अयूब 26

अयूब

1तब अयूब ह जबाब दीस:

2“तेंह कइसे निरबलमन के मदद करे हवस!

तेंह कइसे ओ मनखे ला संभाले हस, जऊन ह कमजोर हवय!

3तेंह ओ मनखे ला का सलाह दे हवस, जेकर करा बुद्धि नइं ए!

अऊ तेंह का अंतर-गियान देखाय हवस!

4कोन ह तोला ये गोठ कहे बर मदद करे हवय?

अऊ काकर आतमा ह तोर मुहूं ले गोठियाईस?

5“मरे मनखेमन बहुंत पीरा म हवंय,

ओमन, जऊन मन पानी के खाल्हे अऊ ओ जम्मो, जऊन मन ओमा रहिथंय।

6अधोलोक ह परमेसर के आघू म खुला हवय;

बिनास ह नइं तोपाय हवय।

7ओह उत्तर दिग के अकासमन ला खाली जगह म बगराथे;

ओह धरती ला अधर म लटकाय हवय।

8ओह बारिस के पानी ला अपन बादर म लपेटे हवय,

तभो ले बादरमन ओमन के बोझ म होके बरसंय नइं।

9ओह पून्नी के चंदा ला ढांप देथे,

ओकर ऊपर अपन बादरमन ला बगराय के दुवारा।

10अंजोर अऊ अंधियार के बीच म सिवाना बांधे बर

ओह समुंदर के सतह म छितिज ला ठहिराय हवय।

11ओकर दबकारे ले

अकास के खंभामन डरके थर-थर कांपथें।

12अपन सामर्थ ले ओह समुंदर ला सांत कर देथे;

अपन बुद्धि ले ओह राहाब1 ला कुटा-कुटा कर देथे।

13ओकर सांस ले अकास-मंडल साफ हो जाथे;

ओकर हांथ ह भागत सांप ला मार देथे।

14अऊ येमन तो ओकर काम के सिरिप एक झलक अंय;

ओकर फुसफुसाहट हमन ला कतेक कम सुनई देथे!

त फेर ओकर सामर्थ के गरजन ला कोन ह समझ सकथे?”