Biblica® Open Chhattisgarhi Contemporary Version
भजन-संहिता 63:1
Verse 1 is marked below, with the whole chapter around it. Read from the start
दाऊद के एक भजन। जब ओह यहूदा के निरजन जगह म रिहिस।
हे परमेसर, तेंह मोर परमेसर अस,
उत्सुक होके मेंह तोला खोजथंव;
सूखा अऊ झुलसत भुइयां म
जिहां पानी नइं ए,
मेंह तोर पीयासा हंव,
मोर पूरा सरीर तोर संगति के कामना करथे।
मेंह पबितर-स्थान म तोला देखे हवंव
अऊ तोर सामर्थ अऊ तोर महिमा ला निहारेंव।
काबरकि तोर मया ह जिनगी ले जादा बने अय,
मोर मुहूं ह तोर महिमा करही।
जब तक मेंह जीयत हंव, मेंह तोर परसंसा करहूं,
अऊ तोर नांव के महिमा म मेंह अपन हांथ उठाहूं।
मानो बने जेवन ले मेंह पूरा संतुस्ट होहूं,
अऊ मेंह मोर मुहूं ले गावत तोर परसंसा करहूं।
अपन दसना म मेंह तोला सुरता करथंव;
रथिया के बेरा मेंह तोर बारे म सोचथंव।
काबरकि तेंह मोर मददगार अस,
मेंह तोर डेना के छइहां म गाथंव।
मेंह तोर संग लगे रहिथंव;
तोर जेवनी हांथ ह मोला संभालथे।
जऊन मन मोला मार डारे चाहथें, ओमन नास हो जाहीं;
ओमन धरती के गहरई म दब जाहीं।
ओमन तलवार ले मारे जाहीं
अऊ सियारमन के जेवन बन जाहीं।
पर राजा ह परमेसर म आनंद मनाही;
ओ जम्मो जऊन मन परमेसर के सपथ खाथें, ओमन ओकर महिमा करहीं,
जबकि लबरामन के मुहूं ला बंद करे जाही।
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.