Biblica® Open Chhattisgarhi Contemporary Version
भजन-संहिता 142
दाऊद के एक मसकील, जब ओह गुफा म रिहिस। एक पराथना।
मेंह यहोवा ला ऊंचहा अवाज म पुकारथंव;
मेंह यहोवा ला दया करे बर जोर से गोहारथंव।
मेंह ओकर आघू म अपन सिकायत ला खुलके बताथंव;
ओकर आघू म मेंह अपन समस्या ला बताथंव।
जब मोर आतमा ह मोर भीतरे-भीतर बियाकुल होथे,
तब तेंहीच ह मोर दसा ला देखथस।
जऊन रसता म मेंह चलथंव, ओ रसता म
मनखेमन मोर बर फंदा लगाय हवंय।
देख, मोर जेवनी कोति कोनो नइं एं;
मोर कोनो चिंता नइं करंय।
मोर कोनो सरन-स्थान नइं ए;
कोनो मोर जिनगी ऊपर धियान नइं देवंय।
हे यहोवा, मेंह तोला पुकारत हंव;
मेंह कहिथंव, “तेंह मोर सरन-स्थान,
अऊ जीयत परानीमन के देस म मोर भाग अस।”
मोर पुकार ला सुन,
काबरकि मेंह बहुंत जरूरत म हवंव;
जऊन मन मोर पीछा करथें, ओमन ले मोला बचा,
काबरकि ओमन मोर ले बहुंत ताकतवर अंय।
मोला मोर जेल ले छोंड़ा ले,
ताकि मेंह तोर परसंसा करंव।
तब मोर ऊपर तोर भलई के कारन
धरमी मनखेमन मोर चारों कोति जूरहीं।
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.