2 राजा 3

इसरायल के बिरूध मोआब ह बिदरोह करथे

1सामरिया म अहाब के बेटा योराम1 ह इसरायल के राजा बनिस; ओह यहूदा के राजा यहोसापात के राज के अठारहवां साल म राजा बनिस, अऊ बारह साल तक राज करिस। 2ओह यहोवा के नजर म दुस्ट काम करिस, पर ओह ओतेक दुस्ट काम नइं करिस, जतेक ओकर दाई अऊ ददा करे रिहिन। ओह अपन ददा के बनाय बाल देवता के पथरा ला हटा दीस। 3तभो ले ओह नबात के बेटा यरोबाम के ओ पापमन म लगे रिहिस, जेला यरोबाम ह इसरायल ले करवाय रिहिस; ओह ओ पापमन ला नइं छोंड़िस।

4मोआब देस के राजा मेसा ह बहुंत अकन भेड़ पाले रिहिस, अऊ ओला इसरायल के राजा ला एक लाख मेढ़ा-पीला अऊ एक लाख मेढ़ामन के ऊन राजकर के रूप म देय पड़त रिहिस। 5पर अहाब के मरे के बाद, मोआब के राजा ह इसरायल के राजा ले बिदरोह करिस। 6एकरसेति ओ बेरा राजा योराम ह सामरिया ले निकलके जम्मो इसरायल ला लड़ई बर इकट्ठा करिस। 7ओह यहूदा के राजा यहोसापात करा ये संदेस घलो पठोईस: “मोआब के राजा ह मोर बिरोध म बिदरोह करे हवय। का तेंह मोर संग मोआब के बिरोध म लड़े बर जाबे?”

यहोसापात ह जबाब दीस, “हव, मेंह तोर संग जाहूं, जइसने तेंह, वइसने महूं घलो अंव; मोर मनखेमन तोर मनखेमन सहीं अंय, अऊ मोर घोड़ामन तोर घोड़ा अंय।”

8तब ओह पुछिस, “हमन कते डहार ले हमला करबो?”

योराम ह जबाब दीस, “एदोम के बंजर भुइयां कोति ले।”

9तब इसरायल के राजा, यहूदा के राजा अऊ एदोम के राजा मिलके चलिन। अऊ जब ओमन सात दिन तक घुमके चल चुकिन, तब सेना अऊ ओमन के संग रेंगत पसुमन बर पानी नइं मिलिस।

10तब इसरायल के राजा ह कहिस, “हाय! का यहोवा ह हमन तीनों राजा ला मोआब के हांथ म सऊंप देय बर एक संग बलाय हवय।”

11पर यहोसापात ह पुछिस, “का इहां यहोवा के कोनो अगमजानी नइं ए, जेकर दुवारा हमन यहोवा के ईछा ला जान सकन?”

इसरायल के राजा के एक अधिकारी ह जबाब दीस, “सापात के बेटा एलीसा ह इहां हवय, जऊन ह एलियाह के हांथ धोवाय के काम करत रिहिस।2”

12यहोसापात ह कहिस, “ओकर करा यहोवा के बचन ह पहुंचथे।” तब इसरायल के राजा अऊ यहोसापात अऊ एदोम के राजा ओकर करा गीन।

13एलीसा ह इसरायल के राजा ला कहिस, “मोला तोर ले कोनो लेना-देना नइं ए। अपन ददा के अगमजानी अऊ अपन दाई के अगमजानीमन करा जा।”

इसरायल के राजा ह ओला जबाब दीस, “नइं, काबरकि यहोवा ह हमन तीनों राजामन ला मोआब के हांथ म कर देय बर एक संग बलाय हवय।”

14एलीसा ह कहिस, “ओ सर्वसक्तिमान यहोवा के जिनगी के सपथ, जेकर मेंह सेवा करथंव, यदि यहूदा के राजा यहोसापात बर मोर मन म आदर नइं होतिस, त मेंह तुम्हर कोति कोनो धियान नइं देय रहितेंव। 15पर अब कोनो बीना बजइया ला मोर करा लानव।”

जब बीना बजइया ह बीना ला बजात रिहिस, त यहोवा के सामर्थ एलीसा के ऊपर उतरिस 16अऊ ओह कहिस, “यहोवा ह ये कहत हे: मेंह ये घाटी ला पानी के सोता ले भर दूहूं। 17काबरकि यहोवा ह ये कहत हे: तुमन न तो हवा ला देखहू अऊ न ही बारिस, तभो ले ये घाटी ह पानी ले भर जाही, अऊ तुमन अऊ तुम्हर गाय-बईला अऊ तुम्हर आने पसुमन ला पीये बर पानी मिलही। 18येह यहोवा के नजर म एक छोटकन बात अय; ओह मोआब ला घलो तुम्हर हांथ म कर दीही। 19तुमन हर गढ़वाले सहर अऊ हर एक बड़े नगर ला नास कर दूहू। तुमन हर एक बने रूख ला काट डारहू, पानी के जम्मो सोतामन ला बंद कर दूहू, अऊ जम्मो बने खेतमन ला पथरा पाटके नास कर दूहू।”

20ओकर दूसर दिन बिहनियां, बलिदान चघाय के बेरा म, अइसने होईस—एदोम के दिग ले पानी बहे लगिस! अऊ देस ह पानी ले भर गीस।

21जम्मो मोआबीमन सुने रिहिन कि राजामन हमर ले लड़े बर आय हवंय, एकरसेति हर एक मनखे, जवान अऊ डोकरा, जेमन हथियार उठा सकत रिहिन, ओ जम्मो ला बलाके सीमना म तैनात कर दिये गीस। 22जब ओमन बड़े बिहनियां सुतके उठिन, त देखिन कि सूरज ह पानी के ऊपर चमकत रहय। मोआबीमन ला रसता के एक तरफ ले लेके दूसर तरफ तक पानी ह लहू के सहीं लाल दिखिस। 23त ओमन आपस म कहे लगिन, “ओह तो लहू अय! जरूर ओ राजामन आपस म लड़के एक-दूसर ला मार डारे हवंय। एकरसेति हे मोआबीमन, सामान ला लूटे बर आवव।”

24पर जब ओमन इसरायल के छावनी करा आईन, त इसरायलीमन उठिन अऊ मोआबीमन ले लड़के ओमन ला भगा दीन। अऊ इसरायलीमन ओ देस ऊपर हमला करके मोआबीमन ला मारते चले गीन। 25ओमन नगरमन ला नास कर दीन, अऊ जम्मो बने-बने खेत म हर एक मनखे पथरा फेंकत गीन अऊ ओ खेतमन ला पथरा ले पाट दीन। ओमन पानी के जम्मो सोतामन ला बंद कर दीन अऊ हर एक बने रूख ला काट डारिन। सिरिप कीर-हरेसेत सहर के जगह ह पथरामन के संग बांचिस, पर जऊन मनखेमन गोफन चलात रिहिन, ओमन ओला चारों कोति ले घेर लीन अऊ ओकर ऊपर हमला कर दीन।

26जब मोआब के राजा ह देखिस कि ओह लड़ई हारत हवय, त ओह सात सौ तलवारधारी मनखेमन ला लेके एदोम के राजा कोति हमला करिस, पर ओमन सफल नइं होईन। 27तब ओह अपन पहिलांत बेटा ला लीस, जऊन ह कि ओकर जगह म राजा होनेवाला रिहिस, अऊ ओला सहर के दीवार म एक बलिदान के रूप म चघाईस। ये खातिर इसरायल के बिरूध बहुंत कोरोध भड़किस; अऊ ओमन पाछू हटके अपन देस वापिस चल दीन।