,
पर एक भयंकर बाढ़ के दुवारा
ओह नीनवे सहर ला खतम कर दीही;
ओह अपन बईरीमन ला अंधियार के राज म भगा दीही।
ओमन जऊन भी सडयंत्र यहोवा के बिरूध करहीं
ओह ओला असफल कर दीही;
संकट ह दूबारा नइं आही।
ओकर बईरीमन कंटिला झाड़ीमन म फंस जाहीं
अऊ मंद पीके मतवार होहीं;
ओमन ला खेत म सूखाय नर्रा सहीं जलाके नास कर दिये जाही।
हे नीनवे, तोर ले ही एक जन निकले हवय
जऊन ह यहोवा के बिरूध दुस्टता के सडयंत्र करथे,
अऊ दुस्ट योजना बनाथे।
यहोवा ह ये कहिथे:
“हालाकि ओमन संग ओमन ला मदद करइयामन हवंय अऊ ओमन अनगिनत हवंय,
पर ओमन नास करे जाहीं अऊ मिट जाहीं।
हे यहूदा, हालाकि मेंह तोला पीरा दे हवंव,
पर अब मेंह तोला पीरा नइं दंव।
अब मेंह तोर गरदन म रखे ओमन के जुड़ा ला टोर दूहूं
अऊ तोर बेड़ीमन ला टोर दूहूं।”
हे नीनवे, यहोवा ह तोर बारे म एक हुकूम दे हवय:
“तोर बंस ला बढ़ाय बर तोर कोनो संतान नइं होहीं।
मेंह तोर देवतामन के मंदिर म रखे
तोर पूजा के चीज अऊ मूरतीमन ला नास कर दूहूं।
में तोर बर कबर कोड़हूं,
काबरकि तेंह दुस्ट अस।”
देख, उहां पहाड़मन ऊपर,
ओकर गोड़मन ला देख, जऊन ह सुघर संदेस लाथे,
जऊन ह सांति के घोसना करथे!
हे यहूदा, अपन तिहारमन ला मना,
अऊ अपन मन्नतमन ला पूरा कर।
काबरकि दुस्ट मनखेमन अब तोर ऊपर हमला नइं करंय;
ओमन ला पूरा नास करे जाही।1
Source notes (1)
- Footnote इबरानी म पद ( 1:15 ) ला 2:1 गने गे हवय
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.