Maakɩ 8

Yesu fa bakpa kɔrʋɔsɛ sɩ nara (4,000) adiya

Matiyo 15:32-39

1Dɩmʋŋ gɩyɩɛnɩŋ ŋina naŋ na bakpa fɔɩ kɔŋ Yesu jaŋ. Gʋ ba tana bʋrʋ na baa di dʋɔ, Yesu yagɛ wʋ kpalɛnara baa kɔŋ wʋ jaŋ sɛ wʋ tawɩ ba sɛ, 2<<Bakpa bana wɩɛ wɩɛ maŋ gɩyɔŋ, akala takɩɛ wɩɛ atoro mɩnaŋ gʋ ba wɩɛ ma jaŋ, sɛ ba n yu bʋrʋ di i. 3Sɛ ma tii ba gbɩɛ sɛ ba mʋ dusoŋ bɔrɛ ju dɩɛ na, baa lɩɩ sala gbɩɛ naŋ, akala takɩɛ ba barɛ lɩɩ gbɩɛ taŋasɛ.>>

4Sɛ wʋ kpalɛnara baa tasɛ ɩ sɛ, <<Le sɛ wʋkpa aja yu adiya fɔɩ ifuli ŋina dʋɔ fa jama bana?>>

5Sɛ Yesu tasɛ ba sɛ, <<Bodobodo aŋmaŋ sɛ ɩ wɩɛna?>> Sɛ ba lɩsɛ ɩ nʋɔ sɛ, <<Lɩkaarɛ.>>

6Sɛ Yesu tawɩ jama baa sɛ n cha tibi naŋ. Gʋ wʋ mʋ bodobodo lɩkaarɛ ŋii sɛ wʋ yɩlɩ Ɩsʋɔ taŋ na, wʋ jaɩ tɩba sɛ wʋ mʋ fa wʋ kpalɛnara baa sɛ ba n kpara fa jama baa. Sɛ ba yɩɛ dɩmʋŋ. 7Na ba wɩɛna aji pii. Sɛ wʋ yɩlɩ Ɩsʋɔ sɛ wʋ mʋ fa ba sɛ ba n kpara fa jama baa. 8Bakpa baa di sɛ ba pawʋ sɛ wʋ kpalɛnara baa kui ŋii ba di kakaa na gachaŋasɛ lɩkaarɛ. 9Bakpa baa ba di adiya ŋina na tɩba baala aja yɩɛ kɔrʋɔsɛ sɩ nara (4,000). Gʋ Yesu tii ba gbɩɛ taŋ na, 10wʋ na wʋ kpalɛnara baa jʋʋ buori naŋ ju Dalimanuta tibi dʋɔ.

Farasitina tasɛ Yesu adaŋgana

Matiyo 12:38-42; 16:1-4

11Gʋ Yesu wɩɛ dɩmaŋ na, Farasitina barɛ kɔŋ wʋ jaŋ sɛ ba faara baa tasɛ ɩ wɩɛ. Gʋ baa ja baa yɩɛ ɩ lɔ tɩba dʋɔ, ba tawɩ ɩ sɛ wʋ n yela na adaŋgana a lɩɩ Ɩsʋɔ adugbe kɔŋ na ŋii kalaa sɛ wʋ yikuo lɩɩ Ɩsʋɔ jaŋ bɛ. 12Sɛ Yesu lɩɩ wuosi sala tɩba sɛ wʋ tawɩ sɛ, <<Be dʋɔ sɛ dɩmʋŋ gɩnanaŋ ɩ ja daasɛ wɩɛ ɩ naa? Maa tawɩ sɛ n nyii na dieli sɛ daasɛ wɩɛ ŋarɛ taŋ ŋii lɩɩ adugbe kɔŋ fa amɩɛ ɛ.>> 13Sɛ Yesu yela ba dɩmaŋ sɛ wʋ jʋʋ buori naŋ sɛ wʋ tɩɛsɛ ju gatɩɛsa.

Farasitina na Hɛrɔdɩ yiisi

Matiyo 16:5-12

14Gʋ wʋ kpalɛnara baa tala gatɩɛsa na, dɩmaŋ sɛ ba nyiŋi gʋ ba n mʋ bodobodo o, amʋɔ bodobodo garɛ sɛ ba mʋ chaŋ buori gaa naŋ. 15Sɛ Yesu jɔ ba nyienaŋ sɛ, <<N kɩɛ amɩɛ wʋsɛ dʋɔ na dieli lɩɩ Farasitina na Hɛrɔdɩ yiisi1 dʋɔ.>>

16Sɛ wʋ kpalɛnara baa tawɩ ba nyiŋeŋ-nyiŋeŋ sɛ, <<Bodobodo gaa dɩ n mʋ na dʋɔ sɛ wʋ tawɩ dɩmʋŋ.>>

17Gʋ Yesu jiŋ wɩɛ ŋii baa tawɩ na, wʋ tasɛ ba sɛ, <<Be n yɩɛ sɛ ɩ tawɩ sɛ dɩ tana bodobodo? Ɩ saŋ ɩŋ na ta yaa ɩŋ nyii ta tie? Amɩɛ nfɩɛrɛ naŋ taŋ dɩkɩŋ bɛ? 18Ɩ wɩɛna asa ama ɩ naa? Ɩ wɩɛna dɩla ama ɩ nyii i? Ɩ nyiŋi 19bodobodo anʋŋ ŋii ma jaɩ fa bakpa kɔrʋɔsɛ sɩ nʋŋ (5,000) sɛ ba di kakaa na gachaŋasɛ aŋmaŋ sɛ ɩ kuiwu?>> Sɛ ba lɩsɛ nʋɔ sɛ, <<Gifi ala.>>

20Sɛ Yesu ti bɔrɛ tawɩ ba sɛ, <<Gʋ ma jaɩ bodobodo lɩkaarɛ ŋii fa bakpa kɔrʋɔsɛ sɩ nara (4,000) sɛ ba di kakaa na gachaŋasɛ aŋmaŋ sɛ ɩ kuiwu?>> Sɛ ba lɩsɛ nʋɔ sɛ, <<lɩkaarɛ.>>

21Sɛ Yesu tasɛ ba sɛ, <<Ɩ saŋ ɩŋ nyii ta tie?>>

Yesu chɔ ɔtaŋpʋ Betisayida dɩɛ naŋ

22Gʋ Yesu na wʋ kpalɛnara baa tala Betisayida dɩɛ naŋ na, bakpa barɛ kɔna baalɛ ɔtaŋpʋ wʋrʋ Yesu jaŋ sɛ ba sʋlʋ ɩ sɛ wʋ n mʋ wʋ pam tapʋ ɩ na wʋ a chɔ ɩ. 23Yesu chaŋ baalɛ ɔtaŋpʋ wʋŋ pam naŋ mʋ ɩ lɩɩ dɩɛ bie gaa naŋ. Wʋ tɔ mɩtalɩŋ dʋ ɔtaŋpʋ wʋŋ asanaŋ sɛ wʋ mʋ wʋ pam jaga wʋ dʋɔ, sɛ Yesu tasɛ ɩ sɛ, <<Nya na bʋrʋ garɛ?>>

24Sɛ wʋ jiŋna wʋ asa kɩɛ adugbe, sɛ wʋ tawɩ sɛ, <<Maa na bakpa takɩɛ dasɛ ba dɔŋ ba dɔŋ.>>

25Sɛ Yesu ti bɔrɛ mʋ wʋ pam tapʋ baalɛ wʋŋ asa sɛ ŋɩ fʋlʋ, sɛ wʋ a na bʋrʋkʋma na dieli. 26Sɛ Yesu tii ɩ gbɩɛ sɛ wʋ n ju waa dʋɔ sɛ wʋ tawɩ ɩ sɛ, <<N baa ti ju dɩɛ bie2 gaa naŋ.>>

Petero kalaa wʋkpa wʋŋ Yesu yɩɛ na

27Sɛ Yesu na wʋ kpalɛnara baa lɩɩ Betisayida dɩɛ naŋ sɛ ba ju dɩɛsɛ bisi ŋii ŋɩ wɩɛ Kayisariya Filipi tibi dʋɔ. Gʋ baa ju na, wʋ tasɛ ba sɛ, <<Mmʋɔ sɛ bakpa a tawɩ sɛ ma yɩɛ?>>

28Ba lɩsɛ nʋɔ sɛ, <<Barɛ sɛ Yohane Ɩsʋɔ Sɔrɛ wʋŋ, barɛ sɛ Ɩsʋɔ ɔja Eliya, sɛ barɛ dʋɔ sɛ nya yɩɛ Ɩsʋɔ bajana baa tɩba wʋrʋ bɛ.>>

29Sɛ Yesu tasɛ ba sɛ, <<Amɩɛ dʋɔ de, mmʋɔ sɛ ɩ sɛ ma yɩɛ?>> Sɛ Petero lɩsɛ nʋɔ sɛ, <<Nyaŋ n nyina Kirisito3 wʋŋ.>>

30Sɛ Yesu jɔ ba nyienaŋ sɛ, <<N baa tawɩ wʋkpa wʋŋ ma yɩɛ na fa wʋrʋ.>>

Yesu tawɩ wʋ awʋrʋfʋɔ na wʋ sɩŋ wɩɛ

Matiyo 16:21-28; Luka 9:22-27

31Sɛ Yesu faara wʋ a tawɩ wʋ kpalɛnara baa sɛ, <<Ŋɩ tiri gʋ Wʋkpa Bu wʋŋ a na awʋrʋfʋɔ fɔɩ, na dɩɛ bɩnɩɛ, Ɩsʋɔ sei bɩnɩɛ na mbara bakalaasa a pɩɛ ɩ na baa kʋ ɩ, ama wɩɛ atoro wɩɩ na, wʋ a feŋ lɩɩ sɩŋ naŋ.>> 32Gʋ Yesu tawɩ fulu wɩɛ ŋii asa dʋɔ fa ba na, sɛ Petero yagɛ ɩ lɩɩ laraŋ sɛ wʋ tawɩ baŋ ɩ sɛ wʋ n baa tawɩ dɩmʋŋ.

33Ama Yesu biliŋi kɩɛ wʋ kpalɛnara na, wʋ tawɩ baŋ Petero sɛ, <<Lɩɩ ma dʋɔ Sɩtanɩ! Akala takɩɛ wʋkpa nfɩɛrɛ sɛ nyaa faa, naa Ɩsʋɔ teri i.>>

34Sɛ Yesu yagɛ jama na wʋ kpalɛnara baa kɔŋ wʋ jaŋ. Sɛ wʋ tawɩ ba sɛ, <<Wʋkʋma wʋŋ wʋ a ja sɛ wʋ a kpaŋ maŋ na, ŋɩ tiri gʋ wʋ a yela wʋ tɩŋtɩŋ wʋ jawʋ na wʋ a sɩlɛ wʋ daŋ gasagasa na wʋ a kpaŋ maŋ. 35Akala takɩɛ wʋkʋma wʋŋ wʋ a ja wʋ a yu nkpa fa wʋ wʋsɛ na, wʋ a paŋ ŋɛ. Ama wʋkʋma wʋŋ wʋ paŋ wʋ nkpa lɩɩ maŋ na Ɩsʋɔ wɩɛ dʋɔ na, wʋ a yu nkpa. 36Wʋkpa yu dulunya abʋrɩ kpiniŋ sɛ wʋ paŋ wʋ nkpa na, be sɛ wʋ a yu? 37Yaa be sɛ wʋkpa a dɩlɛ mʋ chɩɛgɩna wʋ nkpa? 38Wʋkʋma wʋŋ wʋ a pɩɛ maŋ na ma kalaa gɩnanaŋ gana gɩ baa di gasiŋteŋ fa Ɩsʋɔ sɛ baa yɩɛ dɩsʋbʋ na, dɩmʋŋ sɛ maŋ Wʋkpa Bu wʋŋ gba maa pɩɛ ɩ saŋa gaa maŋ na Ɩsʋɔ gabʋɔsɛ wʋsɛ chɩrɩchɩrɩ dɩɩ bɔrɛ kɔŋ ma Majuo jilima naŋ.>>