बिलापगीत 2

1परभू ह कइसे अपन कोरोध के बादर म

बेटी सियोन ला ढांप ले हवय!

ओह इसरायल के वैभव ला

स्वरग ले खाल्हे धरती म जोर से फटिक दे हवय;

ओह अपन कोरोध के दिन म

अपन पांव के चौकी ला सुरता नइं करिस।

2परभू ह बिगर दया के याकूब के

जम्मो निवासमन ला लील डारे हवय;

अपन कोप म ओह बेटी यहूदा के

गढ़मन ला टोर-फोर दे हवय।

ओह ओकर राज अऊ येकर हाकिममन ला

अपमानित करके भुइयां म ले आय हवय।

3भयंकर कोरोध म ओह इसरायल के

हर एक सींग1 ला काट दे हवय।

जब बईरी ह ओमन के लकठा म आथे

त ओह अपन जेवनी हांथ ले ओमन के रकछा नइं करय।

ओह एक भयंकर आगी सहीं याकूब म बरे हवय

जऊन ह आसपास के जम्मो चीज ला भसम कर देथे।

4एक बईरी सहीं ओह अपन धनुस ला ताने हवय;

ओकर जेवनी हांथ ह तियार हवय।

एक बईरी सहीं ओह ओ जम्मो झन ला मार डारे हे

जऊन मन हमर नजर म बने रिहिन;

ओह बेटी सियोन के तम्बू म

अपन कोप ला आगी सहीं उंडेल दे हवय।

5परभू ह एक बईरी सहीं अय;

ओह इसरायल ला लील डारे हवय।

ओह ओकर जम्मो महलमन ला लील ले हवय

अऊ ओकर गढ़मन ला नास कर दे हवय।

ओह बेटी यहूदा बर

सोक अऊ बिलाप ला बहुंत बढ़ा दे हवय।

6ओह अपन निवास ला एक बगीचा सहीं उजार दे हवय;

ओह अपन मिले-जुले के जगह ला नास कर दे हवय।

यहोवा ह सियोन बर अइसे कर दे हवय

कि ओह अपन ठहिराय तिहार अऊ बिसराम दिनमन ला भुला जावय;

अपन भयंकर कोरोध म ओह

राजा अऊ पुरोहित दूनों के तिरस्कार करे हवय।

7परभू ह अपन बेदी ला अस्वीकार करे हवय

अऊ अपन पबितर-स्थान ला तियाग दे हवय।

ओह राजमहल के दीवारमन ला

बईरी के हांथ म कर दे हवय;

एक ठहिराय गे तिहार के दिन सहीं

ओमन यहोवा के घर म एक कोलाहल करे हवंय।

8यहोवा ह बेटी सियोन के चारों कोति के दीवार ला

टोरे-फोरे बर ठान ले हवय।

ओह नापे के डोर ला निकाले हवय

अऊ नास करे बर अपन हांथ ला नइं रोकिस।

ओह किला के सुरकछा दीवार अऊ दीवारमन ले बिलाप करवाईस;

एक संग ओमन उजड़ गीन।

9ओकर दुवारमन भुइयां म धंस गे हवंय;

ओमन के छड़मन ला ओह टोरके नास कर दे हवय।

ओकर राजा अऊ ओकर हाकिममन आनजातमन के बीच म बंधुवई म हवंय,

उहां कानून नइं ए,

अऊ ओकर अगमजानीमन ला यहोवा ले

अब कोनो दरसन नइं मिलय।

10बेटी सियोन के अगुवामन

भुइयां म चुपचाप बईठथें;

ओमन अपन मुड़ म धुर्रा छिंचे हवंय

अऊ ओमन बोरा के कपड़ा पहिरे हवंय।

यरूसलेम के जवान माईलोगनमन

भुइयां कोति अपन मुड़ नवाय हवंय।

11रो-रोके मोर आंखी नइं दिखत हे,

मेंह भीतरे-भीतर पीरा म हंव;

मोर हिरदय ला भुइयां म ढारे जावत हे

काबरकि मोर मनखेमन नास होवत हवंय,

काबरकि लइकामन अऊ दूध पीयइया लइकामन

सहर के गलीमन म मूर्छा खाके पड़े हवंय।

12जब ओमन घायल मनखे सहीं

सहर के गलीमन म मूर्छा खाथें,

जब ओमन अपन दाई के बाहां म

परान छोड़त रहिथें।

त ओमन अपन-अपन दाई ला कहिथें,

“रोटी अऊ अंगूर के मंद कहां हवय?”

13हे बेटी यरूसलेम,

मेंह तोला का कहंव?

मेंह तोर तुलना काकर संग करंव?

हे कुंवारी बेटी सियोन,

मेंह तोर तुलना काकर संग करके

तोला सांतवना देवंव?

तोर घाव ह समुंदर सहीं गहिला हवय।

तोला कोन चंगा कर सकथे?

14तोर अगमजानीमन के दरसनमन

लबारी बात अऊ बेकार अंय;

ओमन तोर पाप ला उजागर नइं करिन

नइं तो तोर बंधुवई नइं होतिस।

जऊन अगमबानी, ओमन तोर बर करिन

ओमन लबारी अऊ बहकानेवाला रिहिन।

15ओ जम्मो जऊन मन तोर रसता ले होके जाथें

ओमन ताली बजाके तोर ठट्ठा करथें;

ओमन बेटी यरूसलेम के ये कहिके

हंसी उड़ाथें अऊ अपन मुड़ ला हलाथें:

“का येह ओ सहर अय

जेला सुघरता म भरपूर कहे जावय,

जऊन ह जम्मो धरती के आनंद रिहिस?”

16तोर जम्मो बईरीमन तोर बिरूध म

अपन मुहूं खोलथें;

ओमन हंसी उड़ाथें अऊ दांत किटकिटात कहिथें,

“हमन ओला लील डारे हन।

येहीच ह ओ दिन ए, जेकर डहार हमन देखत रहेंन;

येला देखे बर हमन जीयत रहेंन।”

17यहोवा ह अपन योजना ला पूरा करे हवय;

ओह अपन बचन ला पूरा करे हवय,

जेकर आदेस ओह बहुंत पहिले देय रिहिस।

ओह बिगर दया के तोला उठाके फटिक दे हवय,

ओह तोर ऊपर बईरी ला खराप नजर ले देखे के अनुमति देय हवय,

ओह तोर बईरीमन के सींग ला ऊपर करे हवय।

18मनखेमन के हिरदय ह

परभू ला पुकारथे।

हे बेटी सियोन के दीवारमन

तुम्हर आंसू ह नदी सहीं

दिन अऊ रात बहय;

अपनआप ला अराम झन दे,

तोर आंखीमन ला अराम झन मिलय।

19उठ, रथिया के बेरा पुकार,

जब रथिया के पहरमन सुरू होथें;

परभू के आघू म अपन हिरदय ला

पानी सहीं ढार दे।

अपन ओ लइकामन के जिनगी खातिर

ओकर कोति अपन हांथ ला उठा,

जेमन गली के हर कोना म

भूख के मारे बेहोस होवथें।

20“हे यहोवा, देख अऊ बिचार कर:

तेंह काकर संग अइसने बरताव करे हस?

का माईलोगनमन अपन लइकामन ला खावंय,

ओ लइका जेमन के ओमन पालन-पोसन करे हवंय?

का पुरोहित अऊ अगमजानीमन

परभू के पबितर-स्थान म मारे जावंय?

21“गली के धुर्रा म

जवान अऊ डोकरा दूनों एक संग पड़े रहिथें;

मोर जवान छोकरा अऊ जवान छोकरीमन

तलवार से मारे गे हवंय।

तेंह अपन कोरोध के दिन म ओमन ला मार डारे हस;

तेंह बिगर दया के ओमन के बध करे हस।

22“जइसे तेंह भोज के दिन के नेवता देथस,

वइसे तेंह मोर बिरूध म आतंक ला हर तरफ ले बलाय हस।

यहोवा के कोरोध के दिन म

कोनो भाग नइं सकिन या जिंदा नइं बचिन;

जऊन मन के मेंह देखभाल करेंव अऊ पालन-पोसन करेंव,

मोर बईरी ह ओमन ला नास कर दे हवय।”