Biblica® सुतंतर समकालीन छत्तीसगढ़ी अनुवाद
अयूब 32
एलीहू
तब अयूब के ये तीनों संगी अयूब ला जबाब देना बंद कर दीन, काबरकि अयूब ह खुद के नजर म धरमी रिहिस। पर राम के परिवार के बूजवासी बारकेल के बेटा एलीहू ह अयूब के ऊपर बहुंत गुस्सा होईस काबरकि अयूब ह परमेसर के बदले अपनआप ला धरमी ठहिरात रिहिस। एलीहू ह ये तीनो संगीमन ऊपर घलो गुस्सा होईस, काबरकि ओमन अयूब ला जबाब नइं दे सकिन, अऊ तभो ले ओमन ओला दोसी ठहिराईन। एलीहू ह अयूब के आघू म गोठियाय बर इंतजार करत रिहिस, काबरकि ओह ओमन ले उमर म छोटे रिहिस। पर जब ओह देखिस कि ओ तीनों झन करा कहे बर अऊ कुछू नइं ए, त ओकर रिस ह भड़किस।
तब बूजवासी बारकेल के बेटा एलीहू ह जबाब दीस:
“मेंह तो उमर म छोटे अंव,
अऊ तुमन सियान अव;
एकरसेति मेंह डरत रहेंव,
अऊ जऊन कुछू जानथंव, ओला कहे के हिम्मत नइं करत रहेंव।
मेंह सोचत रहेंव, ‘उमर म बड़ेमन ला गोठियाना चाही;
उमर म बड़ेमन ला बुद्धि के बात सिखाना चाही।’
पर मनखे म येह आतमा ए,
याने सर्वसक्तिमान के सांस ए, जऊन ह ओमन ला समझ देथे।
सिरिप सियान मनखेमन ही बुद्धिमान नइं होवंय,
अऊ सिरिप उमरवालामन ही सही बात के समझ नइं रखंय।
“एकरसेति मेंह कहत हंव: मोर बात ला सुनव;
मेंह घलो तुमन ला बताहूं, जऊन कुछू मेंह जानथंव।
जब तुमन गोठियावत रहेव, त मेंह रूके रहेंव,
मेंह तुम्हर बिचार ला सुनेंव;
जब तुमन बोले बर सबद खोजत रहेव,
मेंह पूरा धियान देके तुम्हर बात सुनेंव।
पर तुमन म ले कोनो अयूब ला गलत साबित नइं करेव;
तुमन म ले एको झन घलो ओकर बात के जबाब नइं दे सकेव।
ये झन कहव, ‘हमन बुद्धि पा गे हन;
कोनो मनखे नइं, पर परमेसर ह ओला लबरा साबित करय।’
पर अयूब ह मोर बिरोध म कुछू नइं कहिस,
अऊ मेंह ओला तुम्हर तर्क के संग जबाब नइं देवंव।
“ओमन अबक हो गे हवंय अऊ ओमन करा कहे बर कुछू नइं ए;
ओमन ला सबद ही नइं मिलिस।
ओमन चुप हवंय अऊ बिगर कोनो जबाब के ठाढ़े हवंय,
त का मेंह रूके रहंव?
मेंह घलो अपन बात कहिहूं;
जऊन कुछू मेंह जानथंव, मेंह घलो बताहूं।
काबरकि मेंह गोठमन ले भरे हवंव,
अऊ मोर भीतर के आतमा ह मोला बाध्य करत हवय;
भीतर म मेंह अंगूर के मंद के बोतल सहीं अंव,
नवां चाम के बोतल सहीं, जऊन ह फूटे बर तियार हवय।
मेंह जरूर बोलहूं अऊ येकर ले मोला अराम मिलही;
मेंह मुहूं खोलके जरूर जबाब दूहूं।
मेंह काकरो पखियपात नइं करंव,
अऊ न ही काकरो चापलूसी करहूं;
काबरकि कहूं मेंह चापलूसी करे म कुसल होतेंव,
त मोर सिरजनहार ह मोला जल्दी नास कर देतिस।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.