Luka 11

Yesu kalaa ganaŋkʋ baa jɔ dɩga

Matiyo 6:9-13; 7:7-11

1Wɩɩ darɛ Yesu wɩɛ gatʋŋgʋrʋ wʋ a jɔ dɩga. Gʋ wʋ jɔ dɩga taŋ na, wʋ kpalɛnara baa tɩba wʋrʋ tawɩ ɩ sɛ, <<Kpaŋjuo, kalaa daa ganaŋkʋ dɩɩ jɔ dɩga takɩɛ ganaŋkʋ Yohane kalaa wʋ kpalɛnara na.>>

2Sɛ wʋ tawɩ ba sɛ ɩɩ jɔ dɩga na, n tawɩ sɛ,

<<Daa Juo1 Ɩsʋɔ,

n yɩrɛ yɩɛ wʋsɛ chɩrɩchɩrɩ,

n Juori n kɔŋ2.

3Fa daa wɩɩ kʋma adiya.

4Mʋ daa dɩsʋbʋ chɩɛ daa

akala takɩɛ daa gba dɩ mʋ dɩ chɩɛ wʋkʋma wʋŋ wʋ yɩɛ daa dɩsʋbʋ na.

Gara daa na dɩ n baa jʋʋ lɔ tɩba naŋ.>>

5Sɛ Yesu tawɩ wʋ kpalɛnara baa sɛ, <<Dɩ n mʋ sɛ amɩɛ tɩba wʋrʋ wɩɛna dɩɛtɛ. Sɛ wʋ ju wʋ jaŋ tɩɛ tɩtɩba ga tawɩ ɩ sɛ ma dɩɛtɛ, kɩŋ maŋ bodobodo atoro, 6akala takɩɛ ma dɩɛtɛ wʋrʋ lɩɩ gbɩɛ dʋɔ kɔŋ ma jaŋ, ama ma tana bʋrʋ maa fa ɩ wʋ a di i.>>

7Sɛ wʋ dɩɛtɛ wʋŋ wʋ wɩɛ danaŋ na, lɩsɛ ɩ nʋɔ sɛ, <<N baa nyala maŋ. Ma tɔ bʋɔlɛ sɛ maŋ na ma bie dɩ duo. Maa dɩlɛ kʋlʋ fa nyaŋ bʋrʋ ʋ.>> 8Sɛ Yesu tawɩ sɛ, <<Maa tawɩ amɩɛ sɛ, dɩ kakaa dɩɛtɩrɛ nyiŋeŋ dʋɔ na, wʋ a kʋlʋ fa ɩ bʋrʋ ʋ. Ama lɩɩna gʋ wʋ saŋ ju dʋɔ wʋ a sʋlʋ dʋɔ na, wʋ a kʋlʋ fa ɩ adiya ganaŋkʋ wʋ a jawʋ na.>>

9Dɩmʋŋ dʋɔ <<Maa tawɩ amɩɛ sɛ, n tasɛ Ɩsʋɔ na wʋ a fa amɩɛ. N ja na ɩ na. N jɔ bʋɔlɛ na wʋ a tʋlʋ amɩɛ. 10Akala takɩɛ wʋkʋma wʋŋ wʋ a tasɛ Ɩsʋɔ na, wʋ a fa ɩ. Wʋŋ wʋ a jawʋ na, wʋ a na, sɛ wʋŋ wʋ jɔ bʋɔlɛ na, wʋ a tʋlʋ ɩ.>>

11Sɛ wʋ ju dʋɔ tawɩ sɛ, <<Amɩɛ juo aba tɩba wʋ mmʋɔ bu n tasɛ ɩ diji na, sɛ wʋ a fa ɩ dʋm? 12Yaa wʋ tasɛ ɩ yalɛ na, wʋ a fa ɩ gachɩra? 13Amɩɛ baa ɩ yɩɛ dɩsʋbʋ yɩɛra na gba jiŋ ganaŋkʋ ɩɩ mʋ abʋrɩ abama ɩɩ fa amɩɛ bie, be n yɩɛ sɛ amɩɛ Juo wʋŋ wʋ wɩɛ Ɩsʋɔ adugbe na, ba aa mʋ Ɩsʋɔ Feliŋ ŋii fa baa baa tasɛ ɩ naa?>>

Yesu na Belesebu

Matiyo 12:22-30; Maakɩ 3:20-27

14Wɩɩ darɛ, Yesu geŋ feliŋ sʋbʋ wʋŋ wʋ a yela sɛ wʋkpa a yɩɛ namu na lɩɩ baalɛ wʋrʋ tɩba. Gʋ feliŋ sʋbʋ wʋŋ lɩɩ baalɛ wʋŋ tɩba na, sɛ namu wʋŋ tawɩ sɛ dɩ yɩɛ jama baa doba. 15Ama ba tɩba barɛ tawɩ sɛ, <<Belesebu wʋŋ wʋ yɩɛ feliŋ sʋbʋ bɩnɛ na yikuo sɛ wʋ chamɩna wʋ a geŋ feliŋ sʋbʋ.>> 16Sɛ barɛ dʋɔ cha baa ja baa yɩɛ ɩ lɔ tɩba, dɩmʋŋ dʋɔ ba tawɩ ɩ sɛ wʋ n yela na adaŋgana a lɩɩ Ɩsʋɔ adugbe kɔŋ na ŋii kalaa takɩɛ wʋ yikuo lɩɩ Ɩsʋɔ jaŋ bɛ.

17Ama gʋ Yesu jiŋ ba nfɩɛrɛ na sɛ wʋ tawɩ ba sɛ, <<Juori kʋma gaa ga kpara ga wʋsɛ tɩba gaa yuo dɔŋa na, gaa salɩɛ. Dɩmʋŋ sɛ waa kʋma gaa ga kpara ga wʋsɛ tɩba gaa yuo dɔŋa na, gaa salɩɛ. 18Dɩmʋŋ sɛ Sɩtanɩ gba kpara wʋ wʋsɛ wʋ a yuo dɔŋa na, wʋ juori baa dɩlɛ sɩŋ ŋ. Dɩmʋŋ bɩrɛ wʋ gɩtɛ talɛ mɩnaŋ. 19Sɛ Belesebu yikuo sɛ ma chamɩna maa geŋ feliŋ sʋbʋ maa lɩɩ bakpa tɩba na, Mmʋɔ yikuo sɛ amɩɛ kpamɩra dʋɔ chamɩna baa geŋ feliŋ sʋbʋ baa lɩɩ bakpa tɩba? Sɛ dɩ yɩɛ dɩmʋŋ bɩrɛ na, amɩɛ kpamɩra bana aaŋ ja baa yɩɛ amɩɛ wɩɛ dira na baa fu amɩɛ dɩpʋɛ. 20Ama sɛ Ɩsʋɔ doŋ sɛ ma chamɩna maa geŋ feliŋ sʋbʋ maa lɩɩ bakpa tɩba na, dɩmʋŋ bɩrɛ Ɩsʋɔ Juori kɔŋ amɩɛ jaŋ.>>

21Yesu ju dʋɔ tawɩ sɛ, <<Doŋ-tɛ chamɩna wʋ yuo abʋrɩ wʋ garana wʋ waa na, dɩmʋŋ bɩrɛ wʋ gapatɩɛ wɩɛna garɩŋ. 22Ama sɛ wʋrʋ kii doŋ-tɛ wina sɛ wʋ yuo di wʋ dʋɔ na, wʋ a mʋ wʋ yuo abʋrɩ ŋii wʋ mʋ wʋ wʋsɛ jaga dʋɔ na, na wʋ a kui wʋ abʋrɩ kpiniŋ kpara fa bakpa.>>

23Sɛ Yesu ju dʋɔ tawɩ sɛ, <<Wʋkʋma wʋŋ wʋ n kpi ma dʋɔ na, a yuo maŋ bɛ. Wʋkʋma wʋŋ wʋ aa kʋla wʋ a chɔna maŋ ŋ, a yasɩŋ tɩba bɛ.>>

Feliŋ sʋbʋ bɔrɛ kɔŋ

Matiyo 12:43-45

24Sɛ Yesu ju dʋɔ tawɩ sɛ, <<Feliŋ sʋbʋ lɩɩ wʋkpa tɩba na, wʋ dɔŋ ifuli dʋɔ bɛ wʋ a ja dɩchatɩŋ. Sɛ wʋ n yu na, wʋ a tawɩ bɛ sɛ, <Maa ti bɔrɛ ju ma waa gabɩnɛ dʋɔ.> 25Wʋ bɔrɛ kɔŋ gaa na gʋ ba desina waa gaa dʋɔ na dieli na, 26wʋ a bɔrɛ ga mʋ feliŋ sʋbʋ lɩkaarɛ baa ba wɩɛ nyinaŋ doŋ kii ɩ, na baa gaa cha wʋkpa wʋŋ tɩba. Na wʋkpa wina chawʋ naŋ a warɩɛ kii wʋ chawʋ gɩbɩnɩŋ.>>

Kusee gaa ga yɩɛ gasiŋteŋ na

27Gʋ Yesu saŋ wʋ a tawɩ dɩmʋŋ wɩɛ ŋina na, alʋ wʋrʋ wɩɛ jama baa tɩba sɛ wʋ kuusi tawɩ sɛ, <<Kusee n nyina alʋ wʋŋ wʋ lʋrʋ nyaŋ, na dide gaa nya ŋmasɛ na.>>

28Sɛ Yesu lɩsɛ ɩ nʋɔ sɛ, <<Kusee n nyina baa baa nyii Ɩsʋɔ wɩɛ sɛ baa di ŋɩ dʋɔ.>>

Bakpa tasɛ Yesu adaŋgana

Matiyo 12:38-42

29Gʋ bakpa baa yɩɛ bɔlɩŋ na, Yesu tawɩ sɛ, <<Gɩnanaŋ gana yɩɛ basʋbʋɛ bɛ. Baa ja adaŋgana baa na, ama baa na ŋarɛ ɛ, amʋɔ ŋii ŋɩ tibi Yona dʋɔ na. 30Takɩɛ ganaŋkʋ ŋii ŋɩ kɔŋ Yona dʋɔ na cha ŋɩ yɩɛ adaŋgana fa Niniwetina na, dɩmʋŋ sɛ Wʋkpa Bu wʋŋ wɩɛ gba aja yɩɛ adaŋgana fa gɩnanaŋ gana. 31Ɩsʋɔ wɩɛ di wɩɩ na, Siba3 ala Juo aja kʋlʋ sɩŋ na wʋ a fu gɩnanaŋ gana dɩpʋɛ. Akala takɩɛ wʋ lɩɩ taŋasɛ gaa nyii Solomoŋ kpiŋjim wɩɛ. Kɩɛ, wʋŋ wʋ kii Solomoŋ na wɩɛ jɩna. 32Ɩsʋɔ wɩɛ di wɩɩ na, Niniwetina aja kʋlʋ sɩŋ fu gɩnanaŋ gana dɩpʋɛ. Akala takɩɛ ba nyii Yona wɩɛ na, ba biliŋi lɩɩ ba dɩsʋbʋ naŋ. Kɩɛ, wʋŋ wʋ kii Yona na wɩɛ jɩna.>>

Wʋsɛ ŋmaŋi

Matiyo 5:15; 6:22-23

33Sɛ Yesu ju dʋɔ tawɩ sɛ, <<Wʋrʋ ba aa tʋ fitila na wʋ a mʋ wɩsɛ yaa wʋ a mʋ dinyiŋkpa fu ga dʋɔ ɔ, ama baa mʋ jaga fitila dɩjagatɩŋ bɛ, na bakpa baa baa kɔŋ dɩmaŋ na gaa na ba. 34Nya asa kɩɛna bɛ takɩɛ fitila na fa n wʋsɛ. Dɩmʋŋ dʋɔ nya asa wɩɛ dieli na, n wʋsɛ kpiniŋ gba wɩɛna ŋmaŋi. Ama sɛ nya asa taŋ dieli na, n wʋsɛ gba wɩɛna giteŋteŋbiri. 35Dɩmʋŋ dʋɔ kɩɛ na dieli na ŋmaŋi gaa ga wɩɛ n tɩba na, n baa bɩrɩŋsɛ giteŋteŋbiri. 36N wʋsɛ kpiniŋ wɩɛna ŋmaŋi sɛ giteŋteŋbiri taŋ salɛ garɛ na, n wʋsɛ kpiniŋ aja ŋmaŋi ganaŋkʋ fitila a ŋmaŋi gaa fa nyaŋ na.>>

Yesu pʋɩ Farasitina na mbara bakalaasa baa

Matiyo 23:1-36; Maakɩ 12:38-40

37Gʋ Yesu tawɩ taŋ na, sɛ Farasi wʋkpa wʋrʋ yagɛ ɩ wʋ waa dʋɔ sɛ wʋ n kɔŋ na baa di. Sɛ wʋ ju ga cha didiitiŋ dɩmaŋ na wʋ a di. 38Ama Farasi wʋkpa wʋŋ na gʋ Yesu n saŋ wʋ pamɩɛ pɔɩ na wʋ a di ganaŋkʋ ba duluŋ ayɩɛsa akala na, dɩ yɩɛ ɩ doba.

39Sɛ Kpaŋjuo tawɩ ɩ sɛ, <<Kɩɛ, amɩɛ Farasitina bɩrɛ, ɩ yalɛ amɩɛ gafɩsɩ na achuŋputuŋ wʋrʋgbɩɛ, ama wɩɛ asʋbʋɛ na dɩsɛchɩbɛ n su amɩɛ tɩba. 40Amɩɛ bamalaŋpʋna! Ɩ ba jiŋ sɛ wʋŋ wʋ yɩɛ asanaŋ na wʋŋ n yɩɛ wʋrʋgbɩɛ gba? 41Ama n mʋ ŋii ɩ wɩɛna na fa ayɔŋtina, na ɩ yɩɛ wʋsɛ chɩrɩchɩrɩ.>>

42Sɛ wʋ ju dʋɔ tawɩ sɛ, <<Farasitina amɩɛ lakʋ, akala takɩɛ ɩ tɔ amɩɛ jagɩɛ, akpinie na fʋɔsɛ naŋ abʋrɩ kpiniŋ dʋɔ gifi naŋ garɛ ɩ fa Ɩsʋɔ. Ama ɩ pɩɛ di wɩɛ ŋɩ gbɩɛ dʋɔ sɛ ɩɩ ja Ɩsʋɔ wɩɛ ɛ. Ŋina n daga na ɩ yɩɛ na n baa yela gifi naŋ garɛ tɔ.>>

43Sɛ wʋ tawɩ sɛ, <<Farasitina amɩɛ lakʋ! Akala takɩɛ ɩ ja achaatɩŋ a janɩɛ Yudatina tʋm danɛ naŋ na bakpa a luuŋ yɩlɩ ba gɩyɩɛnɩŋ naŋ.>>

44Sɛ Yesu ju dʋɔ tawɩ sɛ, <<Amɩɛ lakʋ, akala takɩɛ ɩ kɩɛna bɛ takɩɛ gachaŋsɛ ŋii ŋɩ wɩsaɩ na bakpa dɔŋ ŋɩ dʋɔ yela ba ba jiŋ ŋ.>>

45Sɛ Mosesi mbara bakalaasa baa tɩba wʋrʋ wʋŋ wʋ bɩɩ mbara naŋ na, tawɩ Yesu sɛ, <<Wʋkalaasa, nya tawɩ ŋina na, nya ti daa.>>

46Sɛ Yesu lɩsɛ nʋɔ sɛ, <<Amɩɛ Mosesi mbara bakalaasa ɩ bɩɩ mbara naŋ na, amɩɛ lakʋ. Akala takɩɛ ɩ mʋ gasʋlasɛ ayuŋtina ɩ sɩlɛ bakpa, ama amɩɛ bɩrɛ ɩŋ mʋ amɩɛ pam nyiŋbie gba chɔna ba a.>>

47Sɛ wʋ ju dʋɔ tawɩ sɛ, <<Amɩɛ lakʋ, akala takɩɛ ɩɩ ma gachaŋsɛ ɩɩ desina ŋɩ dʋɔ na dieli ɩɩ fa Ɩsʋɔ bajana baa amɩɛ duluŋ n kʋ ba. 48Ŋii ɩ yɩɛ na dʋɔ akala sɛ ɩ yɩɛ seriyatina sɛ ɩ kpa gʋ amɩɛ duluŋ kʋ Ɩsʋɔ bajana sɛ amɩɛ dʋɔ ɩ ma ba gachaŋsɛ. 49Ŋina dʋɔ, Ɩsʋɔ lɩɩ wʋ kpiŋjim naŋ tawɩ sɛ maa kpiri ma bajana na ma kpirida Isiraitina jaŋ, na baa kʋ ba tɩba barɛ na baa nyala barɛ.>> 50Dɩmʋŋ dʋɔ, Ɩsʋɔ aja fɔŋɩ amɩɛ gɩnanaŋ gana dɩla lɩɩ Ɩsʋɔ bajana baa amɩɛ duluŋ kʋ lɩɩ dulunya dɩfaratɩŋ na, 51lɩɩ Abeli kʋ dʋɔ ga tala Sakariya wʋŋ ba kʋ ɩ gadiesa dɩgbɩŋgbɩŋ na Ɩsʋɔ tʋm danɛ tɩtɩba na. Maa tawɩ amɩɛ sɛ, Ɩsʋɔ aja fɔŋɩ gɩnanaŋ gana dɩla lɩɩ ŋina dʋɔ.

52Sɛ wʋ ju dʋɔ tawɩ sɛ, <<Amɩɛ Mosesi mbara bakalaasa baa ɩ bɩɩ mbara naŋ na, amɩɛ lakʋ, akala takɩɛ ɩ tɔ Ɩsʋɔ jim gbɩɛ bɔlɛ. Ama amɩɛ tɩŋtɩŋ ɩŋ jʋʋ o, sɛ ɩ gara baa baa ja sɛ baa jʋʋ na gbɩɛ.>>

53Gʋ Yesu lɩɩ dɩmaŋ na, Farasitina na Mosesi mbara bakalaasa baa faara baa mʋ wʋ dʋɔ biŋbira sɛ ba tasɛ ɩ wɩɛ fɔɩ, 54yela ba dana baa kɩɛ sɛ wʋ a tawɩ wɩɛ ŋarɛ na baa sɩŋ dʋɔ mʋ pʋɩ ɩ.