यहेजकेल 31

फिरौन ह लबानोन के एक गिरे देवदार के रूख के रूप म

1गियारहवां बछर के, तीसरा महिना के पहिला दिन, यहोवा के बचन ह मोर मेर आईस: 2“हे मनखे के बेटा, मिसर के राजा फिरौन अऊ ओकर उपदरवी मनखेमन ले कह:

“ ‘तोर गौरव के तुलना काकर संग करे जाय?

3अस्सूर ऊपर बिचार कर, जऊन ह एक समय लबानोन के एक देवदार रिहिस,

ओकर डारामन सुघर अऊ जंगल ला छइहां देवंय;

येह बहुंत ऊंच रिहिस,

अऊ ओकर टीप ह घना पानमन ऊपर रिहिस।

4पानी ले येकर सिंचई होवत रिहिस,

गहिला सोतामन येला ऊपर बढ़ाईन;

ओकर सोतामन येकर अधार के

चारों कोति बहत रिहिन

अऊ ओमन के धारामन मैदान के

जम्मो रूखमन तक जावंय।

5एकरसेति मैदान के जम्मो रूखमन ले

येह ऊंच हो गीस;

येकर डारामन बहुंत होय लगिन

अऊ येकर डारामन बढ़के लम्बा हो गीन,

काबरकि उहां बहुंत पानी रिहिस।

6अकास के जम्मो चिरई

ओकर डारामन म बसेरा करत रिहिन,

ओकर डारामन के खाल्हे म

जम्मो जंगली पसुमन पीला जनमात रिहिन;

जम्मो बड़े जातिमन

ओकर छइहां म रहत रिहिन।

7येह अपन फईले डारामन के संग,

सुघरता म सोभायमान रिहिस,

काबरकि येकर जरीमन खाल्हे

भरपूर पानी के सोतामन तक गे रिहिन।

8परमेसर के बारी के देवदार रूखमन

येकर तुलना म कुछू नइं रिहिन,

न ही सनोवरमन येकर

डारामन के बरोबरी कर सकत रिहिन,

न ही अरमोन रूखमन के तुलना

येकर डारामन ले करे जा सकत रिहिस—

परमेसर के बारी के कोनो भी रूख

येकर सुघरता के बरोबरी नइं कर सकत रिहिन।

9मेंह बहुंत डारामन के संग

येला सुघर बनांय,

परमेसर के बारी, अदन के जम्मो रूख

येकर ले जलन करत रिहिन।

10“ ‘एकरसेति परमपरधान यहोवा ह ये कहत हे: काबरकि बड़े देवदार ह घना पानमन के ऊपर बाढ़िस, अऊ काबरकि येला अपन ऊंचई के घमंड रिहिस, 11एकरसेति मेंह ओला जाति-जाति के मनखेमन ऊपर सासन करइयामन के हांथ म कर देंव, ताकि ओकर संग ओकर दुस्टता के मुताबिक बरताव करे जावय। मेंह ओला अलग फटिक देंव, 12अऊ परदेस के जाति-जाति के बीच म, जेमन सबले जादा निरदयी अंय, ओमन ओला काटके छोंड़ दीन। ओकर डारामन पहाड़मन म, अऊ सबो घाटीमन म गिरिन; ओकर साखामन देस के सबो घाटीमन म टूटे पड़े रिहिन। अऊ जाति-जाति के जम्मो मनखेमन ओकर छइहां ले निकल आईन अऊ ओला छोंड़ दीन। 13ओ गिरे रूख म जम्मो चिरई बसेरा करे लगिन, अऊ जम्मो पसुमन ओकर डारामन के बीच रहे लगिन। 14एकरसेति पानी के लकठा म आने कोनो रूख घना पानमन के बीच अपन टीप ला ऊपर करत घमंड से ऊंच झन होवय। भरपूर पानी के लकठा के कोनो आने रूख अइसन ऊंच झन होवय; ओ जम्मो के मरना जरूरी अय, काबरकि ओमन के जगह धरती के खाल्हे ओ मरनहार मनखेमन के बीच हवय, जेमन मिरतू-लोक म खाल्हे जाथें।

15“ ‘परमपरधान यहोवा ह ये कहत हे: जऊन दिन येला मिरतू-लोक म खाल्हे उतारे गीस, ओ दिन मेंह येकर बर सोक के संग गहिला सोतामन ला ढांप देंव, अऊ येकर सोतामन ला रोक देंव, अऊ येकर भरपूर पानी के सोतामन बंद हो गीन। येकर कारन मेंह लबानोन म उदासी ले आंय, अऊ मैदान के सबो रूखमन मुरझा गीन। 16मेंह येकर गिरे के अवाज ले जाति-जाति के मनखेमन ला कंपा देंव, जब मेंह येला मिरतू-लोक म खाल्हे लानेंव, ताकि येह ओमन के संग रहय, जेमन खाल्हे कबर म जाथें। तब अदन के बारी के जम्मो रूख, लबानोन के चुने अऊ सबले बने, भरपूर पानी ले पलोय गय रूखमन ला धरती के खाल्हे म सांतवना मिलिस। 17बड़े देवदार के रूख सहीं, ओमन घलो ओ मिरतू-लोक म खाल्हे गीन, जेमन तलवार ले मारे गे रिहिन; संग म ओ हथियारबंद आदमीमन घलो रिहिन, जेमन जाति-जाति के मनखेमन के बीच येकर छइहां म रहत रिहिन।

18“ ‘सोभा अऊ गौरव म, अदन के कोन रूख के तुलना तोर ले करे जा सकत हे? तभो ले तोला भी अदन के रूखमन के संग धरती के खाल्हे लाय जाही; तें ओ खतनारहित मनखेमन के बीच पड़े रहिबे, जेमन तलवार ले मारे गे हवंय।

“ ‘अइसने फिरौन अऊ ओकर जम्मो उपदरवी मनखेमन के संग होही, परमपरधान यहोवा ह घोसना करत हे।’ ”