Biblica® सुतंतर समकालीन छत्तीसगढ़ी अनुवाद
1 इतिहास 16
सन्दूक के आघू म सेवा करई
ओमन परमेसर के सन्दूक ला लानके ओ तम्बू के भीतर म रख दीन, जऊन ला दाऊद ह ओकर बर बनाय रिहिस, अऊ ओमन परमेसर के आघू म होम-बलिदान अऊ मेल-बलिदान चघाईन। जब दाऊद ह होम-बलिदान अऊ मेल-बलिदान चघा लीस, त ओह यहोवा के नांव म मनखेमन ला आसीस दीस। तब ओह हर एक इसरायली आदमी अऊ माईलोगन ला एक-एक ठन रोटी अऊ एक-एक ठन खजूर के टिकिया अऊ एक-एक ठन किसमिस के टिकिया बंटवाईस।
तब दाऊद ह कुछू लेवीमन ला ठहिराईस कि ओमन यहोवा के सन्दूक के आघू म यहोवा, इसरायल के परमेसर के इस्तुति, धनबाद अऊ परसंसा करे के दुवारा सेवा करंय: आसाप ह मुखिया रिहिस, अऊ ओकर बाद जकरयाह के पद रिहिस, फेर याजीएल, समीरामोत, यहीएल, मत्तितियाह, एलीआब, बनायाह, ओबेद-एदोम अऊ येइल रिहिन। येमन ला सारंगी अऊ बीना बजाना रिहिस, अऊ आसाप ला झांझ बजाना रिहिस, बनायाह अऊ यहजीएल नांव के पुरोहितमन ला परमेसर के करार के सन्दूक के आघू म लगातार तुरही बजाना रिहिस।
ओ दिन दाऊद ह आसाप अऊ ओकर सहायकमन ला ठहिराईस कि ओमन ये तरीका ले यहोवा के परसंसा करंय:
यहोवा के परसंसा करव, ओकर नांव के घोसना करव;
जाति-जाति के मनखेमन के बीच म ओकर करे गे काम ला बतावव।
ओकर गीत गावव, ओकर परसंसा के गीत गावव;
ओकर जम्मो अद्भूत काम के बखान करव।
ओकर पबितर नांव के महिमा होवय;
जऊन मन यहोवा के खोज करथें, ओमन के मन आनंदित होवय।
यहोवा अऊ ओकर बल के खोज म रहव;
हमेसा ओकर दरसन के खोज म रहव।
ओकर करे गे अद्भूत काम,
ओकर चमतकार, अऊ ओकर दिये गय नियाय ला सुरता करव,
हे ओकर सेवक, इसरायल के संतानमन,
हे ओकर चुने गय मनखे, याकूब के लइकामन।
ओह यहोवा हमर परमेसर ए;
जम्मो धरती म ओकर नियाय हवय।
ओह अपन करे गे करार,
हजार पीढ़ी के मनखेमन बर करे गे वायदा,
अब्राहम के संग करे गे करार,
इसहाक के संग खाय गे सपथ ला सदाकाल बर सुरता रखथे।
ओह येला याकूब के संग एक बिधि के रूप म,
इसरायल के संग हमेसा के एक करार के रूप म ये कहिके मजबूत करिस:
“तोला मेंह कनान देस दूहूं,
एक निज भाग के रूप म तोला ओह मिलही।”
जब ओमन गनती म थोरकन ही रिहिन,
वास्तव म थोरकन रिहिन, अऊ ओ देस म अजनबी रिहिन,
त ओमन एक जाति ले आने जाति,
अऊ एक राज ले दूसर राज म भटकत रिहिन।
पर परमेसर ह कोनो ला ओमन ला सताय नइं दीस;
ओमन के हित म, ओह राजामन ला दबकारिस:
“मोर अभिसिक्त मनखेमन ला झन छुवव;
मोर अगमजानीमन के कुछू हानि झन करव।”
हे धरती के जम्मो मनखेमन, यहोवा बर गीत गावव,
ओकर उद्धार के सुसमाचार हर दिन सुनात रहव।
जाति-जाति के मनखेमन के बीच म ओकर महिमा के,
अऊ जम्मो मनखेमन के बीच ओकर अद्भूत काम के बखान करव।
काबरकि यहोवा ह महान अऊ अति परसंसा के योग्य अय;
ओह जम्मो देवतामन ले जादा भय के योग्य अय।
काबरकि जाति-जाति के जम्मो देवतामन सिरिप मूरती अंय,
पर यहोवा ह स्वरग ला बनाईस।
सोभा अऊ वैभव ओकर आघू म हवय;
ताकत अऊ आनंद ओकर निवास स्थान म हवय।
हे जाति-जाति के जम्मो परिवारमन, यहोवा के बखान करव,
यहोवा के महिमा अऊ बल के बखान करव।
यहोवा के नांव के मुताबिक ओकर बखान करव;
भेंट लेके ओकर आघू म आवव।
पबितरता ले सोभायमान होके यहोवा के अराधना करव।
हे धरती के जम्मो मनखेमन, ओकर आघू म कांपव!
संसार ला मजबूती से स्थापित करे गे हवय; येला हटाय नइं जा सकय।
अकास ह आनंद मनावय, धरती ह खुस होवय;
ओमन जाति-जाति के मनखेमन के बीच म कहंय, “यहोवा राज करथे!”
समुंदर अऊ ओमा के जम्मो चीजमन गरजंय;
भुइयां अऊ ओमा के हर एक चीज बहुंत आनंदित होवंय!
जंगल के रूखमन गीत गावंय,
ओमन यहोवा के आघू म आनंद के गीत गावंय,
काबरकि ओह धरती के नियाय करे बर आवत हे।
यहोवा ला धनबाद देवव, काबरकि ओह बने अय;
ओकर मया हमेसा बने रहिथे।
ओला पुकारव, “हमर उद्धार करइया परमेसर, हमन ला बचा;
हमन ला इकट्ठा कर अऊ हमन ला जाति-जाति के मनखेमन ले छुड़ा,
ताकि हमन तोर पबितर नांव ला धनबाद देवन,
अऊ तोर परसंसा म बड़ई करन।”
आदिकाल ले अनंतकाल तक,
यहोवा, इसरायल के परमेसर के परसंसा होवय।
तब जम्मो मनखेमन कहिन, “आमीन” अऊ “यहोवा के परसंसा होवय।”
तब दाऊद ह आसाप अऊ ओकर सहायकमन ला यहोवा के करार के सन्दूक के आघू म छोंड़ दीस, ताकि ओमन उहां हर दिन के जरूरत के मुताबिक लगातार सेवा करंय। ओह ओबेद-एदोम अऊ ओकर अड़सठ सहायकमन ला घलो ओमन के संग सेवा करे बर छोंड़ दीस। यदूतून के बेटा ओबेद-एदोम अऊ होसा घलो दुवारपाल रिहिन।
दाऊद ह सादोक पुरोहित अऊ ओकर संगी पुरोहितमन ला यहोवा के पबितर-तम्बू के आघू म, जऊन ह गिबोन के ऊंचहा जगह म हवय, ठहिरा दीस, ताकि ओमन लगातार बिहनियां अऊ संझा के बेरा, होम-बलिदान के बेदी म यहोवा ला होम-बलिदान चघावंय अऊ ये जम्मो काम यहोवा के कानून म लिखे मुताबिक करंय, जऊन ला यहोवा ह इसरायल ला देय रिहिस। ओमन के संग हेमान अऊ यदूतून अऊ बाकि बांचे ओ आने मन घलो रिहिन, जऊन मन ला नांव लेके चुने गे रिहिस, ताकि ओमन यहोवा के नांव के धनबाद ये किसम ले करंय, “ओकर मया सदाकाल तक बने रहिथे।” हेमान अऊ यदूतून के ऊपर तुरही अऊ झांझमन ला बजाय के अऊ पबितर गीत गाय के बेरा आने बाजामन ला बजाय के जिम्मेदारी रिहिस। यदूतून के बेटामन ला दुवार के रखवारी करे बर ठहिराय गे रिहिस।
तब जम्मो मनखेमन अपन-अपन घर चले गीन, अऊ दाऊद ह अपन परिवार ला आसीस देय बर अपन घर लहुंट गीस।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.