Biblica® Open Chhattisgarhi Contemporary Version
भजन-संहिता 20
संगीत के निरदेसक बर दाऊद के एक भजन।
बिपत्ति के बेरा म यहोवा ह तोर बिनती के जबाब देवय;
याकूब के परमेसर के नांव ह तोला बचावय।
पबितर-स्थान ले ओह तोर बर मदद पठोवय
अऊ सियोन ले तोला मदद देवय।
ओह तोर जम्मो बलिदान ला सुरता करय;
अऊ तोर होम-बलिदान ला स्वीकार करय।
ओह तोर मन के ईछा ला पूरा करय
अऊ तोर जम्मो योजना ला सफल करय।
हमन तोर जय के कारन आनंद के मारे चिचियावन
अऊ अपन परमेसर के नांव के झंडा ला ऊंचा करन।
यहोवा ह तोर जम्मो बिनती ला पूरा करय।
अब ये बात मेंह जानत हंव:
यहोवा ह अपन अभिसिक्त जन ला बिजयी बनाथे।
ओह ओला अपन स्वरगीय पबितर-स्थान ले
अपन जेवनी हांथ के बिजयी सक्ति के संग जबाब देथे।
कुछू मनखेमन रथ ऊपर अऊ कुछू मनखेमन घोड़ामन ऊपर भरोसा करथें,
पर हमन तो यहोवा हमर परमेसर के नांव ऊपर भरोसा करथन।
ओमन ला ओमन के माड़ी म लाय जाथे अऊ ओमन गिरथें,
पर हमन उठके मजबूती से खड़े रहिथन।
हे यहोवा, राजा ला बिजयी बना!
जब हमन पुकारथन, त हमन ला जबाब दे!
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.