होसे 6

पछताप नइं करइया इसरायल

1“आवव, हमन यहोवा कोति लहुंटन।

ओह हमन ला चीरके कुटा-कुटा कर दे हवय

पर ओह हमन ला चंगा करही;

ओह हमन ला चोट पहुंचाय हवय

पर ओहीच ह हमर घावमन म मरहम पट्टी करही।

2दू दिन के बाद ओह हमन म सुधार लानही;

अऊ तीसर दिन ओह हमन ला पहिले सहीं कर दीही,

ताकि हमन ओकर आघू म बने रहन।

3आवव, हमन यहोवा ला मान लेवन;

आवव, हमन ओला जाने बर कोसिस करन।

जइसन कि सूरज के निकलई ह निस्चित अय,

वइसने ही ओह घलो निस्चय परगट होही;

ओह हमर करा ठंड के बरसात सहीं,

बसन्त रितु के ओ बरसात सहीं आही, जऊन ह धरती ला पलोथे।”

4“हे एपरैम, मेंह तोर बर का कर सकत हंव?

हे यहूदा, मेंह तोर बर का कर सकत हंव?

तुम्हर मया ह बिहनियां के कुहरा के असन,

बड़े बिहनियां पड़नेवाला ओ ओस असन अय, जऊन ह गायब हो जाथे।

5ये खातिर मेंह तुमन ला अपन अगमजानीमन के दुवारा काटके कुटा-कुटा कर डारेंव,

मेंह अपन मुहूं के बात ले तुमन ला मार डारेंव—

तब मोर नियाय ह सूरज के सहीं आघू बढ़थे।

6काबरकि मेंह बलिदान ले नइं, पर दया ले,

अऊ होम-बलिदान के बदला परमेसर ला माने ले खुस होथंव।

7पर आदम1 असन, ओमन करार ला टोर दे हवंय;

ओमन उहां मोर संग बिसवासघात करे रिहिन।

8गिलाद दुस्ट काम करइयामन के एक सहर अय,

उहां लहू ले भरे मनखेमन के चले के निसान हवय।

9जइसने लुटेरामन अपन सिकार बर लुकाके घात म रहिथें,

वइसनेच पुरोहितमन के दल ह करथे;

ओमन अपन दुस्ट योजना ला पूरा करत

सकेम सहर के रद्दा म हतिया करथें।

10इसरायल म मेंह एक भयानक चीज देखे हंव:

उहां एपरैम ला बेस्यागमन बर दिये जाथे,

अऊ इसरायल ह असुध होथे।

11“हे यहूदा, तोर बर घलो

कटनी के एक समय ठहिराय गे हवय।

“जब मेंह अपन मनखेमन के बने दिनमन ला लहुंटा लाहूं,