यरमियाह 8

1“ ‘यहोवा ह ये घोसना करत हे: ओ बेरा, यहूदा के राजा अऊ करमचारीमन के हाड़ा, पुरोहित अऊ अगमजानीमन के हाड़ा, अऊ यरूसलेम के मनखेमन के हाड़ा ला ओमन के कबरमन ले निकाले जाही। 2ओमन ला सूरज, चंदा अऊ अकास के जम्मो तारामन के आघू म रखे जाही; काबरकि ओ मनखेमन ये चीजमन ले मया करिन, येमन के सेवा करिन, येमन के पाछू चलिन, येमन के सलाह लीन अऊ येमन के अराधना करिन। ये हाड़ामन ला न तो संकेले जाही, न तो येमन ला गाड़े जाही, पर येमन भुइयां म सूखा गोबर सहीं पड़े रहिहीं। 3जिहां कहूं भी मेंह येमन ला भगाहूं, उहां ये दुस्ट जाति के बांचे जम्मो मनखेमन जीयत रहे के बदले मरना पसंद करहीं, सर्वसक्तिमान यहोवा ह घोसना करत हे।’

पाप अऊ सजा

4“ओमन ला कह, ‘यहोवा ह ये कहत हे:

“ ‘जब मनखेमन गिरथें, त का ओमन फेर नइं उठंय?

जब कोनो मुहूं मोड़के चल देथे, त का ओह फेर नइं लहुंटय?

5त फेर ये मनखेमन काबर मुहूं मोड़के चल दे हवंय?

काबर यरूसलेम ह हमेसा मुहूं मोड़के चल देथे?

ओमन धोखा देते रहिथें;

ओमन लहुंटे नइं चाहंय।

6मेंह धियान देके ओमन के बात ला सुने हंव,

पर ओमन सही बात ला नइं कहंय।

ओमा के कोनो भी अपन दुस्टता ले नइं पछतांय,

पर ये कहिथें, “मेंह का करे हंव?”

जइसने घोड़ा ह लड़ई म हमला करथे,

वइसने ही येमा के हर एक झन अपन हिसाब से चलथे।

7इहां तक कि अकास के सारस चिरई ह

अपन ठहिराय समय ला जानथे,

अऊ पंड़की, सूपाबेनी अऊ तूती चिरई घलो

आने जगह जाय के सही बेरा ला जानथें।

पर मोर मनखेमन यहोवा के

नियममन ला नइं जानंय।

8“ ‘तुमन कइसे कह सकत हव, “हमन बुद्धिमान अन,

काबरकि हमर करा यहोवा के कानून हवय,”

जबकि असल म, कानून के गुरूमन लबारी बात लिखके

येकर गलत तरीका से उपयोग करे हवंय?

9बुद्धिमान मनखेमन लज्जित होहीं;

ओमन डराहीं अऊ पकड़े जाहीं।

जब ओमन यहोवा के बचन ला नइं माने हवंय,

त ओमन करा का किसम के बुद्धि हवय?

10ये कारन से मेंह ओमन के घरवालीमन ला आने मनखेमन ला

अऊ ओमन के खेतमन ला नवां मालिकमन ला दे दूहूं।

छोटे ले लेके बड़े तक,

जम्मो के जम्मो अनाज के लालची अंय;

अगमजानी अऊ पुरोहितमन घलो वइसने

जम्मो के जम्मो धोखाधड़ी करथें।

11ओमन मोर मनखेमन के घावमन म अइसे पट्टी बांधथें

मानो ओमा जादा चोट नइं लगे रिहिस।

ओमन कहिथें, “सांति हे, सांति हे,”

जबकि उहां सांति नइं ए।

12का ओमन अपन घिनौना बरताव बर सरमिंदा हवंय?

नइं, ओमन बिलकुल ही सरमिंदा नइं एं।

ओमन सरमिंदा होवई जानंय ही नइं।

एकरसेति ओमन गिरे मनखेमन के बीच म गिरहीं;

ओमन गिराय जाहीं, जब ओमन ला सजा मिलही,

यहोवा ह कहत हे।

13“ ‘मेंह ओमन के फसल ला ले लूहूं,

यहोवा ह घोसना करत हे।

अंगूर के नार म अंगूर नइं होही।

अंजीर के रूख म अंजीर नइं होही,

अऊ ओमन के पानमन सूखा जाहीं।

जऊन कुछू मेंह ओमन ला देय हवंव,

ओह ओमन ले, लेय लिये जाही।’ ”

14हमन इहां काबर बईठे हवन?

इकट्ठा हो जावव!

आवव, हमन किलाबंदीवाले सहरमन म भाग चलन

अऊ उहां नास हो जावन!

काबरकि यहोवा हमर परमेसर ह हमन ला नास करे बर ठाने हे

अऊ हमन ला जहर-पानी पीये बर दे हवय,

काबरकि हमन यहोवा के बिरूध पाप करे हवन।

15हमन सांति के आसा करत रहेंन

पर कुछू बने बात नइं होईस,

हमन चंगई के आसा करत रहेंन

पर उहां सिरिप आतंक ही आतंक हवय।

16बईरी के घोड़ामन के हिनहिनाय के अवाज

दान सहर ले सुनई पड़त हे;

ओमन के बिगर बधिया करे गे घोड़ामन के हिनहिनाय के अवाज ले

जम्मो देस ह कांपत हे।

ओमन देस अऊ येमा के हर चीज,

सहर अऊ उहां रहइया जम्मो झन ला

नास करे बर आय हवंय।

17“देखव, मेंह तुम्हर बीच म अइसने जहरिला सांपमन ला पठोहूं,

ओ जहरिला सांपमन, जऊन मन ला बस म नइं करे जा सकय,

अऊ ओमन तुमन ला डसहीं,”

यहोवा ह घोसना करत हे।

18तेंह दुख म मोला सांति देवइया अस,

मोर हिरदय ह मोर भीतर म दुरबल हो गे हवय।

19मोर मनखेमन के चिचियाय के अवाज ला

दूरिहा के देस ले सुनव:

“का यहोवा ह सियोन म नइं ए?

का सियोन के राजा ह अब उहां नइं ए?”

“ओमन काबर मोर गुस्सा ला अपन मूरती

अऊ परदेस के बेकार मूरतीमन के दुवारा भड़काय हवंय?”

20“फसल लुये के समय ह बीत गीस,

गरमी ह खतम हो गीस,

अऊ हमर उद्धार नइं होईस।”

21जब मोर मनखेमन कुचरे जाथें, त महूं घलो कुचरे जाथंव;

मेंह सोकित हंव, अऊ मोर मन म डर हमा गे हवय।

22का गिलाद देस म कुछू मलहम नइं ए?

का उहां कोनो बईद नइं एं?

त फेर मोर मनखेमन के घाव ह

काबर चंगा नइं होवत हे?