Biblica® Open Chhattisgarhi Contemporary Version
भजन-संहिता 108
एक गीत। दाऊद के एक भजन।
हे परमेसर, मोर मन ह अटल हवय;
मेंह अपन पूरा आतमा ले गीत गाहूं अऊ बाजा बजाहूं।
हे बीना अऊ सारंगी, जागव!
मेंह बड़े बिहनियां ला जगाहूं।
हे यहोवा, मेंह जाति-जाति के मनखेमन के बीच म तोर परसंसा करहूं;
मेंह मनखेमन के बीच म तोर गीत गाहूं।
काबरकि तोर मया ह अतेक महान ए कि ओह स्वरग ले घलो ऊंच हवय;
तोर बिसवासयोग्यता ह अकास तक हबरत हवय।
हे परमेसर, तोर महिमा ह स्वरगमन ले घलो ऊपर होवय;
तोर महिमा ह जम्मो धरती ऊपर होवय।
अपन जेवनी हांथ उठाके हमन ला बचा अऊ हमर मदद कर,
ताकि जऊन मन तोर ले मया करथें, ओमन छोंड़ाय जावंय।
परमेसर ह अपन पबितर-स्थान ले कहे हवय:
“जीत के खुसी म, मेंह सकेम ला बांट दूहूं
अऊ सुक्कोत के घाटी ला नापहूं।
गिलाद ह मोर ए, मनस्से ह घलो मोर ए;
एपरैम ह मोर मुड़ के टोप ए,
यहूदा ह मोर राजदंड ए।
मोआब ह मोर हांथ-मुहूं धोए के बरतन ए,
एदोम ऊपर मेंह अपन पनही ला उछालहूं;
पलिस्ती ऊपर मेंह जीत के खुसी म चिचियाहूं।”
कोन ह मोला गढ़वाले सहर म लानही?
कोन ह मोला एदोम देस ले जाही?
हे परमेसर, का ये तें नो हस, तें जऊन ह हमन ला अस्वीकार करे हस
अऊ अब हमर सेना के संग नइं जावस?
बईरीमन के बिरूध हमर मदद कर,
काबरकि मनखे के दिये मदद ह बेकार ए।
परमेसर के मदद ले ही हमन बिजयी होबो,
अऊ ओह हमर बईरीमन ला कुचर दीही।
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.