सभोपदेसक 6

1मेंह एक आने खराप बात धरती म देखे हंव, अऊ येह मानव-जाति ऊपर बहुंत परभाव डालथे: 2परमेसर ह कुछू मनखे ला धन-संपत्ति, अधिकार अऊ आदर देथे, जेकर कारन ओकर करा ओकर मनचाहे चीजमन रहिथें, पर परमेसर ह ओमन ला ओ चीजमन के आनंद उठाय के योग्यता नइं देवय, अऊ अजनबीमन ओ चीजमन के आनंद उठाथें। येह बेकार ए, एक बहुंत खराप बात ए।

3एक मनखे के एक सौ लइका हो सकथें अऊ ओह बहुंत साल तक जी सकथे; चाहे ओह कतको साल जी ले, कहूं ओह अपन धन-संपत्ति के आनंद नइं उठा सकय अऊ मरे के बाद ओला सही ढंग ले माटी नइं मिलय, त मेंह कहिथंव कि एक मरे हुए जनमे लइका ह ओ मनखे ले बेहतर ए, 4ओह बेकार म आथे, ओह अंधियार म चले जाथे, अऊ अंधियार म ओकर नांव छिप जाथे। 5हालाकि ओह सूरज ला कभू नइं देखिस या कुछू भी चीज ला नइं जानिस, तभो ले ओला ओ मनखे ले जादा अराम मिलिस— 6अऊ त अऊ यदि ओ मनखे ह दू बार ले एक-एक हजार साल जीयय, पर अपन धन-संपत्ति के मजा नइं लेवय। का जम्मो झन एक ही जगह म नइं जावंय?

7मनखे के जम्मो मेहनत ओकर जेवन बर होथे,

पर ओकर मन ह कभू नइं भरय।

8बुद्धिमान ह कोन बात म मुरूख ले बढ़के अय?

गरीब ला ये जानके का मिलथे

कि ओला दूसरमन के आघू म कइसे बरताव करना चाही?

9जऊन चीज ला आंखी ह देखथे,

ओह मन के एती-ओती भटकई ले बेहतर अय।

येह घलो बेकार ए,

हवा के पाछू भगई ए।

10जऊन ह पहिले से हवय, ओकर नांव रखे जा चुके हवय,

अऊ ये पता चल चुके हवय कि मनखे ह का सुभाव के अय;

कोनो भी अपन ले जादा सक्तिसाली मनखे ले

लड़ई नइं कर सकय।

11जहां जादा बात होथे

उहां मतलब कम निकलथे,

अऊ ओकर ले कोनो ला का फायदा होथे?

12काबरकि मनखे के जिनगी के ये थोरकन अऊ बेकार दिन, जऊन ह एक छइहां के सहीं निकल जाथे, कोन ह जानथे कि मनखे बर ये जिनगी म का ह बने ए? ओला कोन ह बता सकथे कि संसार ले ओकर जाय के बाद धरती म का होही?