Biblica® Open Chhattisgarhi Contemporary Version
भजन-संहिता 149
यहोवा के परसंसा करव।1
यहोवा बर एक नवां गीत गावव,
ओकर बिसवासयोग्य मनखेमन के सभा म ओकर परसंसा करव।
इसरायल ह अपन सिरिस्टीकर्ता म आनंदित होवय;
सियोन के मनखेमन अपन राजा म खुस होवंय।
ओमन नाचत ओकर नांव के परसंसा करंय
अऊ ओकर बर खंजरी अऊ बीना बजावंय।
काबरकि यहोवा ह अपन मनखेमन ले खुस रहिथे;
ओह नम्र मनखेमन ला जीत के मुकुट पहिराथे।
ओकर बिसवासयोग्य मनखेमन ये आदर पाके आनंद मनावंय
अऊ अपन दसना म आनंद के गीत गावंय।
ओमन के मुहूं ले परमेसर के परसंसा होवय
अऊ ओमन के हांथ म दूधारी तलवार रहय,
ताकि जाति-जाति के मनखेमन ले ओमन बदला लेवंय
अऊ मनखेमन ला दंड देवंय,
अऊ ओमन के राजामन ला बेड़ी म,
अऊ ओमन के परभावसाली मनखेमन ला लोहा के संकली म बांधंय,
अऊ ओमन के बिरूध दंड के हुकूम ले जावंय—
येह ओकर जम्मो बिसवासयोग्य मनखेमन के महिमा ए।
यहोवा के परसंसा करव।
Source notes (1)
- Footnote इबरानी म हलिलूयाह ; पद 9 म घलो
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.