यहोसू 9

गिबोनीमन के धोखा

1ये जम्मो बात ला सुनके हित्ती, अमोरी, कनानी, परिज्जी, हिब्बी, अऊ यबूसी, जतेक राजा यरदन के ये पार पहाड़ी देस अऊ खाल्हे पछिम म, अऊ लबानोन ले लेके भूमध्य सागर के तीर म रहत रिहिन, 2ओमन यहोसू अऊ इसरायलीमन ले लड़े बर एक संग जूरिन।

3पर जब गिबोन के निवासीमन सुनिन कि यहोसू ह यरीहो अऊ अई सहर के का दसा करिस, 4त ओमन एक छल करिन: ओमन एक परतिनिधि-मंडल के भेस बनाके अपन गदहामन म पुराना बोरा अऊ मंद धरे के चमड़ा के पुराना थैलीमन ला जोरिन, जेमन फटा-पुराना रिहिन अऊ जेमन ला मरम्मत करे गे रिहिस। 5ओमन अपन गोड़ म फटा-पुराना पनही अऊ देहें म फटा-पुराना ओनहा पहिरिन। ओमन के जेवन के जम्मो रोटी ह सूखा अऊ ओमा फफूंद लगे रहय। 6तब ओमन गिलगाल के डेरा म यहोसू करा जाके ओला अऊ इसरायलीमन ले कहिन, “हमन दूरिहा देस ले आय हवन; एकरसेति तुमन हमर संग एक करार करव।”

7इसरायलीमन ओ हिब्बीमन ले कहिन, “का पता, तुमन हमर लकठा म रहत हवव; त हमन तुम्हर संग कइसे करार कर सकत हन?”

8तब ओमन यहोसू ले कहिन, “हमन तोर सेवक अन।”

पर यहोसू ह ओमन ले पुछिस, “तुमन कोन अव अऊ कहां ले आय हवव?”

9ओमन जबाब दीन, “तोर सेवकमन बहुंत दूरिहा के देस ले यहोवा तुम्हर परमेसर के कीरति ला सुनके आय हवंय। काबरकि हमन ओकर बारे म सुने हवन: ओ जम्मो काम, जेला ओह मिसर देस म करिस, 10अऊ ओ जम्मो, जेला ओह यरदन के पूरब कोति अमोरीमन के दूनों राजामन के संग करिस—याने कि हेसबोन के राजा सीहोन, अऊ बासान के राजा ओग के संग, जेमन असतारोत म राज करत रिहिन। 11एकरसेति हमर अगुवा अऊ हमर देस के रहइया जम्मो झन हमन ला कहिन, ‘अपन रसता बर खाय-पीये के सामान ले जावव अऊ जाके ओमन ले मिलव अऊ ओमन ला कहव, “हमन तुम्हर सेवक अन; तुमन हमर संग एक करार करव।” ’ 12जऊन दिन हमन तुम्हर करा आय बर निकले रहेंन, ओ दिन हमन गरम रोटी लेके निकले रहेंन। पर अब देखव, येह सूखा गे हवय अऊ येमा फफूंद लग गे हवय। 13अऊ जब हमन ये चमड़ा के थैलीमन म मंद ला भरे रहेंन, तब येमन नवां रिहिन, पर अब देखव, येमन कइसे फट गे हवंय। अऊ हमर ये ओनहा अऊ पनहीमन बहुंत दूरिहा ले यातरा करे के कारन फट गे हवंय।”

14तब इसरायलीमन ओमन के खाय-पीये के सामान ला देखिन पर यहोवा ले पुछताछ नइं करिन। 15तब यहोसू ह ओमन ले सांति के एक करार करिस अऊ ओमन ला जीयत छोंड़ दीस, अऊ इसरायली सभा के अगुवामन सपथ खाके येमा सहमती दीन।

16गिबोनीमन संग करार करे के तीन दिन के बाद, इसरायलीमन ला पता चलिस कि ओमन परोसी रिहिन अऊ लकठा म रहिथें। 17तब इसरायलीमन निकलिन अऊ तीसर दिन ओमन के सहर गिबोन, कपीरा, बेरोत अऊ किरयत-यारीम म आईन। 18पर इसरायलीमन ओमन के ऊपर हमला नइं करिन, काबरकि सभा के अगुवामन ओमन के संग यहोवा, इसरायल के परमेसर के सपथ खाय रिहिन।

सभा के जम्मो मनखेमन अगुवामन के बिरूध कुड़कुड़ाय लगिन। 19पर जम्मो अगुवामन जबाब दीन, “हमन ओमन ले यहोवा, इसरायल के परमेसर के सपथ खाय हवन, एकरसेति अब हमन ओमन ला छू घलो नइं सकन। 20हमन ओमन के संग अइसने कर सकत हन: हमन ओमन ला जीयत छोंड़ देवन, ताकि ओमन के संग हमर खाय सपथ के कारन हमर ऊपर परमेसर के कोप झन भड़कय।” 21ओमन आगे कहिन, “ओमन ला जीयत छोंड़ दव, पर ओमन जम्मो सभा के सेवा म लकरी फोरइया अऊ पानी भरइया बनंय।” ये किसम ले ओमन के संग अगुवामन के करे सपथ ह बने रिहिस।

22तब यहोसू ह गिबोनीमन ला बलाके पुछिस, “तुमन काबर ये कहिके हमर ले छल करेव, ‘हमन तुम्हर ले बहुंत दूरिहा देस म रहिथन,’ जबकि सही म तुमन हमर लकठा म रहिथव? 23एकरसेति अब तुमन सरापित अव: तुमन मोर परमेसर के घर बर लकरी फोरइया अऊ पानी भरइया के सेवा ले कभू भी छूट नइं सकव।”

24ओमन यहोसू ला जबाब दीन, “तोर सेवकमन ला साफ-साफ जरूर बताय गे रिहिस कि यहोवा तुम्हर परमेसर ह अपन सेवक मूसा ला हुकूम देय रिहिस कि तुमन ला ओह जम्मो देस दे दीही अऊ ओकर जम्मो निवासीमन ला तुम्हर आघू ले नास कर दीही। एकरसेति हमन ला तुम्हर कारन हमर परान गंवाय के भय हो गीस, अऊ ओकरे कारन हमन अइसने करेंन। 25हमन अब तोर हांथ म हवन। तोला जऊन बात भी बने अऊ सही लगय, तेंह हमर संग वइसने कर।”

26तब यहोसू ह ओमन ला इसरायलीमन ले बचाईस, अऊ ओमन गिबोनीमन के हतिया नइं करिन। 27पर यहोसू ह ओही दिन ले ओमन ला सभा बर, अऊ जऊन ठऊर ला यहोवा ह चुनय, उहां ओकर बेदी बर लकरी फोरइया अऊ पानी भरइया बना दीस। अऊ ओमन आज तक वइसने ही हवंय।