यरमियाह 17

1“यहूदा के पाप ह लोहा के कलम,

अऊ चकमक पथरा के छोर ले,

ओमन के हिरदय रूपी पटिया

अऊ ओमन के बेदीमन के सींगमन म लिखे गे हवय।

2अऊ त अऊ ओमन के लइकामन

ओमन के ओ बेदीमन ला अऊ असेरा देवी के खंभामन ला सुरता करथें

जऊन मन फईले हुए रूखमन के बाजू

अऊ ऊंचहा पठारमन ऊपर हवंय।

3जम्मो जगह म तोर पाप के कारन,

देस म मोर पहाड़,

अऊ तोर धन-संपत्ति अऊ तोर जम्मो खजाना ला,

तोर ऊंचहा जगहमन सहित,

मेंह लूट म तोर बईरीमन ला दे दूहूं।

4अपन खुद के गलती के कारन

तेंह ओ उत्तराधिकार ला गंवा देबे, जऊन ला मेंह तोला देय रहेंव।

मेंह एक अनजान देस म

तोला तोर बईरीमन के गुलाम बना दूहूं,

काबरकि तेंह मोर गुस्सा रूपी आगी ला भड़काय हस,

अऊ येह हमेसा बरत रहिही।”

5यहोवा ह ये कहत हे:

“सरापित ए ओ मनखे, जऊन ह मनखे ऊपर भरोसा करथे,

जऊन ह मनखे के सहारा लेथे

अऊ जेकर मन ह यहोवा ले भटक जाथे।

6ओ मनखे ह बंजर भुइयां के झाड़ी सहीं होही;

अऊ जब उन्नति के समय आही, त ओह ओला नइं देख सकही।

ओह सुन्ना जगह म गरमी ले झुलसत भुइयां म निवास करही,

अइसने नूनचूर भुइयां म निवास करही, जिहां कोनो नइं रहंय।

7“धइन ए ओ मनखे, जऊन ह यहोवा ऊपर भरोसा करथे,

जेकर भरोसा परमेसर ऊपर हवय।

8ओह पानी के तीर म लगे रूख के सहीं होही

जेकर जरीमन पानी के सोत म फईले रहिथें।

जब घाम होथे, त येह नइं डरय;

येकर पानमन हमेसा हरियर रहिथें।

साल भर के दुकाल म घलो येह चिंता नइं करय

अऊ समय म फरे ले नइं चुकय।”

9मन ह जम्मो चीजमन ले जादा धोखा देवइया अय

अऊ येकर ईलाज नइं ए।

येला कोन समझ सकथे?

10“में यहोवा ह मन ला खोजथंव

अऊ दिमाग ला जांचथंव,

ताकि हर एक मनखे ला ओकर चालचलन के मुताबिक,

अऊ ओकर काम के मुताबिक ईनाम देवंव।”

11जइसने तीतर ह आने चिरई के देय गार ला सेथे

वइसने ओमन होथें, जऊन मन अनियाय करके धन कमाथें।

जब ओमन के आधा जिनगी खतम हो जाथे, त ओमन के धन ह ओमन ला छोंड़ देथे,

अऊ आखिरी म ओमन मुरूख साबित होथें।

12सुरू ले ऊपर उठाय गे एक महिमामय सिंघासन ह,

हमर पबितर-स्थान के जगह अय।

13हे यहोवा, तेंह इसरायल के आसा अस;

जऊन मन तोला तियाग देथें, ओमन लज्जित होहीं।

जऊन मन तोर ले मुहूं फेर लेथें, ओमन के नांव धुर्रा म लिखे जाही

काबरकि ओमन ओ यहोवा ला तियाग दे हवंय,

जऊन ह जीयत पानी के सोता अय।

14हे यहोवा, मोला चंगा कर, त मेंह चंगा हो जाहूं;

मोला बचा, त मेंह बच जाहूं,

काबरकि मेंह सिरिप तोर ही महिमा करथंव।

15ओमन मोला कहिते रहिथें,

“यहोवा के बचन कहां हवय?

ओह अभी पूरा होवय!”

16तोर चरवाहा बने ले मेंह मुहूं नइं मोड़े हंव;

तेंह जानत हस कि मेंह निरासा के दिन के ईछा नइं करे हंव।

मोर मुहूं ले जऊन बात निकलथे, ओला तेंह जानत हस।

17मोर बर एक आतंक झन बन;

बिपत्ति के दिन म तेंह मोला सरन देवइया अस।

18मोला सतानेवालामन लज्जित होवंय,

पर मोला लज्जित होय ले बचा;

मोला सतानेवालामन भयभीत होवंय,

पर मोला भयभीत होय ले बचा।

ओमन ऊपर दू गुना बिपत्ति लान;

ओमन ला चकनाचूर कर दे।

बिसराम दिन ला पबितर मनई

19यहोवा ह मोला ये कहिस: “जा अऊ मनखेमन1 के प्रवेस बर जऊन दुवार हे, उहां ठाढ़ हो जा, जिहां ले यहूदा के राजामन भीतर-बाहिर आथें-जाथें; यरूसलेम के आने जम्मो दुवारमन करा घलो ठाढ़ हो जा, 20अऊ ओमन ले कह, ‘हे यहूदा के राजामन अऊ जम्मो यहूदीमन अऊ यरूसलेम के जम्मो रहइयामन, जऊन मन ये दुवारमन ले आथव, यहोवा के बचन ला सुनव। 21यहोवा ह ये कहत हे: सावधान रहव, बिसराम के दिन कोनो बोझा ला झन उठावव या कोनो बोझा यरूसलेम के दुवारमन ले झन लानव। 22बिसराम के दिन अपन घर ले कोनो बोझा ला बाहिर झन लानव या कोनो काम झन करव, पर जइसने कि मेंह तुम्हर पुरखामन ला हुकूम देय रहेंव, बिसराम के दिन ला पबितर माने करव। 23तभो ले ओमन नइं सुनिन या धियान नइं दीन; ओमन हठी रिहिन अऊ ताड़ना देय ले घलो बात ला नइं सुनिन या नइं मानिन। 24पर यदि तुमन सावधानी से मोर बात ला मानव, यहोवा ह ये घोसना करत हे, अऊ बिसराम के दिन ये सहर के दुवारमन ले कोनो बोझा ला झन लानव, पर बिसराम के दिन ला कोनो काम नइं करे के दुवारा पबितर मानव, 25तब ओ राजा, जऊन मन दाऊद के सिंघासन म बईठहीं, ओमन अपन करमचारीमन संग ये सहर के दुवारमन ले आहीं। ओमन अऊ ओमन के करमचारीमन रथ अऊ घोड़ामन म सवार होके आहीं, अऊ ओमन के संग यहूदा के मनखे अऊ यरूसलेम के रहइया मनखेमन घलो आहीं, अऊ ये यरूसलेम सहर म मनखेमन हमेसा बसे रहिहीं। 26मनखेमन यहूदा के नगरमन ले अऊ यरूसलेम के आसपास के गांवमन ले, बिनयामीन के छेत्र अऊ पछिम के पहाड़ी छेत्र ले, पहाड़ी देस अऊ नेगेव2 ले, होम-बलिदान अऊ बलिदान, अन्न-बलिदान अऊ लोहबान, अऊ धनबाद-बलिदान लेके यहोवा के घर म आहीं। 27पर यदि तुमन मोर बात ला नइं मानहू अऊ बिसराम के दिन यरूसलेम के दुवारमन ले कोनो बोझा उठाके आय के दुवारा बिसराम के दिन ला अपबितर करहू, त फेर मेंह यरूसलेम के कपाटमन म अइसने आगी लगाहूं, जऊन ह नइं बुताही अऊ यरूसलेम के महलमन ला जलाके भसम कर दीही।’ ”