होसे 8

इसरायल के फर भोगई

1“तुरही ला अपन ओंठ म रखव!

एक गिधवा ह यहोवा के घर ऊपर हवय

काबरकि मोर मनखेमन मोर करार ला टोरे हवंय

अऊ मोर कानून के बिरूध बिदरोह करे हवंय।

2इसरायल ह मोला पुकारके कहत हे,

‘हे हमर परमेसर, हमन तोला मानथन!’

3पर इसरायल ह भलई ला अस्वीकार करे हवय;

एक बईरी ह ओकर पीछा करही।

4ओमन मोर बिगर सहमती के राजामन ला ठहिराथें,

ओमन बिगर मोर सहमती के हाकिममन ला चुनथें।

ओमन अपन सोन अऊ चांदी ले

अपन बिनास बर

मूरतीमन ला बनाथें।

5हे सामरिया, अपन बछवा के मूरती ला बाहिर फटिक दे!

मोर गुस्सा ओमन ऊपर भड़कत हे।

ओमन कब तक सुध होय के काबिल नइं होहीं?

6ओमन इसरायल के अंय!

ये बछवा—एक कारीगर ह येला बनाय हवय;

येह परमेसर नो हय।

सामरिया के ओ बछवा ला

कुटा-कुटा कर दिये जाही।

7“ओमन हवा ला बोथें,

अऊ बवंडर रूपी फसल लूथें।

फसल के डंठल म बाली नइं ए;

येमा ले पीसान नइं मिलय।

कहूं येकर ले अनाज पईदा होतिस,

त परदेसीमन ओला खा जातिन।

8इसरायल ला लील लिये गे हवय;

अब ओह जाति-जाति के मनखेमन के बीच म अइसन हवय

जऊन ला कोनो पसंद नइं करंय।

9काबरकि ओमन एक भटके जंगली गदहा सहीं

अस्सूर देस चले गे हवंय।

एपरैम ह अपनआप ला मयारूमन के हांथ म बेच दे हवय।

10हालाकि ओमन अपनआप ला जाति-जाति के मनखेमन के बीच म बेच दे हवंय,

तभो ले मेंह अब ओमन ला एक संग इकट्ठा करहूं।

सक्तिसाली राजा के सताव के कारन

ओमन नास होय लगहीं।

11“हालाकि एपरैम ह पाप-बलिदान बर बहुंत अकन बेदीमन ला बनाईस,

पर ये बेदीमन ओकर पाप करे के कारन बन गे हवंय।

12मेंह ओमन बर अपन कानून के बहुंत बात लिखेंव,

पर ओमन ओ बातमन ला बाहिर के समझिन।

13हालाकि ओमन भेंट के रूप म बलिदान चघाथें,

अऊ हालाकि ओमन मांस खाथें,

पर यहोवा ह ओमन ले खुस नइं ए।

अब ओह ओमन के दुस्टता के काममन ला सुरता करही

अऊ ओमन के पाप खातिर सजा दीही:

ओमन मिसर देस ला लहुंटहीं।

14इसरायल ह अपन बनानेवाला ला भुला गे हवय

अऊ महलमन ला बनाय हवय;

यहूदा ह बहुंते नगरमन ला किलाबंदी करे हवय।

पर मेंह ओमन के सहरमन म आगी लगा दूहूं

जेकर ले ओमन के गढ़मन जलके भसम हो जाहीं।”