यहेजकेल 19

इसरायल के हाकिममन बर बिलाप

1“इसरायल के हाकिममन के संबंध म एक बिलापगीत लेय ले 2अऊ कह:

“ ‘सिंहमन के बीच

तोर दाई ह एक अद्भूत सिंहनी रिहिस!

ओह ओमन के बीच म लेटय

अऊ अपन पीलामन के पालन-पोसन करय।

3ओह अपन पीलामन ले एक ठन ला पालके बड़े करिस,

अऊ ओह एक बलवान सिंह हो गीस।

ओह सिकार करे बर सीख गीस

अऊ ओह आदमी के मांस खानेवाला हो गीस।

4जाति-जाति के मनखेमन ओकर बारे म सुनिन,

अऊ ओह ओमन के दुवारा खोदे गय खंचवा म गिरके फंस गीस।

ओमन ओकर ऊपर नकेल डालके

ओला मिसर देस ले गीन।

5“ ‘जब सिंहनी ह देखिस कि ओकर आसा ह पूरा नइं होईस,

ओकर आसा ह टूट गीस,

तब ओह अपन एक ठन अऊ पीला ला लीस

अऊ ओला एक बलवान सिंह बनाईस।

6ओह आने सिंहमन के बीच म चले-फिरे लगिस,

काबरकि अब ओह एक बलवान सिंह हो गे रिहिस।

ओह सिकार करे बर सीख गीस

अऊ ओह एक आदमी के मांस खानेवाला बन गीस।

7ओह ओमन के गढ़मन ला टोर दीस

अऊ ओमन के नगरमन ला उजाड़ दीस।

पूरा देस अऊ ओमा रहइया जम्मो झन

ओकर गरजे ले डरात रिहिन।

8तब ओकर चारों कोति के

जाति-जाति के मनखेमन ओकर बिरूध हो गीन।

ओमन ओकर बर जाल बिछाईन,

अऊ ओह ओमन के कोड़े गय खंचवा म फंस गीस।

9ओमन नकेल डालके ओला ऊपर खींचिन अऊ ओला एक ठन पिंजरा म डाल दीन

अऊ ओला बेबिलोन के राजा करा ले गीन।

ओमन ओला जेल म डाल दीन,

जेकर कारन ओकर गरजन

इसरायल के पहाड़मन म फेर कभू सुनई नइं दीस।

10“ ‘तोर दाई ह पानी के तीर म लगाय गय

तोर अंगूर के बारी म अंगूर के एक नार सहीं रिहिस;

बहुंत पानी होय के कारन

ओमा फर लगत रिहिस अऊ ओह डारामन ले भरे रिहिस।

11ओकर डारामन मजबूत रिहिन,

अऊ एक सासन करइया के राजदंड सहीं रिहिन।

बहुंत पानमन के ऊपर

येह ऊंच बाढ़े रिहिस,

अपन ऊंचई के कारन

बहुंत डारामन के बीच येह साफ दिखत रिहिस।

12पर ओ अंगूर के नार ला कोरोध म उखान दिये गीस

अऊ भुइयां म फटिक दिये गीस।

पूरबी हवा ह ओला सूखा दीस,

ओकर फरमन गिर गीन;

ओकर मजबूत डालीमन सूख गीन

अऊ आगी ले जलके ओमन नास हो गीन।

13अब ओला निरजन जगह म लगाय गे हवय,

एक सूखा अऊ निरजल भुइयां म।

14ओकर एक ठन मुख्य डारा ले आगी ह फईलिस

अऊ ओकर फरमन ला जलाके नास कर दीस।

ओमा अऊ कोनो मजबूत डाली नइं बचिस

जऊन ह सासन करइया के राजदंड बर सही होतिस।’

येह एक बिलापगीत अय अऊ येकर उपयोग एक बिलापगीत के रूप म करे जावय।”