यसायाह 8

यसायाह अऊ ओकर बेटामन चिनहां के रूप म

1यहोवा ह मोला कहिस, “एक ठन बड़खा चामपट्टी ले अऊ ओमा एक सधारन कलम ले ये लिख: महेर-सालाल-हास-बज।”1 2मेंह उरियाह पुरोहित अऊ जेबेरेकियाह के बेटा जकरयाह ला मोर भरोसा के लईक गवाह के रूप म बलाएंव। 3तब मेंह अपन घरवाली2 करा गेंव, अऊ ओह गरभ म होईस अऊ एक बेटा ला जनम दीस। अऊ यहोवा ह मोला कहिस, “ओकर नांव महेर-सालाल-हास-बज रख। 4काबरकि एकर पहिली कि ओ लड़का ह दाई अऊ ददा कहे बर सीखय, दमिस्क अऊ सामरिया दूनों के धन-दौलत ला अस्सूर के राजा ह लूटके ले जाही।”

5यहोवा ह फेर मोला कहिस:

6“काबरकि मनखेमन सीलोह के

धीरे-धीरे बोहावत पानी ला अस्वीकार करे हवंय

अऊ रसीन अऊ रमलियाह के बेटा के संग

एका करके आनंद मनावत हें,

7एकरसेति परभू ओमन ऊपर

फरात नदी के भयंकर बाढ़ के पानी लानेचवाला हे—

याने कि अस्सूर के राजा ला ओकर पूरा परताप के संग ले आही।

येकर जम्मो नहर म पूरा आ जाही,

अऊ ओमन के किनारा म पानी चढ़ जाही

8अऊ यहूदा ऊपर पानी चढ़ जाही, ओकर ऊपर बढ़त जाही,

येकर ऊपर ले जावत घेंच तक आ जाही।

येकर बाहिर फईले डेनामन तुम्हर देस के चौड़ई ला ढांप दीहीं,

इमानुएल3!”

9हे जाति-जाति के मनखेमन, लड़ई बर चिचियावव,4 अऊ कुटा-कुटा हो जावव!

हे दूरिहा-दूरिहा के जम्मो देसमन, सुनव।

लड़ई बर तियारी करव, अऊ कुटा-कुटा हो जावव!

लड़ई बर तियारी करव, अऊ कुटा-कुटा हो जावव!

10तुमन लड़ई के योजना बनावव, पर ओह बेकार हो जाही;

तुमन कुछू घलो कहव, पर तुम्हर कहे ह नइं ठहिरय,

काबरकि परमेसर ह हमर संग हवय।5

11अपन मजबूत हांथ मोर ऊपर रखके यहोवा ह मोला ये मनखेमन के रसता म नइं चले के चेतउनी देवत कहत हे:

12“हर ओ चीज ला सडयंत्र झन कहव

जेला ये मनखेमन एक सडयंत्र कहिथें;

ओ चीज ले झन डरव, जऊन चीज ले ओमन डराथें,

अऊ ओकर ले भयभीत झन होवव।

13सर्वसक्तिमान यहोवा ही ओ अय, जेकर एक पबितर परमेसर के रूप म तें आदर कर।

ओकरेच ले ही तेंह डर,

अऊ ओकरेच भय मान।

14ओह एक पबितर जगह होही;

इसरायल अऊ यहूदा दूनों घराना बर ओह एक ठन पथरा होही,

जऊन ह मनखेमन के लड़खड़ाय के

अऊ एक चट्टान, जऊन ह ओमन के गिरे के कारन बनही।

अऊ यरूसलेम के मनखेमन बर

ओह एक फंदा अऊ एक जाल होही।

15ओमा के कतको झन ठोकर खाहीं;

ओमन गिरहीं अऊ चकनाचूर हो जाहीं,

ओमन फंदा म फंसहीं अऊ धरे जाहीं।”

16चेतउनी के ये गवाही ला बंद कर देवव

अऊ मोर चेलामन के बीच परमेसर के सिकछा म मुहर लगा देवव।

17मेंह ओ यहोवा के रसता देखहूं,

जऊन ह याकूब के संतानमन ले अपन मुहूं ला लुकाय हवय।

मेंह ओकर ऊपर अपन भरोसा रखहूं।

18देख, मेंह इहां हवंव अऊ जऊन लइकामन ला यहोवा ह मोला देय हवय, ओमन घलो हवंय। सर्वसक्तिमान यहोवा, जऊन ह सियोन पहाड़ म निवास करथे, ओकर कोति ले हमन इसरायलीमन बर चिनहां अऊ प्रतीक अन।

अंधियार ह अंजोर हो जाथे

19जब कोनो मनखे तुमन ला ओ ओझा अऊ टोनहामन करा जाके पुछे बर कहय, जेमन फुसफुसाथें अऊ बड़बड़ाथें, तब तुमन अइसन मनखे ले कहव, “का मनखेमन ला अपन परमेसर करा जाके नइं पुछना चाही? जीयत मनखेमन बर मुरदामन ले काबर पुछन?” 20परमेसर के सिकछा अऊ चेतउनी के गवाही ऊपर धियान देवव। यदि कोनो मनखे ये बचन के मुताबिक नइं बोलय, त ओकर करा बिहान के अंजोर नइं ए। 21दुख-तकलीफ अऊ भूख म, ओमन देस म एती-ओती फिरत रहिहीं; अऊ जब ओमन भूखन मरहीं, त ओमन गुस्सा करहीं अऊ, ऊपर कोति देखके अपन राजा अऊ अपन परमेसर ला सराप दीहीं। 22तब ओमन धरती कोति नजर करहीं अऊ ओमन ला सिरिप दुख अऊ अंधियार अऊ भयानक अंधियार दिखाई दीही, अऊ ओमन ला घोर अंधियार म ढकेल दिये जाही।