Biblica® सुतंतर समकालीन छत्तीसगढ़ी अनुवाद
आमोस 4
परमेसर करा इसरायल ह नइं लहुंटिस
हे सामरिया के पहाड़ ऊपर रहइया बासान के गायमन1, ये बचन ला सुनव,
हे माईलोगनमन, तुमन जऊन गरीब ला सताथव अऊ जरूरतमंद ला कुचर देथव
अऊ अपन घरवाला ला कहिथव, “हमर पीये बर कुछू लेके आ!”
परमपरधान यहोवा ह अपन पबितरता के किरिया खाके कहत हवय:
“अइसन समय जरूर अवइया हवय,
जब तुमन ला गरी ले,
आखिरी तक बांचे ला घलो मछरी फंसाय के गरी ले फंसाके ले जाय जाही।
तुमन म के जम्मो झन
सहर के दीवार के फाटे म ले सीधा बाहिर निकलहू।
तुमन ला हरमोन कोति फटिक दिये जाही,”
यहोवा ह घोसना करत हे।
“बेतेल नगर म जाके पाप करव;
अऊ गिलगाल नगर म जाके अऊ जादा पाप करव।
अपन बलिदान ला रोज बड़े बिहनियां
अऊ अपन दसमांस ला हर तीसरा साल2 लाने करव।
धनबाद-बलिदान के रूप म खमीर मिले रोटी ला जरोवव
अऊ अपन स्वेच्छा-बलिदान के बारे डींग मारव—
हे इसरायलीमन, ओमन के बारे म घमंड करव,
काबरकि तुमन ला अइसने करई ह बने लगथे,”
परमपरधान यहोवा ह घोसना करत हे।
“मेंह हर सहर म तुमन ला भूखन पेट रखेंव
अऊ हर नगर म जेवन के घटी करेंव,
तभो ले तुमन मोर कोति नइं लहुंटेव।”
यहोवा ह घोसना करत हे।
“जब फसल लुवई ह तीन महिना बांचे रिहिस
तब मेंह बरसा ला रोक दे रहेंव।
में एक नगर म पानी गिरांय,
पर दूसर नगर म नइं गिरांय।
एक खेत म बारिस होईस;
अऊ दूसर म नइं होईस अऊ ओह सूखा गीस।
मनखेमन एक सहर ले दूसर सहर म पानी बर भटकिन
पर पीये बर भरपूर पानी नइं पाईन,
तभो ले तुमन मोर कोति नइं लहुंटेव,”
यहोवा ह घोसना करत हे।
“कई बार मेंह तुम्हर बारी अऊ अंगूर के बारी म फसल नइं होवन दें,
ओमन ला रोग अऊ फफूंदी ले बरबाद कर देंव।
फांफामन तुम्हर अंजीर अऊ जैतून के रूख ला खा डारिन,
तभो ले तुमन मोर कोति नइं लहुंटेव,”
यहोवा ह घोसना करत हे।
“मेंह तुम्हर बीच म महामारी पठोंय
जइसन मेंह मिसर देस म पठोय रहेंव।
मेंह लूटे गय घोड़ामन के संग
तुम्हर जवानमन ला तलवार ले मार डारेंव।
मेंह तुम्हर छावनी के बदबू ले तुम्हर नाक ला भर देंव,
तभो ले तुमन मोर कोति नइं फिरेव।
यहोवा ह घोसना करत हे।
“मेंह जइसन सदोम अऊ अमोरा सहरमन ला नास करेंव
वइसन ही मेंह तुमन म ले कुछू झन ला नास कर देंव।
तुमन आगी ले निकाले बरत लकरी कस रहेव,
तभो ले तुमन मोर कोति नइं फिरेव,”
यहोवा ह घोसना करत हे।
“एकरसेति हे इसरायल, मेंह तोर संग अइसन करहूं,
हे इसरायल, काबरकि मेंह तोर संग अइसन करहूं,
त तेंह अपन परमेसर ले भेंट करे बर तियार हो जा।”
ओ, जऊन ह पहाड़मन ला बनाथे,
जऊन ह हवा ला सिरजथे,
अऊ जऊन ह मानव-जाति ऊपर अपन बिचार ला परगट करथे,
जऊन ह बिहान ला अंधियार कर देथे,
अऊ जऊन ह धरती के ऊंचहा ठऊरमन म रेंगथे—
ओकर नांव यहोवा सर्वसक्तिमान परमेसर अय।
Source notes (2)
- Footnote गायमन सामरिया के अगुवा माईलोगनमन
- Footnote या दिन
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.