यसायाह 59

पाप, पछताप अऊ छुटकारा

1खचित, यहोवा के हांथ अइसन छोटे नइं हो गे हवय कि तुम्हर उद्धार नइं कर सकय,

न ही ओह अइसन भैंरा हो गे हवय कि सुन नइं सकय।

2पर तुम्हर अधरम के काममन

तुमन ला तुम्हर परमेसर ले अलग कर दे हवंय;

तुम्हर पापमन ओकर मुहूं ला तुम्हर ले छुपा रखे हें,

जेकर कारन ओह नइं सुनय।

3काबरकि तुम्हर हांथमन म खून,

अऊ तुम्हर अंगठीमन म अधरम के धब्बा लगे हवय।

तुम्हर मुहूं ह लबारी बात कहे हवय,

अऊ तुम्हर जीभ ले खराप बात निकलथे।

4कोनो नियाय के बात नइं करंय;

न कोनो सच्चई ले मुकदमा लड़ंय।

ओमन लबारी बात ऊपर भरोसा रखथें; ओमन लबारी बात कहिथें;

ओमन समस्या ला गरभ म धरथें अऊ पाप ला जनम देथें।

5ओमन करैत सांप के अंडा ला सेथें

अऊ मेकरा के जाली बनाथें।

जऊन कोनो ओमन के अंडा ला खाथे, ओह मर जाथे,

अऊ जब कोनो एक ठन ला फोरे जाथे, त ओमा ले बिसैला सांप के पीला निकलथे।

6ओमन के बुने जालीमन ओनहा के काम नइं आवंय;

अऊ ओमन जऊन कुछू बनाथें, ओकर ले अपनआप ला ढांप नइं सकंय।

ओमन के काममन दुस्टता के काम अंय,

अऊ ओमन के हांथ ले हिंसा के काम होथे।

7ओमन के गोड़मन बुरई करे बर दऊड़थें;

ओमन निरदोस के हतिया करे बर तियार रहिथें।

ओमन दुस्ट साजिस करे म लगे रहिथें;

हिंसा के काममन ले ओमन के डहार भरे हवय।

8सांति के डहार ला ओमन नइं जानंय;

ओमन के सुभाव म नियाय के बात नइं ए।

ओमन अपन डहारमन ला बेईमानी के सड़क बना ले हवंय;

ओमन के संग रेंगइया कोनो भी मनखे सांति के बात नइं जानंय।

9एकर कारन ले नियाय ह हमन ले दूरिहा हवय,

अऊ धरमीपन हमर मेर नइं आवय।

हमन अंजोर के डहार तो देखथन, पर देखव अंधियार ही बने रहिथे;

हमन अंजोर के आसा तो लगाय हवन, पर घोर अंधियार म रेंगथन।

10हमन अंधरा सहीं दीवार पकड़के टमड़त रहिथन,

हमन बिन आंखी के मनखे सहीं महसूस करथन।

गोधूलि के बेरा सहीं, हमन दिन-दुपहरी म हपटत रहिथन,

हट्टा-कट्टामन के बीच म हमन मुरदा सहीं हवन।

11हमन सब के सब भालू सहीं गुर्राथन;

अऊ पंड़की सहीं सोक करत बिलाप करथन।

हमन नियाय के डहार तो देखथन, पर नियाय नइं मिलय;

हमन छुटकारा के तो डहार देखथन, पर ओह हमन ले दूरिहा ही रहिथे।

12काबरकि हमर अपराध तोर नजर म बहुंत हो गे हवय,

हमर पापमन हमर बिरूध म साखी देथें।

हमर अपराधमन हमेसा हमर संग हवंय,

अऊ हमन अपन अधरम के काम ला मान लेथन:

13यहोवा के बिरूध बिदरोह अऊ धोखा,

अपन परमेसर कोति अपन पीठ देखई,

बिदरोह अऊ अतियाचार करई,

अपन मन म रखे लबरा बात कहई।

14एकरसेति नियाय ह पाछू हट जावत हे,

अऊ धरमीपन ह दूरिहा म ठाढ़ रहिथे;

सच्चई ह गलीमन म गिर गे हवय,

ईमानदारी आ नइं सकय।

15सच्चई कहूं नइं ए,

अऊ जऊन ह बुरई ले भागथे, ओह खुद सिकार हो जाथे।

यहोवा ह देखिस अऊ ओला ये बात बने नइं लगिस

कि उहां नियाय नइं रिहिस।

16ओह देखिस कि उहां कोनो नइं एं,

अऊ ओह अचम्भो करिस कि कोनो बिचवई करइया नइं एं;

तब ओह अपन ही भुजबल ले ओकर बर उद्धार के काम ला करिस,

अऊ अपन ही धरमीपन म ओला संभालिस।

17ओह धरमीपन ला झिलम के सहीं पहिर लीस,

अऊ ओकर मुड़ म उद्धार के टोप राखे गीस;

ओह बदला लेय के ओनहा पहिरिस

अऊ उत्साह के पहिरावा ला अपन म लपेट लीस।

18ओमन के करम के मुताबिक

ओह ओमन ला फर दीही,

ओकर बईरीमन ऊपर कोप भड़कही

अऊ अपन बिरोधीमन ले बदला लीही;

ओह द्वीप म रहइयामन ला ओमन के काम के परतिफल दीही।

19तब पछिम कोति मनखेमन यहोवा के नांव के भय मानहीं,

अऊ पूरब कोति ओकर महिमा के आदर होही।

काबरकि ओह बाढ़ के पानी सहीं आही

तब यहोवा के आतमा ह ओला भगाही।

20“छुड़इया ह सियोन मेर ओमन करा आही, जेमन याकूब म हवंय

अऊ अपन पाप ले मन फिराथें,”

यहोवा ह घोसना करत हे।

21“जहां तक मोर बात ए, येह ओमन के संग मोर करार ए,” यहोवा ह कहत हे। “मोर आतमा, जऊन ह तोर ऊपर हवय, ओह तोर ले अलग नइं होवय, अऊ मोर जऊन बचन, मेंह तोर मुहूं म डारे हंव, ओह तोर मुहूं म, तोर लइकामन के मुहूं म अऊ ओमन के संतानमन के मुहूं म अब ले लेके हमेसा रहिही,” यहोवा ह कहत हे।