यसायाह 65

नियाय अऊ उद्धार

1“मेंह अपनआप ला ओमन ऊपर परगट करेंव, जऊन मन मोर बारे म नइं पुछिन;

ओमन मोला पा गीन, जऊन मन मोला नइं खोजत रिहिन।

ओ जाति के मनखे, जेमन मोर नांव ला नइं पुकारिन,

ओमन ला मेंह कहेंव, ‘देखव, में इहां हंव, में इहां हंव।’

2मेंह एक हठी जाति के मनखेमन कोति

दिन भर अपन हांथ ला पसारे रहेंव,

जेमन अपन खुद के कल्पना के मुताबिक

बुरई के रद्दा म रेंगथें—

3अइसन मनखे, जेमन मोर आंखी के आघू म ही

बारीमन म बलिदान चघाके

अऊ ईंटा के बेदीमन म धूप जलाके,

मोला लगातार रिस देवाथें।

4येमन कबरमन के बीच बईठथें

अऊ अपन रातमन ला गुपत रतजगा करके काटथें;

जेमन सूरा के मांस खाथें,

अऊ जेमन के बरतन म असुध मांस के रसा रहिथे;

5जेमन आने मन ला कहिथें, ‘हट जा; मोर तीर म झन आ,

काबरकि में तोर ले बहुंत पबितर हंव!’

अइसन मनखे मोर नाक म धुआं,

अऊ ओ आगी सहीं अंय, जऊन ह दिन भर बरत रहिथे।

6“देखव, ये बात मोर आघू म लिखाय हे:

में चुप नइं रहंव, पर येकर पूरा बदला लूहूं;

मेंह ओमन के गलत काममन के बदला ओमन के गोदी म डाल दूहूं—

7तुम्हर पाप अऊ तुम्हर पुरखामन के पाप ला,”

यहोवा ह कहिथे।

“काबरकि ओमन पहाड़मन ऊपर धूप जलाईन

अऊ पहाड़ीमन ऊपर मोर निन्दा करिन,

में ओमन के पहिले के काममन के पूरा बदला

ओमन के गोदी म तऊलके दूहूं।”

8यहोवा ह ये कहत हे:

“जइसन जब अंगूर के गुच्छा म अंगूर के रस भराय रहिथे,

तब मनखेमन कहिथें, ‘येला बरबाद झन करव,

येमा अभी भी आसीस हवय,’

वइसन ही में अपन सेवकमन बर करहूं;

में ओ सब झन ला नास नइं करंव।

9में याकूब म ले संतान लानहूं,

अऊ यहूदा ले ओमन ला, जेमन मोर पहाड़मन ऊपर अधिकार रखहीं;

मोर चुने मनखेमन ओमन के वारिस होहीं,

अऊ मोर दासमन उहां निवास करहीं।

10मोर मनखे, जऊन मन मोला खोजथें,

ओमन के भेड़-बकरीमन बर सारोन ह एक चरागन होही,

अऊ आकोर के घाटी ह ओमन के गरूवा-बईलामन के अराम करे के जगह होही।

11“पर जहां तक तुम्हर बात ए, जऊन मन यहोवा ला छोंड़ देथव

अऊ मोर पबितर पहाड़ ला भुला जाथव,

जऊन मन भाग्य देवता बर मेज ऊपर खाय के चीज सजाथें

अऊ तकदीर बर मसाला मिलाय अंगूर के मंद कटोरामन म भरथें,

12में तुमन ला तलवार के कौंरा बनाहूं,

अऊ तुमन जम्मो झन के मुड़ काटे जाही;

काबरकि मेंह तुमन ला बलांय, पर तुमन जबाब नइं देव,

मेंह बोलेंव, पर तुमन नइं सुनेव।

तुमन मोर नजर म दुस्ट काम करेव

अऊ जेकर ले में नाखुस होथंव, ओही ला तुमन चुनेव।”

13एकर कारन परमपरधान यहोवा ह ये कहत हे:

“देखव, मोर सेवकमन तो खाहीं,

पर तुमन भूखन रहिहू;

मोर सेवकमन पीहीं,

पर तुमन पीयासन रहिहू;

मोर सेवकमन आनंद मनाहीं,

पर तुमन लज्जा म पड़हू।

14मोर सेवकमन अपन मन के

खुसी के मारे गीत गाहीं,

पर मन म दुख के कारन

तुमन रोहू

अऊ टूटे मन के कारन बिलाप करहू।

15तुमन अपन नांव ला छोंड़हू

काबरकि मोर चुने मनखेमन तुम्हर नांव ले लेके सराप दीहीं;

परमपरधान यहोवा ह तुमन ला नास कर दीही,

पर अपन सेवकमन के ओह दूसर नांव रखही।

16जऊन कोनो देस म आसीस मांगथे

ओह सच्चा परमेसर के नांव लेके अइसने करही;

जऊन कोनो देस म किरिया खाथे

ओह सच्चा परमेसर के नांव म किरिया खाही।

काबरकि पहिली के दुखमन भुला दिये जाहीं

अऊ मोर आंखी ले लुका जाहीं।

नवां अकास अऊ नवां धरती

17“देखव, मेंह नवां अकास

अऊ नवां धरती के सिरिस्टी करहूं।

अऊ पहिली के चीजमन ला सुरता नइं करे जाही,

अऊ न ही ओमन मनखे के मन म आहीं।

18एकर कारन जऊन कुछू के मेंह सिरिस्टी करथंव,

ओमा सदा खुस रहव अऊ आनंदित रहव,

काबरकि देखव, में यरूसलेम ला खुसी बर

अऊ येकर मनखेमन ला आनंद बर बनाहूं।

19में यरूसलेम ऊपर आनंदित होहूं

अऊ अपन मनखेमन ले खुस होहूं;

येमा रोय अऊ नरियाय के अवाज

फेर सुनाई नइं पड़ही।

20“ओमा फेर न तो कुछू दिन के लइका,

अऊ न अइसन बुढ़वा मरही

जऊन ह अपन उमर पूरा नइं करे होही;

काबरकि जऊन ह लड़कपन म मरइया हे

ओह सौ बछर के होके मरही,

पर जऊन ह सौ बछर के पहिले मरही,

ओह सापित समझे जाही।

21ओमन घर बनाके ओमा बसहीं;

ओमन अंगूर के बारी लगाके ओकर फर खाहीं।

22अइसन नइं होवय कि ओमन बनावंय अऊ दूसरमन ओमा बसंय,

या ओमन रूख लगांय, अऊ दूसरमन खावंय।

काबरकि जतका उमर रूख के होही,

ओतका मोर मनखेमन के उमर होही;

मोर चुने गय मनखेमन अपन हांथ के काम के

लम्बा समय तक आनंद उठाहीं।

23ओमन के मेहनत ह बेकार नइं होवय,

न ओमन के लइकामन दुख झेले बर पईदा होहीं;

काबरकि ओमन यहोवा के दुवारा आसीसित मनखे होहीं,

ओमन अऊ ओमन के लइकामन घलो आसीसित होहीं।

24ओमन के पुकारे के पहिली ही में ओमन ला उत्तर दूहूं;

ओमन के गोठियावत बेरा ही, में ओमन के सुन लूहूं।

25भेड़िया अऊ मेढ़ा-पीला एके संग चरहीं,

अऊ सिंह ह बईला सहीं भूंसा खाही,

अऊ सांप के जेवन धुर्रा होही।

मोर जम्मो पबितर पहाड़ ऊपर

न तो कोनो चोट पहुंचाहीं अऊ न ही नुकसान करहीं,”

यहोवा ह कहत हे।