Biblica® Open Chhattisgarhi Contemporary Version
भजन-संहिता 99
यहोवा ह सासन करथे,
देस-देस के मनखेमन कांपंय;
ओह करूबमन के बीच सिंघासन म बिराजमान होथे,
धरती ह डोलय।
सियोन म यहोवा ह महान ए;
ओह जम्मो देसमन के ऊपर उठाय गे हवय।
ओमन तोर महान अऊ अद्भूत नांव के परसंसा करंय—
ओह पबितर अय।
राजा ह सक्तिसाली हवय, ओह नियाय ले मया करथे—
तेंह समानता के इस्थापना करे हस;
याकूब1 म तेंह ओ करे हस,
जऊन ह नियाय-संगत अऊ सही अय।
यहोवा हमर परमेसर के बहुंत परसंसा करव
अऊ ओकर पांव के चउकी करा अराधना करव;
ओह पबितर ए।
मूसा अऊ हारून ओकर पुरोहितमन म रिहिन,
समूएल ह ओमन के बीच म ले रिहिस, जऊन मन ओकर नांव लेवंय;
ओमन यहोवा ला पुकारंय
अऊ ओह ओमन ला जबाब देवय।
ओह ओमन ले बादर के खंभा म ले बात करय;
ओमन ओकर दिये गय नियम अऊ बिधिमन ला मानंय।
यहोवा हमर परमेसर,
तेंह ओमन ला जबाब देय;
इसरायल बर तेंह छेमा करइया परमेसर रहय,
हालाकि तेंह ओमन के गलत काम बर दंड देय।
परभू हमर परमेसर के बहुंत परसंसा करव
अऊ ओकर पबितर पहाड़ करा अराधना करव,
काबरकि यहोवा हमर परमेसर ह पबितर ए।
Source notes (1)
- Footnote या इसरायली समाज
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.